Matayo 11
11
Johana Mubatizi unahuma anafunzie kwa Jeso
(Luka 7:18-35)
1Jeso ariphomarigiza kwapʼa anafunzie kumi na airi malagizo gago, wauka achendafunza, na kusumurira midzi ya phephi-phephi.
2Johana Mubatizi wakala u jela ukati uo, na ariphosikira nguma dzulu ya gokala ganahendwa ni yiye Kʼirisito, wamuhumira udzumbe na anafunzie 3akamuuze kukala, “Uwe ukale ndiwe yeambwa undakudza, hebu hulolere mutʼu munjine?” 4Ndo achenda aratʼu anafunzi, na ariphokwendamuuza, Jeso waamba, “Endani mukamwambire Johana gaga mugasikirago, na mugaonago. 5#Isa 35:5, 6; Isa 61:1Atʼu otsʼiona, anaphozwa hata anaona, vigurye anaphozwa hata anenenda chividzo, a mahana anatakaswa, na atʼu otsʼisikira, anaphozwa hata anasikira. Atʼu a kufa nao anafufulwa, na achiya anasumurirwa Nguma Mbidzo. 6Kwa vivyo, baha mutʼu yetsʼiricha kunikuluphira!”
7Ndo phokala anafunzi a Johana anauya, Jeso waanza kugomba na riro duu ra atʼu dzulu ya Johana. Yiye waauza vivi, “Muriphokwenda kwa Johana kuko nyika, mwakala munahenza mukaone ani? Mwakala munahenza mukaone mutʼu wa kuyumbiswa-yumbiswa dza lunyasi lulazwavyo ni pʼeho? 8Hʼaya kwadze mwakwenda? Mukale mwakala mudzikwendalola mutʼu yekala udzidzivalira nguwoze mbidzo? Sirikisani, atʼu avalao nguwo mbidzo, asagala madzumbani mwa afalume! 9Ndo sambi nambirani, kwadze mwakwenda? Mukale mwakala mudzikwendalola mugomvi wa Mulungu? Ni jeri, na bee ninamwambira mino kukala, yiye Johana yekwendamona kuko, uchira mugomvi wa Mulungu. 10#Mal 3:1Yiye Johana ndiye ahadzwaye mumo Maandikoni ga Mulungu gaambago,
‘Sirikisa, ninahuma mudzumbe wangu akulongolere,
akakutsengere njirayo.’ ”
11Jeso achimarigiza na kwamba, “Ninamwambira jeri, kati ya binadamu osi, kʼakuna mubomu kumurima Johana Mubatizi. Ela hata vivyo, ariye ni mudide kamare Ufalumeni kwa Mulungu, ni mubomu kumurima yiye Johana. 12#Luk 16:16Kulaira ukati Johana Mubatizi ariphoanza kurisumurira neno ra Mulungu na kubatiza hata vivi, Ufalume wa Mulungu unahehwa muno, na atʼu ai anahenza ausise. 13Maana, mafunzo gosi ga agomvi a Mulungu na Shariya ya Musa vyasema chimbere dzulu ya kudza kwa uo Ufalume wa Mulungu hata Johana achidza. 14#Mal 4:5; Mat 17:10-13; Mar 9:11-13Na muchikala munakuluphira maneno gogombwa chimbere ni agomvi a Mulungu kukala, Eliya undauya amutsengere Masihi njiraye, bee mundakuluphira kukala Johana unagachimiza. 15Musikizi naasikire!
16“Ela nindaahwalanisha atʼu ano na chitʼu chani? Atʼu aa anga dza tʼadi ya anache asegereo cheteni virundu viri, chila chirundu chichambwa ni chinjine, 17‘Hudzimupigira ngoma, ela kʼamuvinire! Hukamupigira musego, ela kʼamuririre!’ 18Maana, Johana wakudza, achifunga na kʼanirwe hata divai, ela ao ákala achimwamba, ‘Una pʼepʼo!’ 19Nichidza mimi Mutʼu yelaa dzulu. Mimi tsʼifungire na nichinwa hata divai, ela ao ananamba, ‘Muloleni mutʼu yuno, una mutsare, na ni munwadzi, na asenae ni atosi a kodi, na atʼu anjine otsʼiriwa!’ Ela hata vivyo, hekima ya Mulungu yinaonyeswa kukala ni ya jeri ni mahendo ga atʼu osi ayikubalio.”
Jeso unaakanya atʼu otsʼitya
(Luka 10:13-16)
20Jeso ariphomala kugomba dzulu ya gago, waanza kwalaumu atʼu a midzi yiyo, hata aripho wahenda vilinge vinji mumo, ela ao kʼaatyire vivyo. 21#Isa 23:1-18; Ezek 26:1-28:26; Joel 3:4-8; Amo 1:9, 10; Zak 9:2-4Yiye waamba, “Mundamanya enye mwimwi achina Korazini! Mundamanya enye mwimwi achina Betisaida! Maana, kala vivyo vilinge vyohendwa kwenu, bee vyahendwa midzi ya Tʼiro na Sidoni, atʼu a kuko angari ávala kare mavalo ga magunia na kusagala ivuni, konyesa kukala adzetya. 22Ninamwambira mino, Mulungu undamutiya akili vikali mwimwi tsʼiku ya ulamuli kuchira ao achina Tʼiro na Sidoni. 23#Isa 14:13-15; Mwa 19:24-28Na mwimwi achina Kaparinaumu, munaona enye mundaunulwa dzulu mulunguni? Ngʼo! Mundatsuphwa kuzimu! Mana, kakala vivyo vilinge vyovihenda kwenu bee, návihenda Sodoma, achina kuko angari átya, na uo mudzi ungari ucheriko hata rero. 24#Mat 10:15; Luk 10:12Ndo ninamwambira mino, tsʼiku ya ulamuli yichifika, Mulungu undamutiya akili vikali mwimwi kuchira yiyatʼu yondahewa achina Sodoma.”
Jeso unamulavira mumvera Mulungu
(Luka 10:21-22)
25Jeso ariphomarigiza gaga kwalaumu atʼu otsʼitya, wavoya vivi, “Baba, uriye u Bwana wa mbingu na dunia, ninakulavira mumvera, kwakukala, gaga udzigafitsa atʼu adzonao ana hekima na anamanya, na udzigafunulira atʼu ario dza anache adide. 26Ni chividzo Baba, kwakukala, vivyo ndivyo urivyohenza.”
27 #
Joh 3:35;
Joh 1:18; 10:15 Chisha achiaamba atʼu vivi, “Baba waika gosi mwangu mikononi. Kʼakuna animanyaye mimi Mwana ni ani atsʼiphokala yiye Baba Mulungu, na hebu kʼakuna amumanyaye yiye Baba Mulungu atsʼiphokala mimi Mwanawe, na yeyosi ariye ninahenza kumungʼazira yiye Baba. 28Nzoni kwangu mosi odzitsoka na mumerererwao ni mizigo mibomu, nami nindamuusira mizigo yenu. 29#Jer 6:16Mimi ni murumwengu, na ninavumirira chila mutʼu. Ndo kubalini mafunzo gangu, na mutuwe ujeri niufunzao, Na mwimwi mundakala na reri mwenu marohoni. 30Maana, mafunzo gangu nimufunzago bee tsʼi makomu, na hata gaga nimwambago muhende nago, kʼagayuga.”
Currently Selected:
Matayo 11: CHIDUR
Highlight
Share
Copy
Want to have your highlights saved across all your devices? Sign up or sign in
