Luka 17

Mizizo

(Matayo 18:6-7, 21-22; Mariko 9:42-48)

1Jeso waamba anafunzie vivi, “Mahezo gandalairira gondaahenda atʼu ahende dambi, ela undamanya mwenye yiye mutʼu yendaahenda atʼu ahende dambi. 2Vingekalatʼo muno kala mutʼu yiye nikufungwa lwala lubomu lwa tsʼingo na akendatsuphwa kati-kati ya bahari, kuriko yiye kumuhenda mumwenga wa aa ario chiroho ni atsanga ariche kunikuluphira. 3#Mat 18:15Ndo dzimanyirireni! Nduguyo achikukosa mukanye, na achitya, musamehe. 4Achikukosa kʼano fungahe tsʼiku mwenga na chila achikosa unakubali kosare, musamehe vivyo.”

Kuluphiro

5Ndo anafunzie achimwamba vivi, “Bwana! Hujenge kwa hata huhende kuluphiro ra kudina.” 6Bwana Jeso naye achiaudzidza achiaamba, “Kala ngawa muna kakuluphiro hata kumba ni kadide dza mbeyu ya haradali tu, mungari kwidima kuwamba muhi uu wa muchilifi, ‘Ngʼoka ukadzitiye baharini,’ nao ungari kumogopha.”

Kazi ya muhendikazi wa Mulungu

7Chisha phapho Jeso achiamba, “Nahwambe mumwenga wenu akale una muhendikazi ariye ni muroromi wa munda, hebu murisa wa magonzi. Ndo achiuya kulaa mundani, akale nikumwamba yiye muhendikazi, ‘Nzo maruru, urye leu’? 8Ngʼo tsʼi hivyo! Itsʼiphokala undamwamba, ‘Nijitʼira leu na dzifunge nguwo zidine kwa hata unilavire leu na nirye hata nimale kurya na kunwa, ndipho nawe urye na unwe.’ 9Na yiye muhendikazi achigahenda gago, kʼawirya mumvera, kwakukala, uchimiza godzambwa. 10Ndo ni dza mwimwi namwi, muchihenda gosi goambwa, ambani, ‘Siswi hu ahendikazi tu, na hudzihenda kazi yehu.’ ”

Jeso unaaphoza atʼu kumi a mahana

11Jeso ariphokala u charoni kwenda Jerusalemu, wachira na miphaka ya Samariya na Galilaya. 12Na ariphokala unaphenya kadzidzi kamwenga, waonewa ni atʼu kumi okala ana mahana. Ao atʼu ákala aimire kure vichache, 13na achiiha kwa laka ra dzulu achiamba, “Mwalimu Jeso, hwonere mbazi.” 14#Alaw 14:1-32Jeso ariphoaona waamba, “Endani mukadzonyese kwa makuhani.” Ndo ariphokala anenda, achiphola. 15Mumwenga wao ariphoona kukala uphozwa, wauya kwa Jeso na achikala kuno unamulika Mulungu kwa laka ra dzulu. 16Achendagwa vifunefune mbere za Jeso achimulavira mumvera. Mutʼu yuyu wakala tsʼiye Muyahudi wakala ni Musamariya. 17Ndo phapho Jeso achiamba, “Odziphozwa samba ni atʼu kumi, hebu tsʼivyo? Sambi ao anjine chenda a lwaphi? 18Kʼaphana munjine yedziuya kudzamulika Mulungu hata ni yuyu mujeni hicheye tu?” 19Chisha Jeso achimwamba vivi yiye mutʼu, “Zuka wende vyako, kuluphiroro ridzikuphoza.”

Kudza kwa Ufalume wa Mulungu

(Matayo 24:23-28, 37-41)

20Ukati umwenga, Afarisayo ámuuza Jeso vivi, “Ufalume wa Mulungu undakudza rini?” Jeso naye achiaudzidza achiaamba, “Ufalume wa Mulungu kʼaudza kwa njira yonekayo. 21Hebu kʼakuna yendaidima kwamba, ‘Lola, hinyu phano,’ hebu ‘hinyura phara.’ Maana, Ufalume wa Mulungu u mwehu ndani.”

22Chisha achiaamba anafunzie vivi, “Ukati unadza urio mundaaza niuye nidze nikale namwi hata kumba ni tsʼiku mwenga mimi Mutʼu yelaa dzulu, ela kʼavindakala vivyo. 23Atʼu andamwamba, ‘Lolani hiyu phano,’ hebu ‘Hiyuya phara,’ ela mwimwi mutsʼilae, hebu mutsʼiatuwe kwendalola. 24Maana, mimi Mutʼu yelaa dzulu nichikala ninadza, nindaonewa lwazu dza viratʼu mufyu umetavyo maruru kulaa upande umwenga hata unjine. 25Ela ni seti nishononeswe muno, na niremwe ni atʼu a chivyazi chichi gachikala gago hata kʼagadzangwe kulairira. 26#Mwa 6:5-8Viratʼu atʼu arivyokala ukati wa Nuhu, ndivyo vyondakala ukati nichikala ninadza mimi Mutʼu yelaa dzulu. 27#Mwa 7:6-24Ukati wa Nuhu, atʼu áenderera kurya na kunwa, kuhwala na kuhwalwa hata ukati Nuhu ariphophenya safinani. Muvo wa madzi uriphokudza, uchidzaahosa atʼu osi. 28#Mwa 18:20-19:25Na vindakala dza vyolairira ukati wa Lutu. Ukati wa Lutu atʼu áenderera kurya na kunwa, kugula na kuguza, kuphanda na kujenga. 29Ela tsʼiku yiyatʼu Lutu ariphouka mudzi wa Sodoma, moho unji uchidza dza mvula kulaa mulunguni, na uchiahangamiza osi. 30Vivyo ndivyo vyondakala tsʼiku yiyo mimi Mutʼu yelaa dzulu phondalairira.

31 # Mat 24:17, 18; Mar 13:15, 16 “Tsʼiku yiyo mutʼu yendakala u dzulu ya nyumba, achitserera naatsʼiphenye nyumbani kuhwala miyoye. Hali dza yiyo, yendakala u kwakwe mundani, naatsʼiuye mudzini. 32#Mwa 19:26Galilikaneni gomupata mukaza Lutu. 33#Mat 10:39; 16:25; Mar 8:35; Luk 9:24; Joh 12:25Yeyosi adzonaye unaidima kugativya maishage mwenye photsʼi mimi, unazinza rohoye, ela yendagarichira mimi maishage undagativya. 34Ninamwambira mino, tsʼiku yiyo na usiku atʼu airi andakala arere tʼandiko mwenga, na mumwenga undahwalwa, na yiye munjine arichwe. 35Achetʼu airi andakala anasukumana, na mumwenga undahwalwa, na yiye munjine arichwe.”#17:35 Nakala zinjine zinaonjeza fungu ra 36 dza: Alume airi andakala a mundani, mumwenga undahwalwa na yiye munjine arichwe.

37Phapho ao achimuuza vivi, “Bwana, gandahendekaphi gano?” Naye achiaamba, “Pharatʼu phenye chimba ndipho phondarundikana nderi.”

Currently Selected:

Luka 17: CHIDUR

Highlight

Copy