KENESE, 4
4
O LE MATAUPU IV.
O le tala ia Kaino, ma Apelu, ma Lameko.
1Ua iloa e Atamu lana avā o Eva; ona to ai lea o ia, ona fanau mai lea e ia o Kaino, ua ia faapea ane foi, Ua ou maua le tagata mai ia Ieova. 2Ua toe fanau mai foi e ia o lona uso o Apelu. O Apelu foi, o le leoleo mamoe o ia; a o Kaino, o le galue fanua ia. 3Ua oo ina atoa o aso, ona avatu ai lea e Kaino o le fua o le fanua o le taulaga ia Ieova. 4A o Apelu, ua ia avatu foi ‘uluai tama a lona lafu, o e pepeti ai lava. Ua silasila mai Ieova ia Apelu, atoa ma lana taulaga; 5a e peitai o Kaino ma lana taulaga, ua ia le silasila i ai. Ona ita tele ai lea o Kaino, ua faaūū lava ona mata. 6Ona fetalai atu lea o Ieova ia Kaino, Se a le mea ua e ita ai? Se a foi ua faaūū ai ou mata? 7Pe afai e te amio lelei e te le maua ea le fiafia? A e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia.
8Ua fai mai foi Kaino ia Apelu lona uso, ua iai foi i laua i le fanua, ona tulai atu lea o Kaino ia Apelu lona uso, ma fasioti ia te ia. 9Ua fetalai atu Ieova ia Kaino, O fea o iai Apelu lou uso? Ona tali mai lea o ia, Ou te lei iloa; o a‘u ea le leoleo o lo‘u uso? 10Ua fetalai atu o ia, Se a le mea ua e faia? O loo alaga mai ia te au mai le eleele le leo o le toto o lou uso. 11O lenei, ua malaia oe mai le eleele, ua faamaga mai lona gutu e tali a‘i le toto o lou uso mai lou lima. 12A ē galue i le eleele, e le toe fua lelei mai ona fua ia te oe; e avea oe ma maumausolo ma faasevasevaloaina i le lalolagi. 13Ona tali mai lea o Kaino ia Ieova, Ua sili la‘u agasala, ou te le lavatia. 14Faauta, ua e tulia a‘u i le aso nei ai le fogāeleele; o le a lilo a‘u ai ou fofoga; o le a avea a‘u ma maumausolo ma faasevasevaloaina i le lalolagi; ai se maua a‘u e fasiotia a‘u e ia. 15Ua fetalai atu Ieova ia te ia, O lenei, ai se fasioti ia Kaino e tauia faafitu o ia. Ona tuuina lea e Ieova le faailoga ia Kaino, e le fasiotia o ia e se maua o ia. 16Ona alu atu lea o Kaino ai luma o Ieova, ua mau foi o ia i le nuu o Nota, i le itu i sasae o Etena. 17Na iloa e Kaino lana avā; ona to ai lea o ia, ona fanau mai lea e ia o Enoka. Ua faia e ia le aai, ua faaigoa atu foi e ia o le igoa o le aai i le igoa o lona atalii, o Enoka. 18Ua fanaua e Enoka o Irata; ua fanaua e Irata o Mekuala; ua fanaua e Mekuala o Metusaeli; ua fanaua foi e Metusaeli o Lameko. 19O Lameko foi ua fai ana avā e toalua; o le igoa o le tasi o Ata, o le igoa foi o le isi o Sela. 20Ua fanau foi e Ata o Iapalu; o le tupuga ia o e mau i faleie, ma ua fai lafu manu. 21O le igoa o lona uso o Iupalu lea; o le tupuga ia o i latou uma o e fai kitara ma faaili. 22O Sela foi na fanau e ia o Tupalu-kaino, o le tufuga ia e fai mea uma lava ua faia i ‘apa memea ma uamea; o le tuafafine foi o Tupalu-kaino o Naama lea. 23Na fai atu Lameko i ana avā, Ata ma Sela e, faalogologo mai ia i lo‘u leo; avā e a Lameko, uai mai ia o oulua taliga i la‘u upu; auā na ou fasiotia le tagata ona o lo‘u manua, o le taulealea foi ona o lo‘u fasiga; 24afai e faafitu ona tauia o se fasiga o Kaino, e faafitugafulu ma le fitu o se taui o se fasiga o Lameko.
25Ua toe iloa e Atamu lana avā; ua fanau foi e ia lana tama tane, ma ua faaigoa ia te ia o Setu; auā na faapea ia, Ua tofia mai e le Atua ia te au le tasi tama o le sui o Apelu, o le na fasiotia e Kaino. 26Ua fanaua foi e Setu lona atalii, ua faaigoa foi ia te ia, o Enosa. O ona po ia na amata ai ona valaau tagata i le suafa o Ieova.
Currently Selected:
KENESE, 4: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.