EFESO, 2
2
O LE MATAUPU II.
O le faaolaina o tagata nai le agasala.
1O outoufoi lava o e na oti i amio leaga ma agasala, 2na outou savavali ai anamua, e tusa ma le tu a lenei lalolagi, e tusa ma le ta‘ita‘i o le au faipule i le va nimonimo, o le agaga lea o loo matuā galue nei i e ua faalogogata; 3o i tatou foi, na amio faatasi i tatou uma lava ma i latou anamua, ina ua tatou nonofo i tu‘inanau o tatou tino, na faia foi e i tatou o mea na loto i ai le tino atoa ma le mafaufau, na fanau mai foi i tatou o le fanauga a le toasa, faapei o isi atoa foi. 4A o le Atua, ua i ai le faulai o le alofa, ona o lona lava alofa tele na ia alofa mai ai ia i tatou, 5a o oti lava i tatou i amio leaga, ua na faaola mai ia i tatou faatasi ma Keriso; (o le alofa tunoa ua faaolaina ai outou;) 6ua na toe faatutū faatasi mai foi, ma faanonofo faatasi i tatou ma Keriso Iesu i mea o i le lagi; 7ina ia faaalia i tupulaga atali le silisili ese o le faulai o lona alofa tunoa, i le agalelei mai ia te i tatou, ia Keriso Iesu. 8Auā o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; 9e le ona o galuega, ina ne‘i mitamita se tasi. 10Auā o lana lava galuega i tatou, na faia i tatou ia Keriso Iesu, ina ia faia galuega lelei, na saunia anamua e le Atua, ina ia tatou savavali ai.
11O lenei, ia outou manatu, sa faapaupau outou anamua i la le tino, ua ta‘ua outou o e le peritomeina e i latou o e ua ta‘ua ua peritomeina i le tino, ua faia e lima; 12o ona po ia sa le i ai ia te outou Keriso, sa tagata ese outou i le sauniga o le malo o Isaraelu, o tagata ese foi i feagaiga ua i ai le mea na folafolaina, sa leai so outou faamoemoe, sa aunoa foi ma le Atua i le lalolagi. 13A o ona po nei, ona o Keriso Iesu, o outou sa vava mamao anamua ua faalatalataina mai ai i le toto o Keriso. 14Auā o ia tatou te lelei ai, ua na faia ia tasi e sa faalua, na na sŏloia foi le pa vaeloto sa vaeluaina ai; 15ua ia faaumatia foi i lona lava tino le feitagai, o le tulafono lea i poloaiga i upu faasino; ina ia liliu e ia lava lea toalua ia fai ma tagata fou e tasi, ia tupu ai le filemu; 16ma ia faaleleia ma le Atua ē sa toalua, i le tino e tasi, ona o le satauro, ina ua faaumatia ai le feitagai. 17Na maliu mai foi o ia, e folafola mai le tala lelei o le leleiga ia te outou sa vava mamao, atoa ma e ua latalata. 18Auā ua faatau maua e i tatou uma ona o ia o le ta‘ita‘iga i le Tamā, e le Agaga e toatasi. 19O lenei, e le toe tagata ese outou, po o e ua āumau, a ua nuu faatasi ma le au paia, o le aiga foi o le Atua; 20o loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea; 21ua faatatauina ia te ia le fale atoa, o loo alu ae, ina ia fai ma malumalu paia i le Alii; 22o outou foi ua atiina ae faatasi outou ia te ia e le Agaga, e fai ma afioaga o le Atua.
Currently Selected:
EFESO, 2: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
