KENESE, 14

O LE MATAUPU XIV.

O le taua o tupu, ma tala ia Mekisateko.

1O ona po o Amarafilo le tupu o Senara, o Arioka le tupu o Alasara, o Kitalaoma le tupu o Elama, ma Titalu le tupu o nuu; 2na latou sii atu ai le taua ia Pira le tupu o Sotoma, ma Piresa le tupu o Komoro, ma Senapo le tupu o Atama, ma Semepo le tupu o Sepoima, atoa ma le tupu o Pala, o Soara lea. 3Ua faapotopoto i latou nei uma i le vanu o Setima, o le sami oona lea. 4E sefulu ma le lua o tausaga sa nofo pologa ai i latou ia Kitalaoma, ua oo i le tausaga e sefulu ma le tolu ona latou fou ai lea. 5O lea tausaga foi e sefulu ma le fa ua o mai ai Kitalaoma, ma tupu sa ‘au faatasi ma ia, ma latou fafasi i tagata o sa Rafā i Aserota Karenaima, ma tagata Susema i Hamo, ma tagata Emema i Save Kiriataima, 6ma sa Horī i lo latou mauga o Seira, e oo atu i Eleparana, e latalata lea i le vao. 7Ua latou toe foi mai, ua oo i Enemisipata, o Katesa lea, ma latou fafasi i le nuu uma o sa Amalekā, atoa foi ma sa Amorī sa nonofo i Haseso Tamara. 8Ua o atu foi le tupu o Sotoma, ma le tupu o Komoro, ma le tupu o Atama, ma le tupu o Sepoima, ma le tupu o Pala, o Soara lea; ma latou tau ai le taua ma i latou i le vanu o Setima; 9o i latou, o Kitalaoma le tupu o Elama, ma Titalu le tupu o nuu, ma Amarafilo le tupu o Senara, ma Arioka le tupu o Alasara; o tupu na e toafa ma ia tupu e toalima. 10Sa i ai foi i le vanu o Setima o lua o pulu emeri e tele lava; na sosola foi le tupu o Sotoma ma le tupu o Komoro ma pauu i lea mea; a o e na totoe ua sosola i latou i le mauga. 11Ona latou vetea lea o oloa uma o Sotoma ma Komoro, atoa ma a latou mea e ‘ai uma, ona o ai lea o i latou. 12Ua latou avea foi Lota le atalii o le uso o Aperamo, atoa ma ana oloa, o ia foi sa nofo i Sotoma, ona o ai lea o i latou. 13Ua alu atu foi le tasi na sao ma ta‘uatua ia Aperamo le Eperu, o lē sa mau i aluna o Mamere o sa Amorī, o le uso o Esekolo, o le uso foi o Aneri; o i latou na osi feagaiga ma Aperamo. 14Ua faalogo Aperamo ua avea lona uso i le taua, ona saunia lea e ia ona tagata ua a‘oa‘oina, e na fananau i lona aiga, e toatolu selau ma le toasefulu ma le toavalu, ma ua tuliloa ia te i latou e oo i Tanu. 15Ua ia tofia foi o ‘au a ona tagata i le po e tau ma i latou, ua fafasi foi ia te i latou, ma tuli muliau ia te i latou ua oo i Hopa, e i le itu tauagavale lea o Tamaseko. 16Ua toe maua mai foi e ia o le oloa uma lava; ua ia toe maua mai foi Lota lona uso, ma aua oloa, o fafine foi, atoa ma le nuu. 17Ua alu atu foi le tupu o Sotoma e faafetaiai ia te ia i le vanu o Savee, e ta‘ua foi lea o le vanu o le tupu, ina ua toe foi mai i le taua ma Kitalaoma, ma tupu sa ‘au faatasi ma ia. 18A o Mekisateko le tupu o Salema ua avane e ia areto ma uaina; o le faitaulaga foi o ia a le Atua silisili ese. 19Ua ia faamanuia foi ia te ia, ua faapea atu, Ia manuia Aperamo i le Atua silisili ese, e ona le lagi ma le lalologi; 20ia faafetaia foi le Atua silisili ese, o le na tuuina mai ou fili i ou lima. Ua foai atu foi e Aperamo ia te ia o mea e sefulu a‘i o mea uma. 21Ua fai mai foi le tupu o Sotoma ia Aperamo, Tuu mai ia ia te au o tagata, a e ave ma oe le oloa. 22A ua tali atu Aperamo i le tupu o Sotoma, Ua sii lo‘u lima ia Ieova, le Atua silisili ese, e ona le lagi ma le lalolagi, 23ou te le avea lava sina manoa po o sina nonoa seevae, ou te le avea lava sina mea i au mea uma, ina ne‘i faapea a oe, Ua mauoa Aperamo ia te au. 24Tau lava o mea ua uma ona aai e taulelea, ma vaegāoloa a tagata na matou o ma a‘u, o Aneri, ma Esekolo, ma Mamere, ia latou ave a latou vaegāoloa.

Currently Selected:

KENESE, 14: SOV

Highlight

Copy