EPERU, 6
6
O LE MATAUPU VI.
Ia tumau i le faatuatua, auā e faamaoni le Atua.
1O le mea lea ina tatou tuua ai ia o mataupu muamua a Keriso, a ia tatou faaoo atu i le faaatoatoaga; aua le toe tuuina i lalo le faavae o le salamo i galuega e oti ai, ma le faatuatua i le Atua, 2o le mataupu i papatisoga, ma le faaee atu o lima, ma le toe tutū mai o e ua oti, ma le faamasinoga e faavavau. 3Tatou te faia foi lena mea, pe a finagalo i ai le Atua. 4Auā e le mafaia ia te i latou e na muai faamalamalamaina, na latou tofo foi i le mea foaifuaina mai i le lagi, ma ua faatofutofusia i le Agaga Paia, 5o e ua tofo foi i le upu lelei a le Atua ma le mana o le ola atali, 6ma ua pauu i latou, e le mafaia ona toe faafouina o i latou ina ia salamo, ina ua toe faasatauroina e i latou lava le Alo o le Atua, ma faainosia o ia i luma o tagata. 7Auā o le eleele e inu i le ūa e paū soo i ai, ma tutupu ai fua e aoga ia te i latou o e galulue i ai, ua maua le manuia mai le Atua; 8a o le mea e tutupu mai ai laau tuitui ma anaoso, ua lafoaiina lea, ua latalata foi ina fetuuina, o lona iuga ia susunuina. 9A o outou, le au pele e, e ui lava ina ua faapea ona matou tautala atu ai, matou te mautinoa i mea e sili ona lelei mai ia te outou, o mea foi ua i ai le ola. 10Auā e le amioletonu le Atua, na te le faagalogaloina la outou galuega ma le faamalosi i le alofa ua outou faaali mai ai i lona suafa, auā na outou auauna i le au paia, i le o loo outou auauna i ai. 11A ua matou mananao tele ina ia outou taitasi ma faaali mai lea lava filigā, ina ia mautinoa le faamoemoe e oo i le gataaga; 12ina ia le paie, a ia faaa‘oa‘o i e ua maua i le faatuatua ma le onosai i mea na folafolaina. 13Auā a o folafola mai e le Atua ia Aperaamo, ua le mafaia ona tauto o ia i se tasi e sili ia te ia, o lea na tauto ai o ia ia te ia lava, 14ua faapea mai, E moni lava, ou te matuā faamanuia ia te oe, ma ou matuā faatoateleina lau fanau. 15Na onosai lava o ia, ona maua lea e ia o le mea na folafolaina. 16Auā e tauto tagata i se tasi e sili, o le tauto foi e faamaoni ai, o le iuga lea o fefinauaiga uma ia i latou; 17e faapea foi le Atua, ina ua finagalo ai o ia e faailoa atili ai i e ua tofia i mea na folafolaina, o lana lava pule e le mafaia ona liua na ia faaopoopo i ai le tauto, 18ina ia ia i tatou o mea e lua e le mafai ona liua, e le mafai ona pepelo ai le Atua, tatou te maua ai le faamafanafanaga tele, o i tatou o e ua sosola e tago atu i le faamoemoega ua tuu i o tatou luma; 19ua ia i tatou lena faamoemoega pei se taula o le agaga, e le matosina ma ua mausali, e oo foi i totonu i tala atu o le ie puipui, 20o le mea ua afio atu ai Iesu, o le ua muamua atu mo i tatou; ua fai o ia ma faitaulaga sili e faavavau, e uiga faatasi ma Mekisateko.
Currently Selected:
EPERU, 6: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
