GALUEGA, 23

O LE MATAUPU XXIII.

O le faamasinoina o Paulo; o le lamalama mai o Iutaia ia te ia.

1Ona matuā vaai lea o Paulo i le fono, ua faapea atu, Le au uso e, ua ou matuā faia la‘u amio i luma o le Atua ma le loto fuatia ifo e lelei, ua oo mai lava i le aso nei. 2Ona fai mai lea o le faitaulaga sili o Anania i e ua tutū ane ia po atu i lona gutu. 3Ona fai atu lea o Paulo ia te ia, O oe na le pa faasinasinaina; o le a po atu le Atua ia te oe; e te nofo ea e faamasino mai ia te au e tusa ma le tulafono, a ua e soli tulafono i lou fai ane ia po mai ia te au? 4A ua fai mai e ua tutū ane, Ua e faifai ea i le faitaulaga sili a le Atua? 5Ona fai atu lea o Paulo, Le au uso e, ou te lei iloa o ia o le faitaulaga sili; auā ua tusia, Aua e te upu leaga i le alii o lou nuu. 6Ua iloa foi e Paulo o satukaio nisi o i latou, a o faresaio nisi, ona alaga lea o ia i le fono, Sema e, le au uso e, o a‘u nei o le faresaio, o le atalii o le faresaio; o le faamoemoe i le toe tu mai o e ua oti ua faamasinoina ai a‘u. 7Ua fai atu e ia lena upu, ona tupu ai lea o le fefinauai i le au faresaio ma le au satukaio; ona vaeluaina lea o le faapotopotoga. 8Auā e faapea le au satukaio, e leai se toe tu mai, e leai foi se agelu, po o se agaga; a ua taofi e le au faresaio i mea uma e lua. 9Ua tupu foi le pisapisao tele; ona tutū i luga lea o le au tusiupu o le vaega o le au faresaio, ua matuā finafinau atu, ua faapea atu, Matou te le iloa se leaga i lenei tagata; a e afai ua tautala mai se agaga, po o se agelu ia te ia, soia tatou te fai taua i le Atua. 10Ua tele lava le fefinauai, ua fefe foi le alii e pule i ‘au ne‘i fesaeiaiina Paulo e i latou, ua fai atu o ia i le ‘au tau e ō ifo, ma toso mai ia te ia nai ia i latou, ma ta‘ita‘i mai i le ‘olo. 11Ua oo i le po, ona tu mai ai lea o le Alii ia te ia, ua faapea mai, Paulo e, ina faalototele ia oe; auā e pei ona e molitino i mea ia te au i Ierusalema, e tusa foi ona faapea ona e molimau i Roma.

12Ua ou, ona ‘au faatasi lea o isi Iutaia ua tuufeaugani i latou, ua faapea, latou te le aai pe feinu seia latou fasioti ia Paulo. 13Ua toafagafulu ma ona tupu o i latou na ‘au faatasi i lenei augani. 14Ua o atu i latou i faitaulaga sili ma toeaina, ua fai atu, Ua tuufeaugani i matou i le anatema, matou te le aai lava i sina mea seia matou fasioti ia Paulo. 15O lenei, ia faailoa atu e outou atoa ma le fono i le alii e pule i ‘au, ina ia ta‘ita‘i ifo o ia ia te ia taeao ia te outou, peiseai a outou matuā suesue i mea ia te ia; a o i matou, ua sauniuni i matou e fasioti ia te ia, a o lei latalata o ia. 16Ua lagona e le tama a le tuafafine o Paulo le lamalamaina, ona alu atu lea o ia, ua ulufale i le ‘olo, ma ta‘u atu ia Paulo. 17Ona valaau lea e Paulo i se ta‘ita‘i o toaselau, ua fai atu i ai, Ta‘ita‘i atu ia lenei taulealea i le alii e pule i ‘au; auā ua ia te ia se mea e ta‘u atu ia te ia. 18Ona ave lea o ia ia te ia, ua ta‘ita‘i atu i le alii e pule i ‘au, ua faapea atu, Na valaau mai ia te au e Paulo le ua fusifusia, ua aioi mai ou te ta‘ita‘i mai lenei taulealea ia te oe. 19Ona tago lea o le alii e pule i ‘au i lona lima, ua o ane na o i laua, ma fesili atu, Se a sau mea e ta‘u mai ia te au? 20Ua fai mai o ia, Ua ‘au faatasi tagata Iutaia e faatoga atu ia te oe ina ia e ta‘ita‘i ifo taeao ia Paulo i le fono, peiseai a latou matuā suesue se tasi mea ia te ia. 21A e aua e te usiusitai atu ia te i latou; auā o loo lamalama mai ia te ia o latou tagata e toafagafulu ma ona tupu, ua tuufeaugani i latou, latou te le aai pe feinu seia uma ona latou fasioti ia te ia; ua sauniuni nei foi i latou, ma ua faatalitali mai i sau fetalaiga. 22Ona tuu atu lea e le alii e pule i ‘au i le taulealea, ua fai atu ia te ia, Soia e te fai atu i se tagata lava ua e faailoa mai nei mea ia te au. 23Ua valaau atu foi o ia i ni ta‘ita‘i o toaselau e toalua, ua fai atu, Ina sauni ia le ‘au tau e toalua selau, e ō i Kaisareia, ma ē tietie i solofanua e toafitugafulu, ma ē fai tao e toalua selau, 24i le itu po e tolu; ia sauni foi manu ia latou faatietie ai ia Paulo, ma avatu ia te ia ia saogalemu atu i le alii o Filiki. 25Ua ia tusi le tusi, ua faapea le upu ua tusia, 26O a‘u o Kalaotio Lusia, o loo ou alofa atu i le alii silisili o Filiki. 27Na puea lena tagata e Iutaia, na fai a fasiotia e i latou; ona ou tulai atu lea ma le ‘au tau, ma laveai ia te ia, na ou iloa o le Roma o ia. 28Ua ou fia iloa le mea na molia ai o ia e i latou, ona ou ta‘ita‘i ifo lea ia te ia i la latou fono; 29ona ou iloa lea o suega i la latou tulafono na molia ai o ia; a ua leai lava se mea na molia e tatau ona oti ai, pe fusifusia ai o ia. 30Ua faailoa mai foi ia te au o le a oo le pule a Iutaia i le tagata, ona ou auina atu loa lea o ia ia te oe, ma poloai atu i e na ta‘ua mai ia te ia e ta‘u atu i ou luma ana mea. Ia e manuia.

31Ona ave lea e le ‘au tau ia Paulo, pei ona poloaiina mai ai o i latou, ua momoli atu ia te ia i le po i Anipateri. 32O le taeao, ua foi mai ai i latou i le ‘olo ua tuua e o tietie i solofanua ia o atu i latou ma ia. 33Ua latou oo i Kaisareia, ona avatu lea o le tusi i le alii, ua tuu atu foi ma Paulo ia te ia. 34Ua faitau e le alii, ona fesili mai lea po o fea lona nuu. Ua iloa ai foi mai Kilikia o ia; ona fai mai lea o ia, 35Ou te faalogologo atu ia te oe pe a oo mai e na molia oe. Ona fai atu lea ia leoleoina o ia i le maota o Herota.

Currently Selected:

GALUEGA, 23: SOV

Highlight

Copy