GALUEGA, 25
25
O LE MATAUPU XXV.
O le molia o Paulo i luma o Feso.
1Ua oo foi Feso i lona itu malo, ua mavae aso e tolu, ona alu ae lea o ia nai Kaisareia i Ierusalema. 2Ona faailoa atu lea ia te ia e le faitaulaga sili ma alii o Iutaia ia Paulo, ua ole atu foi i latou ia te ia, 3ma latou aioi ia alofa mai i mea o ia Paulo, ia aami atu ia te ia e sau i Ierusalema; o lamalama i latou e fasioti ia te ia i le ala. 4A ua tali mai Feso, e leoleoina Paulo i Kaisareia, a o ia, e le pine ona alu atu i ai. 5Ua na fai atu foi, Ia o ifo ni o outou alii, ma latou molia lenei tagata, pe afai o i ai se mea. 6Ua nofo foi o ia ia te i latou i aso e sefulu ma ona tupu, ona alu ifo lea i Kaisareia; o le taeao ua nofo ai o ia i le nofoa faamasino, ma fai atu ia ta‘ita‘iina mai Paulo. 7Ua oo mai o ia, ona vagavagai ai lea o Iutaia o e na o mai i Ierusalema, ua molia Paulo i mea e tele ma le mamafa, ua latou le mafaia ona faamaoni. 8Ua faatonu e ia ia ia, ua faapea atu, Ua ou le agasala lava i le tulafono o Iutaia, po o le malumalu, po o Kaisara. 9A o Feso, ua loto o ia e faafiafia atu i tagata Iutaia, ua fai mai ai o ia ia Paulo, ua faapea mai, Ua e loto ea ina e alu ae i Ierusalema, ia faamasinoina ai oe i nei mea i o‘u luma? 10Ona fai atu lea o Paulo, O loo tuu nei a‘u i luma o le nofoa faamasino o Kaisara, e tatau ona faamasinoina ai o a‘u; ua ou le faia lava se mea le tonu ia Iutaia, ua e matuā silafia lava. 11Auā afai ua ou amioleaga, po ua ou faia se mea e tatau ona ou oti ai, ou te le musu lava ina ou oti; a e afai e le moni se tasi o ia mea ua latou molia ai a‘u, e le mafaia ona tuuina atu o a‘u e se tasi ia te i latou. Ou te valaau ia Kaisara. 12Ua fetautalatalai Feso ma ē pule, ona tali mai lea o ia, Ua e valaau ea ia Kaisara? e te alu lava ia Kaisara.
13Ua mavae isi aso, ona o mai lea o le tupu o Akeripa ma Perenike i Kaisareia e fealofani ma Feso. 14Ua tele aso o nonofo ai i laua, ona faailoa atu lea e Feso i le tupu le tala ia Paulo, na faapea atu, Ua tuu e Filiki le tasi tagata o fusifusia; 15sa a‘u i Ierusalema foi, na faailoa mai ai e le au faitaulaga sili ma le au toeaina o Iutaia, sa faatoga mai foi ia faasala ia te ia. 16Ona ou tali atu ai lea ia te i latou, E le o le tu lea a Roma e tuu atu se tasi tagata ia oti, seia fesagai le ua molia ma e na momoli ia te ia, ma ia faitalia o ia ona faatonu mai o le mea ua molia ai o ia. 17Ua oo mai foi i latou iinei, ua ou le faatuai lava, ua ou nofo i le taeao i le nofoa faamasino, ma fai atu ia ta‘ita‘iina mai le tagata. 18Na tutū mai e na molia o ia, ua le molimau mai e i latou se tasi o ia mea na ou manatu i ai; 19a ua molia o ia e i latou i nisi suega i la latou tapuaiga, ma le tasi tagata e igoa ia Iesu, ua oti, ua fai mai Paulo ua ola o ia. 20Na ou masalo pe faapefea le suega i lea mea, ona ou fesili atu lea, po ua loto o ia ina alu atu i Ierusalema, ia faamasinoina ai o ia i ia mea. 21Ona valaau atu lea o Paulo ia taofia o ia ina ia faamasinoina e Aokuso; ona ou fai atu lea ia leoleoina o ia, seia ou auina atu o ia ia Kaisara. 22Ona fai mai lea o Akeripa ia Feso, Ou te fia faalogo atu foi a‘u i lena tagata. Ua fai atu o ia, A taeao e te faafofoga ai ia te ia.
23O le taeao foi, ua oo mai ai Akeripa ma Perenike, ma le faalialia tele, ua ulufale i le mea e faalogo ai, atoa ma alii e pule i ‘au, ma alii o le aai, ona fai atu lea o Feso, ona ta‘ita‘iina mai ai lea o Paulo. 24Ona fai atu lea o Feso, Le tupu e Akeripa, atoa ma outou alii uma o tatou o faatasi nei, ua outou silasila i lenei tagata, ua aioi mai ai ia te au le nuu uma o Iutaia i Ierusalema, atoa foi ma iinei, ua alalaga mai e le tatau ona toe ola o ia. 25A o a‘u ou te le iloa se mea ua na faia e tatau ai le oti, ua valaau foi e ia nei lava ia Aokuso, ua ou manatu ai e momoli atu ia te ia. 26Ua leai foi se mea ua ou mautinoa ia te ia e tusi atu ai i le alii. O le mea lea ua ou ta‘ita‘i mai ai ia te ia i o outou luma, amaise oe na le tupu o Akeripa, ina ia ou maua se mea e tusi atu ai, pe a uma ona faamasinoina. 27Auā o lo‘u manatu e le tusa ona momoli atu o se tagata o fusifusia, a e le faailoa atu o mea ua ta‘ua ia te ia.
Currently Selected:
GALUEGA, 25: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
