HAKAI, 2

O LE MATAUPU II.

Ua faamalosia le nuu i le galuega o le malumalu.

1O le fitu o masina, o le aso e lua sefulu ma le tasi i le masina, na au mai ai le afioga a Ieova e le perofeta o Hakai, o loo faapea mai, 2Ina e fai atu lava ia Serupapelu le atalii o Salatielu, le alii e pule ia Iuta, ma Iosua le atalii o Iosataka le faitaulaga sili, atoa ma e ua totoe o le nuu, ia faapea atu. 3O ai ea so outou ua toe, o le na iloa lenei fale i lona muai matagofie? Pe se a lo outou vaai nei i ai? E le ua peiseai ua leai ea i o outou manatu, pe a faatusa ma lena? 4A o lenei, ia e faamalosi o oe o Serupapelu, ua fetalai mai ai Ieova; ma ia e faamalosi o oe o Iosua le atalii o Iosataka le faitaulaga sili; ma ia faamalolosi outou tagata uma o le nuu, ua fetalai mai ai Ieova, ma ia outou galulue; auā o a‘u, ou te ia te outou, ua fetalai mai ai Ieova o ‘au. 5O le feagaiga na ou osia ma outou ina ua o mai outou nai Aikupito, atoa ma lo‘u Agaga o loo tumau ia te outou; aua le fefefe outou. 6Auā o loo faapea ona fetalai mai o Ieova o ‘au, E toe tasi, e toe itiiti lava, ona ou luluina ai lea o le lagi, ma le lalolagi, ma le sami, atoa ma le eleele matutu. 7Ou te luluina foi nuu uma; ona oo mai ai lea o mea ua manaomia e nuu uma; ou te faatumuina foi lenei fale i le pupula, ua fetalai mai ai Ieova o ‘au. 8O loo ia te au le ario, o loo ia te au foi le auro, ua fetalai mai ai Ieova o ‘au. 9E sili le mamalu o lenei fale ua mulimuli i le na muamua, ua fetalai mai ai Ieova o ‘au; ou te avatu foi le manuia i le mea nei, ua fetalai mai ai Ieova o ‘au.

10 O le aso e luafulu ma le fa, o le ivaga masina o le lua o tausaga o Tariu, na au mai ai le afioga a Ieova e le perofeta o Hakai, o loo faapea mai, 11Ua faapea ona fetalai mai o Ieova o ‘au, Fesili ia i faitaulaga i le tulafono, ia faapea, 12Afai e ave e se tasi se tufaaga paia i lona pito ofu, ona pai atu lea o lona pito ofu i se areto, po o se mea ua tunua, po o se uaina, po o se suāuu, po o se tasi mea e ‘aina, pe faapaiaina ai ea ia mea? Ona tali mai lea o faitaulaga, ua faapea mai, E leai. 13Ona fai atu lea o Hakai, Afai ua pai atu le ua leaga i le tagata oti i se mea o ia mea, pe leaga ai ea ia mea? Ona tali mai lea o faitaulaga, ua faapea, E leaga ai. 14Ona tali atu lea o Hakai, ua faapea atu, Ua faapena nei tagata, ua faapena foi lenei nuu i o‘u luma, o loo fetalai mai ai Ieova; ua faapena foi mea uma ua faia e o latou lima, o mea foi ua latou avatua iina ua leaga lava ia.

15O lenei foi, ia mafaufau lava outou, ia afua mai i lenei lava aso e oo i aso ua tuanai, a o lei faaeetia se maa i luga o le tasi maa i le malumalu o Ieova; 16e afua mai i ia ona po, na alu ane ai le tagata i le faaputugāsaito, o fuataga e luafulu, a ua i ai na o le sefulu; na alu ane le tagata i le tuugāuaina e asu ai tumu e limagafulu ai le tuugāuaina, a ua i ai na o le luafulu. 17Na ou taia outou i le mamae, ma le polopologa, ma le uato‘a, i galuega uma a outou lima; a ua outou le foi mai ia te au, ua fetalai mai ai Ieova. 18Se‘i mafaufau lava outou, ia afua mai i lenei lava aso, e oo i aso ua tuanai, o le aso e luafulu ma le fa i le ivaga masina, talu le aso na faavaeina ai le malumalu o Ieova; ina outou mafaufau ia. 19E i ai pea ea le saito i le fale saito? Ua oo foi i lenei aso ua le fua mai le vine, ma le mati, ma le rimoni, ma le olive; e amata mai i lenei lava aso ona ou faamanuia ia te outou.

20Ua oo mai foi le afioga a Ieova, o le atu lua lea, ia Hakai i le aso e luafulu ma le fa o le masina, o loo faapea mai, 21Fai atu ia Serupapelu le alii e pule ia Iuta, ia faapea atu, Ou te luluina le lagi ma le lalolagi; 22ou te fulisia le nofoālii o malo; ou te faaumatia foi le malosi o malo o nuu ese; ou te fulisia foi kariota ma ē tietie ai; e pauu solofanua ma ē tietie ai, e fegaseai i latou i a latou pelu. 23Ua fetalai mai Ieova o ‘au, O lea lava aso ou te avea ai oe la‘u auauna o Serupapelu le atalii o Salatielu, ua fetalai mai ai Ieova; ou te faia oe e pei se faamaufaailoga; auā ua ou filifilia oe, ua fetalai mai ai Ieova o a‘u.

Currently Selected:

HAKAI, 2: SOV

Highlight

Copy