EPERU, 11

O LE MATAUPU XI.

O le uiga o le faatuatua, ma le amio e tupu ai.

1A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia. 2Auā ona o lea na ta‘uleleiina ai o e anamua. 3O le faatuatua ua tatou iloa ai na faia mea uma i le afioga a le Atua; na le faia foi mea ua vaaia i mea ua aliali mai. 4O le faatuatua na avatu ai e Apelu i le Atua le taulaga e sili ona lelei i la Kaino; ona o lea ua ta‘ua ai o ia ua amiotonu, o loo ta‘uleleia ana taulaga e le Atua; o le mea lea ua tautala mai ai pea o ia ua oti. 5O le faatuatua na aveeseina ai Enoka ina ia le oo ia te ia le oti, na le iloa foi o ia, auā na avea o ia e le Atua; auā a o lei aveeseina na ta‘ua ai o ia o le ua fiafia i ai le Atua. 6A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia. 7O le faatuatua na fausia ai e Noa le vaa ina ua mata‘u, e ola ai lona aiga, ina ua a‘oa‘oina e le Atua i mea e lei vaaia i ia ona po, na ia faasalaina ai le lalolagi, ua na maua ai foi le amiotonu, o le amiotonu lea e i le faatuatua. 8O le faatuatua na anaana ai Aperaamo, ina ua valaauina o ia e alu i le mea o le a maua e fai mona fanua, na ia alu foi e lei iloa po o fea a alu i ai. 9O le faatuatua sa āumau ai o ia i le nuu na folafolaina, ina o fai mo tagata ese, sa nofo i fale ie, atoa ma Isaako ma Iakopo, o e na tofia faatasi ma ia i lea lava mea na folafolaina; 10auā na ia faatalitali atu i se aai ua faavaeina, o lona mataisau ma le tufuga o le Atua lea. 11O le faatuatua foi na maua ai e Sara lava le malosi e fanau ai, na fanau foi o ia ina ua mavae tausaga o lona malosi, auā na manatu o ia e faamaoni mai o ia na folafola mai. 12O le mea lea sa tutupu mai ai mai le toatasi, o ia foi na oti i na mea, o le toatele pei o fetu o le lagi, pei o le oneone foi i le matafaga e le mafaitaulia. 13Na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, na mautinoa foi, ma latou talia ma le fiafia, ma latou ta‘utino mai o tagata ese i latou ma āumau i le lalolagi. 14Auā o i latou o e fai mai upu faapena, ua latou matuā faailoa mai o loo saili e i latou lo latou lava nuu. 15Auā foi ana manatua e i latou le nuu ua latou o mai ai, po ua mafaia e i latou ona toe foi atu i ai; 16a o lenei, ua latou naunau lava i le nuu e sili ona lelei, o le faalelagi lea; o le mea lea e le mā ai le Atua ia te i latou, ina ia ta‘ua o ia o lo latou Atuā auā ua saunia e ia o le aai mo i latou.

17O le faatuatua na fai taulaga ai Aperaamo ia Isaako, ina o tofotofoina o ia, o le na talia foi upu na folafolaina ua ia avatu ma taulaga o lona atalii e toatasi, 18sa fetalai mai le Atua ia te ia, E valaauina lau fanau ia Isaako. 19Ua manatu o ia e mafaia e le Atua ona toe faatu mai ia te ia nai e ua oti, na ia maua mai ai foi o ia i le faatusa. 20O le faatuatua na faamanuia atu ai Isaako ia Iakopo ma Esau i mea atali. 21O le faatuatua na faamanuia taitasi atu ai e Iakopo i atalii o Iosefa, ina a oti o ia, na ifo foi o ia ma tōonai i le ulu o lona tootoo. 22O le faatuatua na faamanatu mai ai e Iosefa, ina a oti, i le o ese atu o le fanauga a Isaraelu, ma na poloai atu ai ia i latou i ona ivi. 23O le faatuatua sa natia ai Mose i masina e tolu e ona mātua, ina ua fanau mai o ia, auā na la iloa o ia o le tama tino lelei; na le fefefe foi i laua i le poloaiga a le tupu. 24O le faatuatua na le mafai ai Mose, ina ua matua o ia, ona ia ta‘ua o ia o le tama a le afafine o Farao, 25ua filifili e ia ia agaleagaina o ia faatasi ma tagata o le Atua e lelei ai, a e aua le ia te ia le fiafia i le agasala e vave mavae; 26ua manatu o ia i le upu faifai ona o Keriso o le oa lea e sili i faaputugāoa o Aikupito; auā sa faanaunau o ia i le taui. 27O le faatuatua na tuuina ai e ia o Aikupito, ua le fefe i le ita o le tupu; auā na faamalosi o ia pei o sē iloa atu i le le o vaaia. 28O le faatuatua na ia fai ai le paseka, ma le sausauina atu o le toto, ina ia le papai ane ia i latou o le na fano ai ulumatua. 29O le faatuatua ua latou ui ai i le sami Ulaula pei o le eleele matutu; ua taumafai i ai tagata Aikupito, ona malelemo ai lea o i latou. 30O le faatuatua na solo ai pa o Ieriko, ina ua faataamiloina i ona aso e fitu. 31O le faatuatua, na le oti faatasi ai Raava le fafine talitane ma e na le faalogo, ina ua talifilemuina e ia e na asiasi i le nuu. 32Se a foi la‘u e toe fai atu? auā e saasaa le aso e tala atu ai ia Kitiona, ma Parako, ma Samasoni, ma Iefata, ma Tavita, ma Samuelu, ma le au perofeta; 33o e na faatoilaloina malo i le faatuatua, na fai ai amiotonu, na maua ai mea na folafolaina, na pupuni ai gutu o leona, 34na tinei ai le malosi o le afi, na sao ai i le mata o le pelu, na faamalosia ai i latou sa vaivai, na avea ai ma fitafita i taua, na tutuli ai ‘au a nuu ese; 35na maua mai e fafine o latou tagata oti ina ua toe tu mai; na faataugaina nisi, ua le talia e i latou le olataga, ina ia maua e i latou le toe tu mai e sili ona lelei; 36na tofotofoina isi i tauemuga, ma sasaina, atoa ma noanoataga, ma tuuina i fale puipui; 37na fetogia i latou i maa, na vaevaeesea i ‘ili, na tofotofoina, na oti i latou na fasia i le pelu; na feoai solo ma oofu i pa‘u mamoe ma pa‘u oti; o mativa i latou, ma puapuagatia, ma faasaunoaina; 38(e le aoga le lalolagi ona i ai o i latou;) na feoai solo i latou i vao, ma mauga, ma ana, ma lua i le eleele. 39O i latou uma ia o e na ta‘uleleia ona o le faatuatua, na le maua e i latou le mea na folafolaina; 40ina ua saunia e le Atua se tasi mea e sili ona lelei mo i tatou, ina ia le faaatoatoaina i latou pe a le i ai i tatou.

Currently Selected:

EPERU, 11: SOV

Highlight

Copy