I. KORINITO, 9
9
O LE MATAUPU IX.
Ia alofaina le ua fai le galuega a le Atua.
1Ou te le se aposetolo ea? ou te le se sa‘oloto ea? ou te lei vaaia ea Iesu Keriso lo tatou Alii? e le o la‘u galuega ea outou i le Alii? 2Tuu ia nisi tagata, ou te se aposetolo lava ia te outou; auā o le faamaufaailoga outou o lo‘u aposetolo i le Alii. 3O la‘u lena tali i e faamasino mai ia te au. 4E le o la matou faitalia ea ona aai ma inu? 5E le o la matou faitalia ea, pe matou te feaveai se tuafafine o le avā, pei o aposetolo uma, ma uso o le Alii, ma Kefa? 6Pe na o i maua ma Panapa, e le sa ma faitalia ea ona tuu o galuega faaletino? 7O ai ea sē alu i le taua, a e le tauia o ia? O ai ea se na te faia se tovine, a e le ‘ai i ona fua? Po o ai ea se na te leoleoina se lafu mamoe, a e le ‘ai i le suāsusu o le lafu? 8Ou te fai atu ea nei mea i upu a tagata? e le o fai mai foi ea le tulafono nei mea? 9auā ua tusia i le tulafono a Mose, Aua e te fusi le gutu o le povi a o solisolia e ia saito. 10O povi ea e manatu i ai le Atua? po ua na le fetalaia mai ea ona o i tatou lava? Ona o i tatou foi ua tusia mai ai, auā e tatau i le na te suatia le eleele, ia suatia ma le faamoemoe, o lē solisolia foi saito, ia solisolia ma le faamoemoe, ina ia maua le mea ua faamoemoe i ai. 11Afai ua matou lulu atu mā outou mea faaleagaga, o le mea tele ea pe a matou selesele mai a outou mea faaletino? 12A pule isi ia te outou, e le sili ea ona pule o i matou? A e le faia e i matou lena pule; a ua matou oono i mea uma, ina ne‘i matou tuuina atu se mea e faalavelave ai le tala lelei ia Keriso. 13Tou te le iloa ea, o e galulue i mea paia latou te aai i mea mai le malumalu? o e auauna i le fata faitaulaga ua latou tofu i tufaaga faatasi ma le fata. 14Ua faapea foi le poloaiga a le Alii i e folafola le tala lelei e maua mea a le tino i le tala‘iga o le tala lelei. 15A ou te le faia se mea e tasi o na mea, ou te le tusi atu foi nei mea ina ia faapea ona fai ia te au; auā e lelei ina ou oti, a e leaga ina faaleaogaina e se tasi lo‘u mitamita. 16Auā afai ou te folafola le tala lelei, e le se mea lea ou te mitamita ai, auā ua leai sa‘u faitalia i lea mea; oi talofa foi ia te au, pe a ou le folafolaina le tala lelei. 17Aua afai ou te faia lenei mea ma le loto, ua ia te au le taui; peitai ane, a ou le faia ma le loto, ua tuuina mai ia te au e fai ma auauna tausi mea. 18O lenei, se a ea lo‘u taui? O lenei, pe a ou folafolaina atu le tala lelei, ia ou avatu le tala lelei a Keriso ma le le tauia mai; ina ia ou le faia la‘u pule i le tala lelei. 19Auā e ui ina ou sa‘oloto mai tagata uma, ua faapologaina a‘u e a‘u mo tagata uma, ina ia atili ai ona toatele ou te maua. 20Sa ou faapei o se Iutaia ia Iutaia, ina ia ou maua ni Iutaia; ua ou faapei o sē nofo i le tulafono i e nonofo i le tulafono, ina ia ou maua ni e nonofo i le tulafono; 21ua ou faapei o sē le nofo i le tulafono i e ua le nofo i le tulafono, (e le ona ua ou le nofo i le tulafono i le Atua, a ua ou nofo i le tulafono ia Keriso,) ina ia ou maua ni e ua le nofo i le tulafono. 22Ua ou faapei o sē vaivai i e ua vaivai, ina ia ou maua e ua vaivai; ua avea a‘u ma mea uma mo tagata uma, ina ia iu lava ina ola nisi ia te au. 23Ou te faia foi le mea nei ona o le tala lelei, ina ia tatou tofutofusia faatasi ma a‘u. 24Tou te le iloa ea, o e tausinio i le ala tanu, e tausinio uma i latou, a e maua le taui e le toatasi? Ia faapea ona outou tausinio, ina ia outou maua. 25O i latou uma o e fai aigofie e fai faatatau i mea uma lava; o i latou foi ua latou faapea ina ia maua le pale palagofie, a o i tatou, ina ia maua le pale e le pala lava. 26O a‘u nei foi, ua faapea ona ou momo‘e e le ma le faaletonu; ua faapea ona ou tu‘i, e le pei o se tu‘i le matagi. 27A ou te faatoilaloina lo‘u nei tino, ma a‘u fai ai ma pologa, ina ne‘i iu ina le faamaoni a‘u, o a‘u sa tala‘i atu i isi tagata.
Currently Selected:
I. KORINITO, 9: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
