ESETA, 5
5
O LE MATAUPU V.
O le tausamiga na saunia e Eseta; o le ita o Hamanu ia Moretekai.
1Ua oo i le aso tolu, ona ofu ai lea o Eseta i ofu o le masiofo, ma tu atu i le lotoā o le fale o le tupu, o le lotoā i totonu i luma o le fale o le tupu, o loo nofo mai le tupu i le nofoālii o le tupu i le fale o le tupu, ua feagai ma le faitotoa o le fale. 2Ua iloa mai e le tupu o le masiofo o Eseta o loo tu atu i le lotoā, ona alofaina, lea o ia e ia; ua faaloaloa mai foi e le tupu lona tootoo auro na i ai i lona lima ia Eseta; ona faalatalata atu ai lea o Eseta, ma pai atu i le iu o le tootoo. 3Ona fai mai lea o le tupu ia te ia, Le masiofo e, Eseta, se a ea lou manao? Se a le mea e te faatoga mai ai? E oo lava i le vaeluaina o le malo e avatua lava ia te oe. 4Ona tali atu lea o Eseta, Afai e lelei i le tupu, ia maliu atu le tupu ma Hamanu, i le asō, i le tautega ua ou saunia mo ia. 5Ona fai mai lea o le tupu, Ia faavave ia Hamanu ina ia fai le mea a Eseta. Ona ō lea o le tupu ma Hamanu i le taumafataga na saunia o Eseta.
6Ona fai mai lea o le tupu ia Eseta i le taumafataga o le uaina, Se a le mea e te fai mai ai? E avatua lava ia te oe; pe se a foi le mea e te faatoga mai ai? E oo lava i le vaeluagalemu o le malo e faia lava. 7Ona tali atu lea o Eseta, ua faapea atu, O le mea ou te ole atu ai, ma faatoga atu ai o lenei; 8afai ua alofaina a‘u e le tupu, afai foi e lelei i le tupu ona faia le mea ou te faatoga atu ai, ma ia faia le mea ou te manao i ai, ina toe afio mai ia le tupu ma Hamanu i le tautega ou te saunia mo i laua, ona ou faia lea taeao e pei ona fetalai mai ai o le tupu.
9Ona alu atu lea o Hamanu i lena aso ma le olioli ma le loto fiafia; a ua vaai atu Hamanu ia Moretekai i le faitotoa o le tupu, ua le tulai, ua le faaaloalo foi ia te ia, ona tele ai lea o le ita o Hamanu ia Moretekai. 10A ua oono Hamanu; ua alu atu foi i lona fale, ma na aauina atu nisi e amia ana uo, ma Seresa lana avā. 11Ona faamatalaina atu lea e Hamanu ia te i latou o le mamalu o lona tamaoaiga, ma le toatele o ana fanau, ma mea uma ua faasilisiliina ai o ia e le tupu, ma ona ua faaeaina ai o ia ia sili i alii ma auauna a le tupu. 12Ua fai atu foi Hamanu, Sa le mafai foi le masiofo o Eseta ona alu atu se isi faatasi ma le tupu i le taumafataga na ia saunia, na o a‘u lava. Ua fai mai foi ia te au e alu ia te ia a taeao faatasi ma le tupu. 13A e peitai e le aoga lava ia te au o ia mea uma i aso uma ou te vaai atu ai ia Moretekai o lo sa Iutā o loo nofo i le faitotoa o le tupu. 14Ona fai atu ai lea ia te ia o Seresa lana avā, ma ana uo uma, Ia saunia se laau, ia limagafulu kupita lona maualuga, ma ia e fai atu i le tupu i le taeao, ia faatautauina ai Moretekai; ona e alu ai lea ma le fiafia faatasi ma le tupu i le taumafataga. Ua lelei lena upu ia Hamanu; ona ia faia lea o le laau.
Currently Selected:
ESETA, 5: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
