I. KORINITO, 11
11
O LE MATAUPU XI.
O le pulouina o fafine i le lotu. O le tu o le faamanatuga.
1Ia outou faaa‘oa‘o mai ia te au, pei o a‘u ia Keriso.
2Le au uso e, ou te vivii atu ia te outou, ina ua outou manatua mai a‘u i mea uma, ma outou taofi mau poloaiga, pei ona ou tuuina atu ai ia te outou. 3A ou te loto ina ia outou iloa, o le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea. 4Ai se tane e tatalo pe perofeta ma lona ulu ua ufiufitia, ua faalemigao ia i lona ulu. 5Ai se fafine foi e tatalo pe perofeta ma lona ulu e le ufiufitia, ua faalemigao ia i lona lava ulu; auā o le mea e tasi lava lea ma le tafi o lona lauulu. 6Auā a le ufiufitia le fafine ia sele mamā lona lauulu; a e afai o le mea e masiasi ai ona sele mamā pe tafi, ia ufiufitia lava ia. 7Auā e le tatau i le tane ona ufiufitia e ia lona ulu, auā ua foliga o ia i le Atua, ma lē e viia ai o ia; a o le fafine o ia lē e viia ai le tane. 8Auā e le mai le fafine le tane, a o le fafine, mai le tane ia. 9Auā foi na le faia le tane ona o le fafine, a o le fafine ona o le tane. 10O le mea lea e tatau ai i le fafine ina ia i ai le ufiufi i lona ulu, ona o agelu. 11A e ui lava ina faapea, e leai se tane pe a le o i ai le fafine, e leai foi es fafine pe a le o i ai le tane, i le Alii; 12auā pei ona tupu mai o le fafine mai le tane, e faapea foi le tane i le fafine; a o mea uma lava mai le Atua ia. 13Ina manatunatu ifo ia outou, pe tatau ona tatalo o le fafine i le Atua ma le le ufiufitia. 14E le a‘oa‘o mai ea le mafaufau ia te outou, a uumi le lauulu o le tane, o le mea lava lea e mā ai o ia? 15A e afai e uumi le lauulu o le fafine, o le mea lea e viia ai o ia; auā ua foai mai lona lauulu e fai ma ufiufi ia te ia. 16A e afai e fia finau se tasi, e leai se tu faapea ia i matou, e leai foi i ekalesia a le Atua.
17A ou te le vivii atu ia te outou i le mea ou te fai atu ai nei, ona ua le iu i se lelei la outou faapotopoto, a e iu i le leaga. 18Auā e muamua lea, ua logo mai ia te au, pe a potopoto outou i le ekalesia, ua ia te outou maseiga; ua ou taofi foi e moni nisi mea; 19auā e ao ina tupu o fevaevaeaiga ia te outou, ina ia faaalia o e ua faamaoni o ia te outou. 20O lenei, pe a potopoto outou i le mea e tasi, e le faapea outou ina ia outou aai i le talisuaga a le Alii. 21Auā a aai, ua taitoatasi ma muai fai lana lava talisuaga; ua laina le tasi, ua mālie le tasi. 22E leai ea lava ni o outou fale tou te aai ai ma inu ai? po ua faatauvaa ea ia te outou le ekalesia a le Atua, ma outou faamāina e ua matitiva? Se a ea se upu ou te fai atu ai ia te outou? Ou te vivii atu ea ia te outou i lena mea? Ou te le vivii lava.
23O a‘u foi, na ou maua mai le Alii le mea na ou tuuina atu ai ia te outou. O lea lava po na faalataina ai le Alii o Iesu, na ia tago ai le areto, 24ua ia faafetai, ona tofitofi ai lea, ma fai atu, Ina tago ia, ina aai; o lo‘u tino lenei ua tofitofi ma sui o outou, ia outou faia lenei mea ma faamanatuga ia te au. 25Ua ia faapea foi i le ipu ina ua uma ona aai, ua faapea atu, O le ipu lenei o le feagaiga fou lea i lo‘u toto; ia outou faia lenei mea ma faamanatuga ia te au i aso uma tou te feinu ai. 26Auā o aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seia afio mai o ia. 27O lenei, ai sē ‘ai i lenei areto, pe inu i le ipu a le Alii ma le faaletatau, e nofo sala o ia i le tino ma le toto o le Alii. 28A ia suesue ifo le tagata ia te ia, i le ‘ai ai o ia i lenei areto, ma inu i lenei ipu. 29Auā o lē ai ma inu faaletatau ua ‘ai o ia ma inu i lona lava faasala, ina ua le faautauta o ia i le tino o le Alii. 30O le mea lea ua mamai ai ma vaivai ai ni o outou e toatele, ma nisi e toatele ua latou momoe. 31Auā afai ana tatou faamasino ia te i tatou, po ua le faasalaina i tatou. 32A ua aoaiina i tatou e le Alii ina ua faasalaina, ina ne‘i matuā faasalaina i tatou faatasi ma le lalolagi. 33O lenei, o‘u uso e, pe a outou faapotopoto e aai, ia faatalitali outou le tasi i le tasi; 34afai foi e fia ‘ai se tasi, ina ‘ai ia i lona lava fale; ina ne‘i avea la outou potopotoga ma mea e faasalaina ai outou. O mea o totoe ou te faatonu i ai pe a ou alu atu.
Currently Selected:
I. KORINITO, 11: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
