Mga Salmo 119
119
An Balaod han Ginoo
1Palaran adton waray kasaypanan,
ngan han balaod han Ginoo nagtutuman.
2An magsunod han iya mga sugo malipayon,
ngan ha bug-os nga kasingkasing masinugtanon.
3Diri gud magbubuhat hira hin karat-an,
maglalakat hira han kanan Ginoo nga dalan.
4Imo mga balaod kami imo gintagan,
ngan imo ha amon pinapagtuman.
5Hinaot unta nga ako makagtuman,
hin pagbantay han imo mga pagturon-an.
6Kon an ngatanan nga sugo akon pagsundon,
an kaawod ug kaalo diri ko maaangkon.
7Kinasingkasing an akon pagdayaw ha imo,
kon an matadong nga paghukom an hibaroan ko.
8Mga balaod nimo akon pagtutumanon,
ayaw gad pagpasibaya ha akon.
An Pagsugot han Balaod han Ginoo
9Uunanhon hin pagkaputli hin batan-on?
Kon an imo mga sugo iya pagtumanon.
10Hin kinasingkasing magsisirbe ako ha imo,
ayaw itugot nga talikdan ko an imo mga sugo.
11Ha kasingkasing gintipig ko an imo balaod,
basi diri ako makasala ha imo hin tinuod.
12Gindadayaw ta ikaw, O Ginoo,
an imo mga paagi ha akon itutdo.
13Akon liwat igpapasangyaw ha tingog nga dako,
an mga balaod nga ha akon ginhatag nimo.
14Nalipay ako hin pagtuman han imo mga sugo,
labaw hin pakaangkon hin manggad nga damo.
15An imo mga tugon akon gin-aadman,
ginsususi ko an imo mga pagturon-an.
16Imo mga balaod akon nalilipayan,
imo mga sugo diri ko hingangalimtan.
An Kalipay dida han Balaod han Ginoo
17Ha akon, an imo surugoon, upaya an pagtutdo,
basi ha pagsugot han imo pagturon-an mabuhi ako.
18Abrihe an akon mga mata basi ko hikit-an,
ha imo balaod, an mga kamatuoran.
19Diri ako mag-iiha dinhe ha tuna,
ayaw na an imo mga sugo ha akon tagoa.
20An kalag ko nasasakit hin pag-ungara,
han imo mga paghukom ha ngatanan nga takna.
21Imo ginsasaway an mga mapinahitas-on,
gabaan unta adton diri magsinugtanon.
22Ha ira mga pagyubit ug pagtamay ako gawsa,
kay akon man gintuman an imo mga lagda.
23Bisan kon an mga punoan magkaurosa,
pagplano ha akon hin pagkontra.
Mga turumanon nimo akon pag-aadman,
Ngan diri ko gud pagpapasibay-an.
24An imo mga sugo nakakalipay ha akon,
kay amo an akon mga magsaragdon.
An Pagtalinguha hin Pagsugot han Balaod han Ginoo
25Nalunay ako nga maluya dida ha tapotapo,
buhia gad ako sugad han saad nimo.
26Gintug-an ko an mga buhat ko ngatanan,
sanglit imo ako pinamatian;
tutdoi ako han imo mga dalan.
27Buligi ako basi an imo mga balaod akon santapon,
ngan an imo mga pagturon-an#119:27 pagturon-an; o mga buhat. akon pamamalandongon.
28Hin mga kabidoan ako nadaog,
sugad han imo mga saad tagi ako hin kusog.
29Ayaw itugot nga ha karat-an ako mahingadto,
sugad han imo mga balaod ha akon itutdo.
30Igintug-an ko an akon kamasinugtanon,
pinamatian ko an imo mga paghukom.
31 Ginoo, ginsunod ko an imo kaladnganan,
ayaw gad itugot nga akon kaalohan.
32Akon ini nga pagtatalingohaon,
ngan an imo nga sugo akon pagsusugton.
Tungod nga ighahatag mo man ha akon,
an dugang pa nga pagkamasinaboton.
Nag-ampo nga Mahibaro
33Tutdoi gad ako, O akon Ginoo,
han kahulogan han mga balaod mo;
akon gud ini susugton ngan tutumanon,
ha takna ngatanan han kinabuhi nakon.
34Igsaysay ha akon an mga balaod nimo,
hin kinasingkasing pagtitipigan ko.
35Itugot nga imo mga sugo akon matuman,
kay aada ha ira an akon kalipayan.
36Ihatag ha akon han balaod mo paghingyap,
labaw hin pagbiling hin mga manggad.
37Pudngi hadton waray pulos nga ungara,
ha imo mga saad ako pagpakaupaya.
38Tumana an imo saad ha akon,
kay usa ako nga imo surugoon—
an imo ginhimo nga saad, hadton ha imo nag-aalagad.
39Igawas ako han mga pagtamay,
an imo paghukom urusahon kaupay.
40Karuyag ko han imo mga sugo pagtuman,
buhia gad ako kay matadong ka man.
An Pagsarig han Balaod han Ginoo
41Ipakita, O Ginoo, an imo gugma ha akon,
sugad han imo siring nga ako tatalwason.
42An mga magtamay ha akon babatonon nakon,
kay nasarig ako hadton imo mga pulong.
43Payakna ako han imo kamatuoran,
kay imo mga paghukom akon ginlalauman.
44Han imo balaod ako pirme nagtutuman,
hin kadayonan ngan waray kataposan.
45Mag-uokoy ako ha hingpit nga kagawasan,
kay akon ginsusugot an imo pagturon-an.
46Imo mga sugo igsumat ha mga kahadian,
ngan diri gud ako kaaalohan.
47Hiaagian ko an akon kalipayan,
dida han imo mga sugo pagtuman.
48Kay ako hinmigugma han imo mga sugo,
papalandongon ko an imo mga igintutdo.
An Pagtapod han Balaod han Ginoo
49Panumdom han saad mo ha imo surugoon,
ini an naghatag ha akon hin paglaom.
50Bisan ha pag-antos nakaliaw ha akon,
kay an imo saad nagin kinabuhi nakon.
51Han mga mapahitas-on ako gintatamay,
kundi waray ko an imo balaod isalikway.
52Akon gindumdom an daan mo nga paghukom,
amo, O Ginoo, an nagliaw ha akon.
53Kon an magraot nasupak han imo balaod,
nasisina gud ako hin tinuod.
54Dinhe han akon kinabuhi nga tunan-on,
an imo mga sugo an akon karantahon.
55Ha gab-i, O Ginoo, akon ta ikaw gindudumdom,
ngan an imo balaod akon ginpapalandong.
56Nagin kaupayan, kalipayan nakon,
kon an imo mga sugo an akon pagsugton.
An Pagmahal han Balaod han Ginoo
57Ikaw la, Ginoo, an akon ginkikinahanglan,
igsasaad ko, han imo balaod hin pagtuman.
58Hin kinasingkasing ako naghahangyo,
sugad han imo saad, kalooyan mo ako.
59An akon mga panggawi akon ginpapalandong,
ngan nagsaad ako pagtuman han imo mga tugon.
60Ngan diri manta nakon paglalanganon,
an imo mga sugo akon pagsusugton.
61Ginbibitik ako han magraot nga mga tawo,
kundi diri ko hingangalimtan an balaod nimo.
62Nagmamata ako ha tabis han kagab-ihon,
pagdayaw han matadong mo nga paghukom.
63Sangkay ako hadton nag-aalagad ha imo,
han ngatanan nga nagtutuman han imo mga sugo.
64An tuna puno han imo gugma, O Ginoo,
han imo mga sugo tutdoi ako.
An Kamahal han Balaod han Ginoo
65Imo gintuman an imo saad, O Ginoo,
maupay ka ha akon, an surugoon nimo.
66Tagi hin kinaadman ug hibaro,
kay han imo mga sugo, natapod ako.
67Nagin maraot ako, san-o ka magkastigo,
kundi yana imo pulong gintutuman ko.
68Kamaupay mo, pagkamaloloy-on,
an imo mga sugo itutdo ha akon.
69Nagbinuwa an mapahitas-on bahin ha akon,
kundi susugton ko an imo mga tugon.
70Waray gud sarabutan ini nga mga tawo,
kundi nalilipay ako han balaod nimo.
71Nakaupay ha akon an imo mga kastigo,
kay han imo mga sugo natutdoan ako.
72Ha akon, labaw an balaod nga hatag mo,
kay han mga bahandi hinin tuna nimo.
An Katadongan han Balaod han Ginoo
73Imo ako ginhimo ngan ginpanalipdan,
tutdoi ako basi an mga sugo akon hisabtan.
74Adton ha imo matinahuron,
nalipay kon hira makita ha akon,
kay han imo saad ako masinarigon.
75Magtadong, Ginoo, an imo mga paghukom,
imo ako ginsirotan kay ikaw matinumanon.
76An imo dayon nga gugma nakakaliaw ha akon,
kay saad man ini ha akon,
an imo surugoon.
77Kalooyi ako ngan mabubuhi ako,
kay nalilipay ako han imo mga sugo.
78Adton mapahitas-on unta kaalohan,
kay nagsumbong hin waray kamatuoran.
An para ha akon, akon papalandongon,
an imo mga mag-upay nga tugon.
79An natahod ha imo mapakadi ha akon,
sugad man an magtuon han imo mga tugon.
80Mahingpit unta an pagtuman han imo kaladnganan,
ngan mahigagawas ako han makaarawod nga kapakyasan.
Nag-ampo para hin Katalwasan
81O Ginoo, duro na an akon kagul-anan
hin paghinulat han imo katalwasan.
An imo mga pulong an akon ginlalaoman.
82An akon mga mata kapoy ug rutay,
han imo mga saad hin pagbinantay.
Samtang yana ha imo ako napakiana,
“An imo pagbulig ha akon, san-o pa?”
83Waray ako gamit, daw baya nga anit hin bino,
kundi diri ko hingangalimtan an imo mga sugo.
84Tubtob san-o pa man an paghulat nakon,
nga an nagpaantos ha akon imo kastigohon?
85Namagluong hira basi ako nira dakpon,
im' nga mga tawo nga mapahitas-on.
86An mga sugo nimo ngatanan,
angay gud ug igo kasarigan.
Ginpakaraot ako han mga tawo,
han mga buwaon—buligi ako!
87Haros na gud ako nira pagpatayon,
kundi waray ko igsalikway an imo mga sagdon.
88Upaya ako tungod han imo gugma,
basi imo mga balaod tumanon ko na.
An Pagtoo dida han Balaod han Ginoo
89Waray kataposan, O Ginoo, an imo mga pulong,
ini didto ha langit magpapadayon.
90An imo kamatinumanon ha dayon nga panahon,
ngan an gintindog nga tuna napabilin gihapon.
91Ngada yana nagpabilin an mga butang,
kay imo man ini pagburot-an;
kay surogoon man an ngatanan.
92Kon an imo balaod diri surok han akon kalipayan,
bangin patay na ako tungod han mga kakurian.
93Imo mga tugon diri ko pababay-an,
kay tungod hini, hin kinabuhi ako natagan.
94Imo na man ako—imo ako tabangan!
Imo mga sugo gintinguha ko hin pagtuman.
95Nagama an magraot hin pagpatay ha akon,
kundi an imo balaod akon papalandongon.
96Akon hinbaroan nga an ngatanan may utlanan,
kundi an imo mga sugo may kahingpitan.
An Paghigugma para han Balaod han Ginoo
97Ginmamahal ko an imo mga balaod,
ha bug-os nga adlaw gindumdom ko hin tinuod.
98Imo mga sugo diri ko isasalikway,
sanglit mas maaram ako kay han akon mga kaaway.
99Mas nasabot ako kay han akon mga magturutdo,
kay han imo mga pagturon-an namamalandong ako.
100Labaw han kalagsan an akon kinaadman,
kay an imo mga sugo akon gintutuman.
101Binayaan ko an magraot nga ginawian,
kay karuyag ko han imo pulong pagtuman.
102Waray pagpabay-i an imo pagturon-an,
kay an akon magturutdo hi ikaw man.
103Hin kamatam-is han imo mga tugon,
mas matam-is pa kay han dugos nga pagkaon.
104Tikang han imo balaod an akon kinaadman,
sanglit na diri ako han magraot nga ginawian.
Kapawa nga Tikang han Balaod han Ginoo
105Suga nga nag-uuna ha akon an imo pulong,
ngan amo an kapawa para han dalan nakon.
106An baraan ko nga saad akon pagtutumanon,
hin pagsugot han tutdo mo nga matadong.
107An akon mga kakurian, Ginoo,
mabug-at kaupay,
buhia gad ako, tumana an saad mo hadto anay.
108Karawata an akon pagpasalamat ha imo, Ginoo,
ngan tutdoi ako han imo mga sugo.
109Andam ako han akon kinabuhi hin pagtubyan,#119:109 Andam ako…pagtubyan; o Aada hin dayuday nga kataragman an akon kinabuhi.
an imo mga balaod diri ko hingangalimtan.
110Ginbibitik ako han magraot nga mga tawo,
kundi waray ako magsupak han imo mga sugo.
111Akon dayon nga hiagi an imo mga sugo,
amo ini an kalipay han kasingkasing ko.
112An pagsugot han balaod mo akon gintug-an,
nga akon ipapadayon tubtob ha kataposan.
An Katalwasan dida han Balaod han Ginoo
113Napupungot ako hadton mga maglingo,
kundi hinihigugma ko an balaod nimo.
114Ikaw an panalipod nga naugop ha akon,
han imo mga saad aada an akon paglaom.
115Iwas kamo ha akon, kamo nga makasasala,
akon susugton an kanan Dyos mga lagda.
116An ginsaad mo nga kusog ako hatagi,
ngan tungod hini ako mabubuhi;
ha akon paglaom ayaw ako pagpakaalohi.
117Kapti ako basi diri na ako mabaraka,
imo mga sugo susundon ko manta.
118Ginsalikway mo an nasupak han imo sugo,
kawang la an ira malimbongon nga plano.
119Gin-isip mo nga siot an magraot nga tawo,
sanglit ginhigugma ko an imo mga sugo.
120Tungod ha imo makulba para ha akon,
ngan nahadlok ako han imo paghukom.
An Pagsugot han Balaod han Ginoo
121Matadong ngan maupay an akon binuhatan,
ha mga kaaway diri mo ako pababay-an.
122Saari hin pagbulig an imo surugoon,
nga diri ha akon magsakit an magpahitas-on.
123Kapoy na an akon mga mata hin pagbantay,
han katalwasan nga iginsaad mo kanunay.
124Pamatii ako sumala han imo gugma,
ngan tutdoi ako han imo mga lagda.
125Imo ako oripon, tagi hin sarabotan,
basi hisabotan ko an imo pagturon-an.
126Takna yana hin pagbuhat, O Ginoo,
kay an mga tawo diri nagtutuman han imo sugo.
127Hinihigugma ko an imo mga sugo,
labaw pa gud hadton bulawan nga tutoo.
128An ngatanan mo nga tugon#119:128 ngatanan mo nga tugon; diri klaro ha Hebreo. akon gintutuman,
an maraot nga mga paagi akon gindudumtan.
An Pag-ungara hin Pagsugot han Balaod han Ginoo
129An imo mga pagturon-an urosahon,
hin kinasingkasing ginsusugot nakon.
130Nahatag hin kapawa an dayag nga pagturon-an,
an mga tapang natatagan hin kinaadman.
131Naghahangos ako ha akon pagnganga,
han imo mga sugo ha akon pag-ungara.
132Lingia ngan kalooyi ako yana,
sugad han ginbuhat mo han ha imo nahigugma.
133Sugad han imo saad, ayaw ako ipapukan,
ayaw ako ipadaog han mga karat-an.
134Tubsa ako han magraogdaog nga mga tawo,
basi amo la an akon pagsugton an imo mga sugo.
135Ha imo atubangan ako pagpakaupaya,
ngan itutdo ha akon an imo mga lagda.
136Mga luha ko nadaligdig sugad hin sapa,
kay han imo balaod an mga tawo natipa.
An Katadongan han Balaod han Ginoo
137Matadong ka gud hin duro, O Ginoo,
ngan sugad man an mga balaod nimo.
138Mga turumanon nga ginhatag nimo,
hingpit kamatadong, maupay hin duro.
139Nalaga daw kalayo an akon kasina,
kay ginsalikway han kaaway an imo mga lagda.
140An imo mga saad waray pagruhaduha,
ngan amo ini an akon hinihigugma.
141Tinamay la ako, waray kapulsanan,
kundi diri ako malilimot han imo pagturon-an.
142Pagkamatadong mo, waray kataposan,
ngan an imo balaod puno hin kamatuoran.
143Hin kasamok ug kasakitan ako napupuno,
kundi nakakalipay ha akon an imo mga sugo.
144Kanunay matadong an imo mga pagturon-an,
basi ako mabuhi, tagi ako hin sarabotan.
Nag-ampo Para hin Katalwasan
145Kinasingkasing an akon pagtawag ha imo,
O Ginoo, batona ngan pamatii ako;
ngan pagtutumanon ko an imo mga sugo.
146Natawag ako ha imo ngan ako talwasa,
ngan magsusunod ako han imo mga lagda.
147Ha aga pa nasangpit ako han pagbulig mo,
an saad nimo an ginlalaoman ko.
148Ha bug-os nga gab-i nagmamata ako,
pagpinamalandong han mga tugon nimo.
149Kay dayon an imo gugma, dungga ako, Ginoo,
hawiri an akon kinabuhi, kalooyi ako.
150Magpintas nga paropamatay harani ha akon,
han imo balaod diri gud hira matinumanon.
151Kundi suok ka ha akon, O Ginoo,
ngan waray pagkabalhin an imo mga sugo.
152Hadto pa nasabtan ko an imo mga tugon,
imo pagbuot nga ini magpapadayon.
Pangaro hin Tambulig
153Kitaa an akon pag-antos ngan talwasa ako,
kay waray ko bayai an balaod nimo.
154Ugopi ako, O Ginoo, ngan panalipdi,
talwasa ako kay saad man nimo ini.
155Diri matatalwas an mga magraogdaog,
kay diri hira nasugot han imo balaod.
156An imo pagpaid dako kaupay, Ginoo,
ipakita an imo kalooy ug talwasa ako.
157Damo an ha akon nagraraogdaog,
kundi waray ko bayai an imo balaod.
158Kon nakita ako han mga maglingo,
nangangalas gud ako hin duro;
kay diri hira nagtutuman han imo mga sugo.
159Kitaa an akon gugma han imo pagturon-an,
padayon an gugma mo, ihatag an katalwasan.
160An imo mga balaod ubos kamatuoran,
an magtadong mo nga sugo waray kataposan.
Paghalad han Balaod Ngadto han Ginoo
161Gintalumpigos ako han mga gamhanan,
kundi an imo balaod akon ginpasidunggan.
162Malipay ako tungod han imo mga saad,
sugad hin nakaagi hin damo nga manggad.
163Nasisina ug nadiri ako han mga buwa,
kundi an imo balaod akon hinihigugma.
164Nakakapito kada adlaw an akon pagpasalamat,
tungod han mga magtadong mo nga mga buhat.
165Himyang an mga tawo nga han balaod nahigugma,
ngan waray gud makakapukan ha ira.
166Naghuhulat ako han pagtalwas mo, Ginoo,
ngan pagtutumanon ko an imo mga sugo.
167Ginsusugot ko an imo mga pagturon-an,
kinasingkasing an akon paghigugma han ngatanan.
168Ginsusugot ko an imo mga sugo ug mga tutdo,
nakita ka han ngatanan nga mga buhat ko.
Nag-ampo hin Pakibulig
169Padangata ha imo an akon pakibulig, Ginoo!
Tagi hin pagsabot sumala han saad nimo.
170Pamatii gad man an akon mga pag-ampo,
sumala han imo saad, talwasa ako.
171Dayuday ako magdadayaw ha imo,
kay an imo balaod ha akon igintututdo.
172An imo mga balaod akon pagkakantahon,
kay an imo mga sugo puros magtadong.
173Dayuday maandam ka hin pagbulig ha akon,
kay imo mga sugo akon pagsusundon.
174Nangangandoy ako han pagtalwas mo ha akon,
ha imo balaod ako magmamalipayon.
175Hin kinabuhi ako imo gad tagan,
Basi hi ikaw la an akon pag-awitan.
Hinaot pa unta nga ako kabuligan,
pinaagi han imo mga pagturon-an.
176Nagsinudoy ako daw karnero nga nawara,
sanglit pakadi gad ngan pamilnga.
Ako, an imo surugoon, Ginoo, pangitaa,
kay han imo mga balaod waray ako magpasibaya.
Currently Selected:
Mga Salmo 119: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984