KENESE, 17

O LE MATAUPU XVII.

O le feagaiga ua faailogaina i le peritome.

1O le iva sefulu ma le iva o tausaga o Aperamo, na faaali mai ai Ieova ia Aperamo, ua faapea mai foi ia te ia, O a‘u o le Atua e o‘u le malosi uma lava; ia e savali i o‘u luma, ma ia sao lau amio. 2Ta te osia le feagaiga ma oe, ou te matuā faatoateleina lava au fanau. 3Ona faapaū fao lea o Aperamo; ona fetalai mai lea o le Atua ia te ia, ua faapea mai, 4O a‘u nei, ou te fai atu, faauta, o ia te i taua le feagaiga, e fai foi oe ma tupuga o nuu e tele. 5E le toe valaauina lou igoa o Aperamo, a o le a igoa oe o Aperaamo, auā ua ou faia oe ma tupuga o nuu e tele. 6Ou te matuā faauluolaina oe, ou te faia oe ma tupuga o nuu; e tupuga mai foi ia te oe o tupu. 7Ou te faatumauina foi o la ta feagaiga ma oe, ma lau fanau, i a latou tupulaga, pe a mavae atu oe, e fai ma feagaiga e faavavau; ia fai a‘u ma Atua ia te oe ma au fanau pe a mavae atu oe. 8Ou te foai foi ia te oe, ma au fanau, pe a mavae atu oe, o le nuu o loo e āumau ai, o le nuu uma lava lea o Kanana, e fai mo latou e faavavau; e fai foi a‘u mo latou Atua. 9Ua fetalai mai foi le Atua ia Aperaamo, A o oe, ia e tausi i la ta feagaiga, o oe, ma lau fanau, i a latou tupulaga, pe a mavae atu oe. 10O la tatou feagaiga lenei ma onutou, atoa ma lau fanau, pe a mavae atu oe, tou te tausia; e peritomeina tane uma o ia te outou. 11Tou te peritomeina foi pa‘u o outou tino, e fai ai foi ma faailoga o la tatou feagaiga ma outou. 12O le ua valu ona po o ia te outou ia peritomeina ia, o tane uma i a outou auga tupulaga; o le ua fanau i le aiga, ma le ua faatauina mai i tupe i tagata ese uma lava, e le o sau fanau ia. 13Ia peritomeina lava o le ua fanau i lou aiga, ma le ua faatauina i au tupe; e i o outou tino la tatou feagaiga o le feagaiga e faavavau. 14A o le tane foi ua le peritomeina, o le ua le peritomeina i le pa‘u o lona tino e vavaeeseina lea tagata i lona nuu; ua tuumavaega ia i le feagaiga.

15Ua faapea mai foi le Atua ia Aperaamo, O Sarai lau avā, aua e te toe valaauia lona igoa o Sarai, a o Sara o lona igoa lea. 16Ou te faamanuia foi ia te ia, ma ou foaiina atu foi se atalii mo oe mai ia te ia; ou te faamanuia lava ia te ia, e fai foi o ia ma tupuga o nuu; e tupuga mai foi ia te ia o tupu o nuu. 17Ona faapaū fao lea o Aperaamo, ua ‘ata‘ata, ma faapea ifo i lona loto, E fanau mai ea se atalii i le tagata ua selau ona tausaga? O Sara foi e fanau ea ia ua iva sefulu ona tausaga? 18Ua faapea atu foi Aperaamo i le Atua, E, ou te manao ia ola Isamaeli i ou luma! 19Ua fetalai mai le Atua, E moni lava, e fanau mai sou atalii ia Sara lau avā, e te faaigoa foi ia te ia o Isaako; ou te faatumauina foi la ma feagaiga ma ia, atoa ma ana fanau, pe a mavae atu o ia, o le feagaiga e faavavau. 20I le ma Isamaeli foi, ua ou faalogo ai ia te oe; faauta, ua ou faamanuia ia te ia, ou te faauluola ia te ia, ou te matuā faatoateleina lava; e fanaua foi e ia o alii e toasefulu ma le toalua; ou te fai foi o ia ma tupuga o le nuu tele. 21A e peitai o la‘u feagaiga ou te faatumauina lea ia Isaako, o le a fanau mai e Sara ia te oe i le faapenei lava i le tausaga atali. 22Ua faaiu foi e ia o la la tautalaga ma ia, ona afio ae lea o le Atua nai ia Aperaamo. 23Ona tago lea e Aperaamo i lona atalii o Isamaeli, ma i latou uma na fananau i lona aiga, atoa ma i latou uma na faatauina i ana tupe, o tane uma lava i le aiga o Aperaamo, ma ua peritomeina e ia o pa‘u o latou tino i lea lava aso, e pei ona fetalai mai ai le Atua ia te ia. 24O le iva sefulu ma le iva o tausaga o Aperaamo na peritomeina ai o ia i le pa‘u o lona tino. 25A ua sefulu ma le tolu tausaga o lona atalii o Isamaeli ina ua peritomeina ai o ia i le pa‘u o lona tino. 26O lea lava aso e tasi na peritomeina ai Aperaamo ma lona atalii o Isamaeli; 27o tane uma foi i lona aiga, e na fananau mai i le aiga, atoa ma e na faatauina i tupe i tagata ese, na peritomeina i latou faatasi ma ia.

Currently Selected:

KENESE, 17: SOV

Highlight

Copy