Luka 8

Achetʼu omutuwa Jeso

1Gariphochira gago tu, Jeso waahula na kati-kati ya midzi na vidzidzi, achisumurira Nguma Mbidzo ya Ufalume wa Mulungu. Aratʼu anafunzie kumi na airi ákwenda osini, 2#Mat 27:55, 56; Mar 15:40, 41; Luk 23:49na chisha achetʼu anjine nao okala Jeso udzialavya pʼepʼo ai na kwaphoza makongo, ákwenda nao. Ao ni ano Maryamu (muchina Magidala), yelaviwa pʼepʼo ai afungahe, 3Joana, mukaza Kuza muhendikazi mubomu wa Herode, Suzana na anjine anji. Ao achetʼu ákala achimuhikirahikira Jeso na ao anafunzie miyo yao enye.

Tʼadi ya mutsanga udzo na mutsanga ui

(Matayo 13:1-9; Mariko 4:1-9)

4Atʼu áenderera kudza kwa Jeso kulaa chila mudzi, na atʼu anji ariphorundikana Jeso achiaambira tʼadi yiyi: 5“Mundimwa mumwenga wakwendamwagira mbeyuze. Ariphokala unamwagira ziratʼu mbeyu, zinjine zagwa njirani, na achizi na njira achiziyaha, na nyama a kuburuka nao achidzazichotʼa. 6Zinjine zichigwa mutʼu mokala muna mawe, na ziriphomera, zichinyauka kwakukala, mutsanga wa mumo wakala kʼauna chinemi. 7Zinjine za zizo zagwa kati-kati ya mizi ya mihi ya miya, yiyo mizi yichifundula na yichikula phamwenga na yiyo mimera, na yichiyigwira yiyo mimera. 8Na zinjine zichigwa phenye mutsanga udzo, zichimera, zichikula na zichivyala mavuno manji muno.” Ndo kumarigiza Jeso achiamba, “Musikizi naasikire!”

Lengo ra kufunza chitʼadi

(Matayo 13:10-17; Mariko 4:10-12)

9Jeso wauzwa ni anafunzie lengo ra yiyo tʼadi, 10#Isa 6:9naye achiamba, “Mwimwi mwajaliwa kumanya njama za Ufalume wa Mulungu, ela ao anjine kʼaajaliwirwe hata aambirwa chitʼadi, kwa hata

‘Akaona atsʼimanye nini,

na hata akasikira, chisha atsʼelewe.’ ”

Jeso unangʼaza tʼadi ya mutsanga udzo na mutsanga ui

(Matayo 13:18-23; Mariko 4:13-20)

11Jeso waamba, “Yiyi ndiyo maana ya tʼadi yiyi: mbeyu ni neno ra Mulungu. 12Muratʼu njirani mogwa mbeyu fulani, ni mufano wa aratʼu atʼu arisikirao riro neno, chidzako Shetani akadza, na akarilavya mwao myoyoni kwa hata atsʼidze akakuluphira, na phapho akaokoka. 13Mura mutʼu mokala muna mawe mogwa zinjine, munaonyesa aratʼu atʼu ario achisikira neno ra Mulungu, anariphokera na raha. Ela kwahivira anga dza mumo mutʼu mwenye mawe, neno kʼariaphenya mwao myoyoni: anakuluphira kwa tsʼiku chʼachʼe tu, na achijezwa nikuuya nyuma. 14Himura mwenye mizi ya mihi ya miya, ni mufano wa aratʼu atʼu arisikirao riro neno ela achiuka tu, phapho kare nikukala chimoyomoyo, akaphenywa ni chipherephere cha miyo na mazagazi ga raha, na ndo hata kʼaakomala chiroho. 15Na muratʼu mwenye mutsanga udzo, ni mufano wa aratʼu atʼu arisikirao riri neno, akariika moyoni, na kurituwa jeri-jeri, na ao nikuvumirira hata akakomala chiroho.”

Taa rofinikʼirwa

(Mariko 4:21-25)

16 # Mat 5:15; Luk 11:33 Jeso waenderera kwaambira chitʼadi. Yiye waamba, “Atʼu kʼaasha taa na akarifinikʼira na daba, hebu akariika muvunguni. Ela, ariika dzulu-dzulu kwa hata atʼu aphenyao ndani aone. 17#Mat 10:26; Luk 12:2Maana, chochosi chofitswa chindafunulwa, na chohendwa chinjama-njama, chindakudzahendeka lwazu-lwazu, na chimanywe ni anji.

18 # Mat 25:29; Luk 19:26 “Ndo dzimanyirireni na gaga mugasirikisago, mana, yuyatʼu amanyaye kare undakaza kungʼazirwa amanye manji muno, ela yetsʼimanya na kʼenzi kumanya, undakaza kufimbirwa.”

Ameye na nduguze Jeso a chilume

(Matayo 12:46-50; Mariko 3:31-35)

19Ndo phapho ameye na nduguze a chilume achidza, ela kʼaaidimire kumufikira phephi, mana, atʼu ákala ni anji. 20Ndo Jeso achambirwa kukala, “Ameyo na nduguzo a chilume a kuko konze anahenza akone.” 21Ela Jeso yiye achiaamba vivi ao atʼu, “Mayo na enehu a chilume ni aratʼu asikirao neno ra Mulungu na akarigwira.”

Jeso unarichemera vuto rihurire

(Matayo 8:23-27; Mariko 4:35-41)

22Tsʼiku mwenga, Jeso waphenya mashuwani phamwenga na anafunzie achiaamba, “Nahuvukeni ziya hwendeni ngʼambo ya phiri.” Ndo hinyo achanza charo. 23Phokala a mumo mashuwani anenda, Jeso wanyekererwa ni usingizi achilala. Vuto bomu richanza kuvuma, na madzi gachanza kuphenya mumo mashuwani na achikala a maengaengani. 24Aratʼu anafunzi achendamulamusa Jeso na kuno anamwamba, “Bwana, Bwana! Hunahoha!” Jeso achilamuka, achirichemera riro vuto na gago maimbi manji, nako kuchihurira, kuchikala zizizi. 25Chisha achiaamba, “Hʼaya ri lwaphi kuluphiro renu?” Ela ao achikala adzangalala hata achisala kwambana, “Ni ani yuno, ariye hata unaramba vuto na maimbi gahurire, nago ganamogopha jeri?”

Jeso unamuphoza mutʼu wa mapepo

(Matayo 8:28-34; Mariko 5:1-20)

26Jeso na anafunzie ákwenderera na charo hata achifika itsʼi ya Agerasa, ngʼambo ya ziya, yodzilolana na jimbo ra Galilaya. 27Jeso aripholaa mumo mashuwani tu, mutʼu mumwenga yekala una mapepo kulaa phapho achenda kwakwe. Mutʼu yiye wakala uhenda tsʼiku nyinji kʼavala nguwo, na kʼasagala mudzini hata usagala mabirani. 28-29Gago mapepo gákala ukati unji nikumulokera, na kwa vivyo, wakala achirindwa na chisha kuno ufungwa minyororo ya magulu na pʼingu mikononi. Ela yiye wakala achilokerwa ni higo mapepo, unayitosa yiyo minyororo, na azivunze zizo pʼingu, na ndo akaziswe ni higo mapepo hata nyika. Ndo Jeso achigachemera gago mapepo gamulae yiye mutʼu. Yiye mutʼu achidzibitʼa mbereze achigomba kwa laka ra dzulu achiamba, “Unamini uwe Jeso Mwana wa Mulungu Ariye Dzulu kuchira osi? Ninakuvoya utsʼiniturise!” 30Phapho Jeso achimuuza achimwamba, “Kwani we dzinaro ndiwe ani?” Yiye achiudzidza achiamba, “Ndimi Jeshi.” Na wasema dzina riro, mana, pʼepʼo anji ákala adzimupagaa. 31Ao pʼepʼo achimulombera Jeso atsʼialavye kwa mutʼu yiye na kwendayaya bopʼo rotsʼisika.

32Kwakala kuna duu bomu ra nguluwe a kufuga okala anarisa jemajema ra mwango. Ndo ao pʼepʼo achimulombera Jeso aahenzeze akaaphenye ao nguluwe, naye achiahenzeza. 33Phapho ao pʼepʼo achimulaa yiye mutʼu, achendaaphenya riro duu rosi ra nguluwe, na richivoromoka ziyani achihoha. 34Arisa a ao nguluwe ariphoona gago, ákaza mairo achendaambira atʼu nguma zizo kuko midzini na mindani. 35Atʼu achidza mairo kudzalola godzilairira. Achenda hata kokala Jeso, achendamona, na yiye mutʼu yekala udzimulavya pʼepʼo wakala usegere phephi naye uvala nguwo, na akilize zidziuyatʼo kamare. Atʼu phapho achogopha muno. 36Aratʼu atʼu arioona maneno gago gachihendeka, áambira atʼu anjine jisi mutʼu yiye ariyepagaiwa ni mapepo arivyophozwa ni Jeso. 37Chisha, atʼu osi a jimbo ra Agerasa áphenywa ni woga muno, na achimuvoya Jeso auke phapho. Jeso naye hata kʼasitire, achiphenya kahiri mashuwani kuuya Galilaya. 38Yiye mutʼu yekala ulaiwa ni pʼepʼo wamuvoya Jeso ende osi. Ela Jeso kʼamuhenzezere, itsʼiphokala wamwamba, 39“Uya mudzini ukaseme higo maneno mabomu godzihenderwa ni Mulungu.” Ndo yiye mutʼu achenda achitara-tara chila phatʼu mudzi uo gago maneno mabomu gokala uhenderwa ni Jeso.

Jeso unamuphoza muchetʼu wa muruwo

(Matayo 9:18-22; Mariko 5:21-34)

40Jeso ariphouya ngʼambo ya ziya kahiri, atʼu anji ámutsangira kwakukala, osi ákala anamutariza. 41Ndo mutʼu mumwenga aihiwaye Jairo yekala ni mubomu wa sinagogi achidza. Jairo achimitʼa mavindi mbere za Jeso, achimuvoya ende kwakwe mudzini, 42kwakukala, mwanawe mumwenga tu, wa chiche wa myaka kumi na miiri, wakala ni mukongo yupwi.

Jeso phokala unenda, atʼu ákala anamufyeha kosi-kosi. 43Ndo phákala phana muchetʼu mumwenga kati ya riro duu ra atʼu yekala ugaya na ukongo wa muruwo myaka kumi na miri, na#8:43 Nakala zinjine zinaonjeza: hata aripho wakala umala miyoye yosi kwa aganga, ela... kʼakuna hata mumwenga yeidima kumuphoza. 44Ndo muchetʼu yiye achimutuwa Jeso nyuma, achikumba mutse wa valore, na kuruwakwe kuchituma phapho kare. 45Jeso phapho achiuza achiamba, “Ni ani yedzinikumba?” Osi achiamba kukala kʼakuna mutʼu yekala udzimukumba, chisha Pʼetero yiye achiamba, “Mwalimu, wuzadze vivyo nawe hata u kati-kati ya duu ra atʼu na anakufyeha?” 46Ela Jeso yiye achiamba, “Ni vivyo, ela phana mutʼu udzinikumba, mana, ninasikira mukotse wangu udzinilaa.” 47Yiye muchetʼu ariphoona kukala kʼaidima kudzifitsa, wadzilavya mwenye na kuno unatetema kwa woga,#8:47 Chishariya, vyakala muchetʼu achikala una ukongo wa muruwo, kʼahenzwa agwirikane na atʼu, hebu kukumba mutʼu kwa unaambwa una najisi. achidzitsupha mbere za Jeso, na phapho achisema mbere za osi chotuma hata amukumbe Jeso, na jisi vyokala uphozwa phapho kare. 48Jeso achimwamba, “Mayo, kuluphiroro ridzikuphoza, kwa vivyo, enda vyako na reri.”

Jeso unamufufula mwanangwa wa chiche wa Jairo

(Matayo 9:23-26; Mariko 5:35-43)

49Jeso ariphokala ucheri kugomba gago, mutʼu mumwenga kulaa mudzini kwa Jairo, yiye mubomu wa sinagogi wakudza achidzamwambira Jairo mwenye kukala, “Mwanao kuratʼu udzefa, kwa vivyo, tsʼimutsose bule yiye mwalimu!” 50Ela Jeso yiye ariphosikira gago wamwamba Jairo vivi, “Utsʼibabaike, kuluphira tu, na mwanao undaphola.” Ndo achiunuriza charo achenda vyao kuko.

51Ariphofika kuko mudzini, Jeso kʼamuhenzezere mutʼu yeyosi aphenye mumo ndani phamwenga naye, atsʼiphokala Pʼetero, Johana, Jakobo na avyazi a yiye musichana. 52Atʼu osi ákala anarira na kushononeswa ni yiye musichana. Ela Jeso achiaamba, “Tsʼirireni, mana, kʼafire yuyu hata ni urere tu!” 53Ela ao atʼu phapho achimona Jeso dza kwamba tsʼiye muzima, mana, ao ákala anamanya yiye mwanache udzefa, ela yiye unaamba urere tu. 54Ndo Jeso achimugwira mukono achiamba, “Lamuka mwanache!” 55Na phapho achiudza moyo, na achizuka phapho kare. Jeso achilagiza ahewe wari yiye mwanache. 56Avyazie achangalala, ela Jeso yiye achiaamba atsʼimwambire mutʼu yeyosi gago gokala gahendeka.

Currently Selected:

Luka 8: CHIDUR

Highlight

Copy