AMOSA, 1
1
O LE MATAUPUI.
O le toasa o le Atua ia Suria ma isi nuu.
1O upu a Amosa o le na i ai i le au fagamanu i Tikoa, na ia iloa ai ia Isaraelu, i ona po o Usia le tupu o Iuta, o ona po foi o Ierepoamo le atalii o Ioasa, le tupu o Isaraelu; e lua tausaga na va a‘i lea mea i le oo mai le mafuie. 2Ua ia faapea mai, E leo tele mai Ieova mai Siona, e tŭlei ifo foi lona siufofoga mai Ierusalema; e faanoanoa foi mea e tataa ai manu a e fagamanu, e mago foi le tumutumu o Karamelu. 3O loo faapea mai Ieova, E tolu agasala a Tamaseko, e fa foi, ou te le liliu ese ai lana sala; auā na latou solia ia Kiliata i uamea e soli ai saito. 4A e ou te tuuina atu le afi i le fale o Asaeli, e faaumatia ai foi maota o Peniata. 5Ou te gauia foi le faamaufaalava o Tamaseko, ou te faaumatia le ua mau i le vanu o Avene, atoa ma le ua ‘u‘u le tootoo i Pete-etena; e tāfea foi le nuu o Suria i Kira, o loo fetalai mai ai Ieova.
6O loo faapea mai Ieova, E tolu agasala a Kasa, e fa foi, ou te le liliu ese ai lana sala; auā na latou faatāfeaina le tafeaga atoatoa ia tuuina atu ai i Etoma. 7A e ou te tuuina atu le afi i le pa o Kasa, e faaumatia ai ona maota. 8Ou te faaumatia foi le ua mau i Asetota, ma le ua ‘u‘u le tootoo i Asekelona; ou te liliu atu lo‘u lima i Ekerona, e fano e ua totoe o Filisitia, o loo o fetalai mai ai le Alii o Ieova. 9O loo faapea mai Ieova, E tolu agasala a Turo, e fa foi, ou te le liliu ese ai lana sala; auā na latou tuuina atu le tafeaga atoatoa i Etoma, mona ua le manatua le feagaiga a uso. 10A e ou te tuuina atu le afi i le pa o Turo, e faaumatia ai ona maota.
11O loo faapea mai Ieova, E tolu agasala a Etoma, e fa foi, ou te le liliu ese ai lana sala; auā na ia tuliloa i le pelu lona uso, na ia le alofa lava, na saei pea lava lona ita; na ia tausi pea lava lona ita tele. 12A e ou te tuuina atu le afi i Timanu, e faaumatia ai maota o Posara. 13O loo faapea mai Ieova, E tolu agasala a le fanauga a Amoni, e fa foi, ou te le liliu ese ai lana sala; auā na latou faatiau i fafine totō i Kiliata, ina ia faateleina e i latou lo latou laueleele. 14A e ou te tŭtŭ se afi i le pa o Rapa, e faaumatia ai ma le alaga ona maota, i le aso e tau ai le taua, ma le afā i le aso e i ai le asiosio. 15E alu i le tafeaga Malekama, o ia atoa ma alii ua ia te ia faatasi ma ia, o loo fetalai mai ai Ieova.
Currently Selected:
AMOSA, 1: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
