HOSEA, 6
6
O LE MATAUPU VI.
E tatau ina salamo a e aua le agaleaga pea.
1O mai ia, ina tatou toe foi atu ia Ieova; auā o ia ua na saeia, na te faamaloloina foi i tatou; ua ia fasia, na te fofoina foi i tatou. 2Na te faaolaina mai i tatou pe a mavae aso e lua; a oo i lona tolu o aso na te faatutūina i tatou, tatou te ola mai ai i ona luma. 3Tatou te iloa foi o loo o tatou tausisi atu ia iloa Ieova; ua saunia lona afio atu e pei o le taeao, e afio mai foi o ia ia te i tatou e pei o le ua, e pei o le timu mulimuli ma le timu muamua i le eleele.
4Efaraima e, se a ea se mea ou te faia ia te oe? Iuta e, se a ea se mea ou te faia ia te oe? auā ua pei o le puao i le taeao la outou amio lelei, e pei o le sau foi i le vave ao ona mavae atu. 5O le mea lea ua ou fasia ai i latou e le au perofeta, ua ou fasiotia i latou i upu a lo‘u gutu; o au faamasinoga foi o le malamalama e alu atu lea. 6Auā o le alofa ou te loto i ai, a e le o le taulaga; ia iloa foi le Atua e sili lea i lo‘u manatu i taulaga mu. 7A ua latou soli le feagaiga, e pei o Atamu; ua latou pepelo ia te au i lea mea. 8O Kiliata o le aai lea o e fai amio leaga, o loo leaga, i le toto. 9Faapei ona lamalama i se tagata o e fao mea, e faapea foi le au ositaulaga ona fasioti tagata i le ala i Sekema; auā ua ulavale i latou. 10Ua a‘u iloa i le aiga o Isaraelu le mea e matuā leaga; ua i ai le faitaaga o Efaraima, ua leaga Isaraelu. 11Iuta e, ua tuu mo oe lava le seleselegāsaito ina ua ou faafoisia le tafeaga a lo‘u nuu.
Currently Selected:
HOSEA, 6: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
