I. TIMOTEO, 6
6
O LE MATAUPU VI.
O pologa ma matai. Ua vaoia le matapeapea.
1O pologa uma o e o i lalo o le amo, ia latou manatu e tatau ona ava lava i o latou lava matai, ina ne‘i upuleagaina le suafa o le Atua ma lana mataupu. 2A o i latou ua i ai matai faatuatua, aua ne‘i latou ta‘ufaatauvaaina i latou, auā o uso i latou; a ia atili ona auauna i ai, auā ua faatuatua ma ua alofaina i latou e ua talia le galuega lelei. Ia e a‘oa‘o atu ma apoapoai atu i ia mea. 3Afai e a‘oa‘o ese se tasi, ma le le gauai i upu e ola ai a lo tatou Alii o Iesu Keriso, ma le mataupu e tatau ma le amio Atua, 4ua faafefeteina o ia, ua le iloa se mea, a ua se ma‘i lona suesue ma lona finau i upu e tupu mai ai le mataua, ma le misa, ma faifaiga, ma masalosalo leaga, 5o finauvalega o tagata loto leaga, o e ua tetea ma le upu moni, o e ua manatu o le mea e maua ai le oloa o le amio Atua lea; ia e ‘alo ese i tagata faapea. 6A o le amio Atua ma le loto mălie, o le oloa tele lava lea. 7Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea. 8Afai ua maua e i tatou o mea e aai ai ma mea e oofu ai, ia gata ai o tatou manao. 9A o e manao i le fia mauoa, e maua i latou i le faaosoosoga, ma le mailei, ma tu‘inanau e tele e valea ai ma leaga ai, o mea ia e goto ai tagata i le fanoga ma le malaia. 10Auā o le manao i tupe, o le pogai lea o mea leaga uma lava; ua mananao tele i ai nisi, ona sese ai lava lea o i latou i le upu o le faatuatua, ua tu‘ia ai ua ati i latou e i latou i puapuaga e tele. 11A o oe, le tagata o le Atua e, ia e sola ese i ia mea; a ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu. 12Ia e tau le taua lelei i la le faatuatua, tago atu ia i le ola faavavau, na valaauina ai foi oe, ma ua e ta‘utino atu i le ta‘utinoga lelei i luma o molimau e toatele. 13Ou te fai atu lava ia te oe i luma o le Atua, o lē faaola i mea uma, i luma foi o Keriso Iesu, o le na molimau i le ta‘utinoga lelei ia Ponotio Pilato, 14ia e taofi lenei poloaiga ma le le ponā, ma ia le mata‘uleagaina, seia oo atu i le faaali mai o lo tatou Alii o Iesu Keriso. 15E faailoa mai lea mea e ia i ona lava aso, o ia o le Alii e manuia mona ua toatasi, o le Tupu o tupu, ma le Alii o alii; 16o loo na o ia o lē soifua pea lava, o lē afio i le malamalama e le masao i ai se tasi; e lei vaaia o ia e se tasi tagata, e le mafai foi ona vaai i ai; ia ia te ia le viiga ma le malosi e faavavau. Amene.
17Ia e matuā fai atu i e mauoa i lenei olaga, aua ne‘i faamaualuluga i latou, aua foi le faatuatua i le oloa e faaletumau, a o le Atua soifua, o loo foai tele mai ia i tatou mea uma lava e faafiafia ai; 18ina ia latou agalelei atu, ia tamaoaiga i galuega lelei, ia mataalofa, ia latou avatu fua a latou mea, 19ia latou teua oloa mo i latou lava, o le faavae lelei mo aso atali, ina ia latou fetagofi atu i le ola e faavavau.
20Timoteo e, ia e tausi i le mea na tuuina atu ia te oe, ma ‘alo‘alo ese i upu leaga ma le le aoga, ma finauga i mea ua igoa pepelo ai o le poto; 21o isi o e na taofi ai, ua sese ai i latou i le upu o le faatuatua. Ia ia te oe le alofa tunoa. Amene.
Currently Selected:
I. TIMOTEO, 6: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
