GALUEGA, 27

O LE MATAUPU XXVII.

O le folauga a Paulo i Roma.

1Ua tuu ina a folau atu i matou i Italia, ona latou tuuina atu lea o Paulo ma isi tagata o fusifusia i le ta‘ita‘i o le toaselau, o Iulio le igoa, o i le ‘au a Aokuso. 2Ona o ae lea o i matou i le vaa Atamutiu, ma tuuvaa atu, a folau ane i nuu o Asia; sa faatasi foi ma i matou o Aritako le Maketonia mai Tesalonia. 3O le taeao foi ua o ae ai i uta i matou i Saitonu. Ua agalelei mai foi Iulio ia Paulo, ma tuu atu ia te ia e alu i ana uo e tali i o latou alofa mai. 4Ua tuuvaa atu ai foi, ma matou folau faatafatafa ane i Kuperu, ina ua matagi vale. 5Ua uma ona folau i le vasa faa-Kilikia, ma faa-Pafulia, ona oo lea o i matou i Mura, o i Lukia. 6Ua maua ai foi e le ta‘ita‘i o le toaselau le vaa Alesania o le a folau atu i Italia; ua na tuu atu i ai i matou. 7Ua telegese ona matou folau ua tele aso, na fai a le oo i matou i gatai o Nitoi, ina ua le mafai i le matagi, ona matou folau atu lea i Kereta, i gatai o Salamone; 8se manū a le tuuna lea i tua, ona matou oo lea i le mea e igoa i Ava matagofie; e latalata i ai le aai o Lasea. 9Ua uma aso e tele, ma ua oo i ona po e afatia ai folauga, ua mavae foi po o le anapogi, ona apoapoai atu lea o Paulo ia te i latou, 10ua faapea atu Alii e, o lo‘u manatu o le a tele le leaga ma māumau o mea i lenei folauga, e le gata i le uta ma le vaa, a e atoa ma o tatou ola. 11A ua usiusitai le ta‘ita‘i o le toaselau i le tautai ma le alii e ona le vaa, a e lei usiusitai i upu a Paulo, 12Ua le lelei foi le taulaga e nonofo ai vaa i le tausaga e afā ai, ona fai mai lea o le manatu o le toatele e tuuvaa atu ai, ma taumafai pe oo i Foinie e nofo ai i le tausaga e afā ai; o le taulaga lea i Kereta, e feagai ma sisifo i le itu i toga, e feagai foi ma sisifo i le itu i matu. 13Ua agi mālie mai foi le toga, fa te i latou ua maua lo latou manatu, ona tuuvaa lea, ma folau ane e latalata i Kereta. 14Ua le pipine ona pesi mai ai o le afā tetele, o Eurokuto le igoa. 15Ua avea le vaa, ma ua le mafai ona faasaga i le matāmatagi, ona matou tuu atu ai lea, ma ua lelea. 16Ua lelea faatafatafa ane i le tasi motu itiiti, o Kalauta le igoa, na fai a le mafai ona mautaofi e i matou i le tulula; 17ua sisi ai i luga e i latou; ona fai lea e i latou ni togafiti, ma saisai ifo le vaa; ua fefefe foi ne‘i lafoia i le oneone feaveai, ona latou tuu ifo lea o mea i luga o le fanā, ona lelea ai lea. 18Ua matuā felafoaiina i matou i le afā, ona lafoai lea e i latou i le taeao le uta; 19o le aso tolu ua matou lafoai ai i o matou lava lima le vao mea na i le vaa. 20Ua tele aso o le iloa ai le la po o fetu, ma ua to ifo le afā tele ia i matou, ona iu lea ina aveesea uma lava o lo matou faamoemoe i le ola.

21Ua leva foi le le manatu i mea e ‘ai, ona tu atu lea o Paulo ia i latou, ua fai atu, Alii e, ua tatau pe ana outou usiusitai mai ia te au, ma le le tuuvaa mai i Kereta, ona le mativa ai lea o outou i lenei leaga ma nei mea ua māumau. 22O lenei foi, ou te apoapoai atu ia te outou ia outou faamalosi; auā e leai so outou ola e māumau, na o le vaa. 23Auā sa tu mai ia te au anapo le agelu a le Atua, e ona a‘u, ou te auauna i ai, ua faapea mai, 24Paulo e, aua e te fefe; e tatau ona e tu i luma o Kaisara; faauta foi, ua foai atu e le Atua ia te oe o i latou uma ua folau ma oe. 25O lenei, alii e, ia outou faamalosi; auā ou te talitonu i le Atua, o le a faapea lava pei ona fetalai mai ai ia te au. 26A e ao ina lafoia o i tatou i le tasi motu. 27Ua oo foi i le sefulu ma le fa o po, o loo felafoaiina i matou i le vasa Ateria, o le tulua o po ua masalo ai tautai ua latou faalatalata atu i se nuu; 28ona fuatia ifo lea, ua iloa ai ua luafulu gafa; ua faaitiiti atu, ona toe fuatia ifo lea, ua iloa ai ua sefulu ma le lima gafa. 29Ona fefefe lea ne‘i lafoia i se gaoā, ona lafo ifo lea e i latou i taula e fa i le taumuli, ma ua tatalo i latou ina ia ao. 30Ua manatu le auvaa e sosola ese i le vaa, ma ua tuuina ifo le tulula i le sami, peiseai a latou ave ifo ni taula i le taumua; 31ua fai atu Paulo i le ta‘ita‘i o le toaselau ma tagata tau, Afai e le tumau i latou na i le vaa, e le mafai ona faaolaina o outou. 32Ona vavae ese lea e tagata tau o maea o le tulula, ua tuu atu ia tafea.

33A o lei oo i le ao, ua aioi atu ai Paulo ia te i latou uma e aai, ua faapea atu, O le sefulu ma le fa lenei o aso ua outou faatalitali ai ma le le manatunatu lava i mea e ‘ai, ua le aai foi sina mea. 34O le mea lea ou te aioi atu ai ina ia outou aai; auā e aoga lea tou te ola ai; auā e leai se lauulu o outou ulu e paū. 35Ua fai atu ia upu, ona tago lea o ia i le areto, ma faafetai atu i le Atua i luma o i latou uma, ona totofi lea e ia, ma afua ona ‘ai. 36Ona faamalosi ai lea o i latou uma lava, ona aai ai lea o i latou. 37E toalua selau ma le toafitugafulu ma le toaono tagata, o i matou uma lava e na i le vaa. 38Ua maoona i le mea e ‘ai, ona latou faamāmā lea i le vaa, ua lafo ifo le saito i le sami.

39Ua ao, ona le iloa lea e i latou le igoa o le nuu; a ua latou iloa atu le tasi faga oneone, ua latou manatu, pe mafai ona faaoso i ai o le vaa. 40Ona latou sala ese lea o taula, ma tu atu i le sami, ma tatala fusi o foeuli, ua sisi le la taumua i le matagi, ma faasaga i le matāfaga. 41Ua lafoai foi i le totolo oneone, ona to‘a ai lea o le vaa, ona pipii mau lea o le taumua, ma ua mausali lava; a ua malepe le taumuli i le malosi o le galu. 42Ua pule tagata tau ia fasiotia e ua fusifusia, ne‘i aau atu se tasi ma sola. 43A ua lote le ta‘ita‘i o le toaselau e faaola ia Paulo, ua vavao atu ai e ia la latou pule; ma ua fai atu i e ua iloa feausi e muai feosofi ifo, ma o atu i uta; 44a o e totoe, o isi i luga o laupapa, ma nisi i luga o mea sa i le vaa. Ua iu ina sao uma atu ai i uta.

Currently Selected:

GALUEGA, 27: SOV

Highlight

Copy