KENESE, 8
8
O LE MATAUPU VIII.
Ua mavae le lolo; ua tuua le vaa e Noa ma mea ola uma.
1Ua manatua e le Atua Noa, ma mea ola uma, ma manu vaefa uma sa i le vaa ma ia. Ua faaagi atu e le Atua le matagi i le lalolagi; ona maui ai lea o le vai; 2ua punitia foi punāvai o le moana, ma pupuni o le lagi; ua taofia foi uaga mai le lagi. 3Ua maui atu le vai ai le lalolagi, ua saga mauiui lava; ua mavae aso e selau ma le limagafulu ona faaitiiti lea o le vai. 4O le fitu o masina, ma lona aso e sefulu ma le fitu, ua toa ai le vaa i luga o mauga o Ararata. 5Ua saga mauiui pea le vai ua oo i le masina e sefulu; o le aso muamua o lea masina, ua mānu ai tumutumu o mauga. 6Ua oo ina atoa o aso e fagafulu, ona tatala lea e Noa le faamalama o le vaa na ia faia; 7ua ia tuu atu ai le oreva; ua lele atu ia, ma fefoifoiai ua oo ina mate o le vai ai le laueleele. 8Ua ia tuuina atu foi le lupe nai ia te ia, ia iloa ai po ua papau le vai i le fogāeleele. 9A ua le maua e le lupe se mea e mapu ai ona vae, ona toe foi mai lea o ia ia te ia i le vaa; auā sa i ai le vai i le fogāeleele uma. Ona aapa atu lea o lona lima, ma tago i ai, ma au mai ia te ia i le vaa. 10Ona toe faatalitali lea o ia i nisi aso e fitu, ona toe tuuina atu lea e ia o le lupe ai le vaa; 11ua toe foi mai ia te ia o le lupe i le afiafi; faauta foi, o i lona gutu le lau olive mata; ona iloa ai lea e Noa ua papau le vai i le lalolagi. 12Ona toe faatalitali lea o ia i nisi aso e fitu, ona tuuina atu lea e ia o le lupe; a ua le toe foi mai lava ia ia te ia. 13Ua oo i le tausaga e ono selau ma le tasi, o le uluai masina, o le uluai aso o le masina, ua mate ai le vai i le laueleele; ona to ese lea e Noa le ufi o le vaa, ma ua vaai atu faauta foi, ua matutu le fogāeleele. 14O le masina e lua ma le aso e luafulu ma le fitu o lea masina na matutu ai le eleele.
15Ua fetalai atu le Atua ia Noa, o loo faapea atu, 16Ina ulufafo ia i le vaa, o oe, ma lau avā, ma ou atalii, ma avā a ou atalii, faatasi ma oe. 17Ina aumaia i fafo faatasi ma oe o manu uma o ia te oe, i mea ola uma, o manu felelei, ma manu vaefa, atoa ma mea fetolofi uma e fetolofi i le eleele; ina ia latou tutupu tele lava i le lalolagi, ia fanafanau ma ia uluola i le lalolagi. 18Ona ulufafo lea o Noa, ma ona atalii, ma lana avā, ma avā a ona atalii faatasi ma ia. 19Ona ulufafo lea i le vaa, o manu vaefa uma, o mea fetolofi uma, ma manu felelei uma, atoa ma mea uma e feoai i le laueleele e taitasi ma lona uiga. 20Ona faia lea e Noa o le fata faitaulaga ia Ieova; ua avea foi e ia nisi manu i manu vaefa uma e mamā, ma manu felelei uma e mamā, ua ia fai a‘i taulaga mu i le fata. 21Ua lagona foi e Ieova le manogi lelei, ona faapea ifo lea o Ieova i lona finagalo, E ui lava ina leaga o manatu o loto o tagata e afua mai ina o tama iti, ou te le toe faaoo le malaia i le laueleele ona o tagata; ou te le toe taia mea ola uma e pei ona ou faia. 22O aso uma o le lalolagi e le toe utuva ai o tausaga e lulu ai, ma tausaga e selesele ai, o le maalili foi ma le vevela, o le vaitoelau ma le vaipalolo, o le ao foi ma le po.
Currently Selected:
KENESE, 8: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
