Genesis 25

May Iba nga mga Tulin hi Abraham

(1 Cron. 1:32-33)

1Nangasawa hi Abraham hin lain nga babaye nga ginngaranan nga Ketura. 2Nag-anak hira ngan hi Abraham kanda Zimran, Jocsan, Medan, Midian, Isbac, ug Sua. 3Hi Jocsan amo an amay nira Seba ug Dedan, ngan an mga tulin ni Dedan amo an mga Asurim, an mga Letusim, ngan an mga Leumin. 4An mga anak ni Midian amo hira Efa, Efer, Hanoc, Abida, ug Eldaa. Ini hira ngatanan amo an mga tulin ni Ketura.

5Iginhatag ni Abraham an ngatanan nga iya hiagi ngadto kan Isaac. 6Kundi han buhi pa hiya, gintagan niya hin mga regalo an mga anak nga kalalaken-an nga igin-anak nira ngan han iba nga iya kaasaw-an. Niyan ginpalakat niya ini nga mga anak tipakadto han tuna ha sinirangan, nga hirayo tikang kan Isaac nga iya anak.

Namatay ngan Iginlubong hi Abraham

7-8Namatay hi Abraham nga lagas na kaupay ha panuigon nga 175. 9Iginlubong hiya nira Isaac ug Ismael nga iya mga anak didto han lungib han Macpela, didto han uma ha sinirangan han Mamre, nga gintag-iya anay ni Efron nga anak ni Zoar nga Hiteohanon. 10Amo ini an uma nga ginpalit ni Abraham tikang han mga Hiteohanon. Iginlubong didto nga duha hira Abraham ug Sara nga iya asawa. 11Han kamatay na ni Abraham, ginbendisyonan han Dyos hi Isaac nga iya anak, nga nag-ukoy ha hirani han atabay nga ginngaranan “An-Atabay-han Buhi-nga-Nakita-ha-Akon.”

May-ada mga Tulin hi Ismael

(1 Cron. 1:28-31)

12Hi Ismael nga anak nira Abraham ngan hi Agar nga Ehiptohanon nga oripon ni Sara, 13nagkamay-ada han nasunod nga mga anak nga kalalaken-an, nga iginlista ha pagkasunodsunod han ira katawo: hira Nebaiot, Kedar, Adbeel, Mibsam, 14Misma, Duma, Masa, 15Hadad, Tema, Jetor, Nafis, ug Kedema. 16Amo hira an ginikanan hin dose nga mga tribo, ngan iginsangay han ira mga ngaran an mga kabaryohan ngan mga karampohan nga ihinatag ha ira. 17An panuigon ni Ismael han iya kamatay 137 na. 18Nag-ukoy an mga tulin ni Ismael didto han katunaan nga nabubutnga han Havila ug Sur, ngadto han sinirangan han Ehipto, nga tipakadto ha Asiria. Nag-ukoy hira hirayo tikang han iba nga mga tulin ni Abraham.

Natawo hira Esau ug Jacob

19Amo ini an susumaton ni Isaac nga anak ni Abraham. 20An panuigon ni Isaac 40 na an han pangasawa niya kan Rebecca nga anak ni Betuel, (nga taga-Aramea ha Mesopotamia) ngan bugto ni Laban. 21Tungod nga waray man mga anak hi Rebecca, nag-ampo hi Isaac ngadto han Ginoo para ha iya. Ginbaton han Ginoo an iya pag-ampo, ngan nagburod hi Rebecca. 22Karuha an iginburod ni Rebecca, ngan han waray pa hira katatawo, nagpapadarudaisog hira ha sulod han iya tiyan. Nagsiring hiya, “Kay ano nga sugad hini an mahinanabo ha akon?” Sanglit kinmadto hiya han Ginoo hin pagpakiana.

23Nagsiring ha iya an Ginoo,

“Aada ha imo tiyan in duha nga mga nasod;

Mag-aanak ka hin duha nga magkontra nga mga tawo.

Labi ka gamhanan an usa hini nga duha;

Mag-aalagad han manghod an magurang.”

24Inmabot kan Rebecca an iya panahon hin pag-anak, ngan nag-anak hiya hin karuha nga kalalaken-an. 25Mapula an syahan, ngan barahiboon an bug-os niya nga lawas, sanglit ginngaranan hiya nga Esau.#25:25 ESAU: Kinuha ini nga ngaran pag-unabi ha Seir, nga katunaan nga gin-ukyan han katulinan ni Esau; pareho an pagluwas han Seir nga pulong para han “barahiboon.” 26Natawo an ikaduha nga nakapot hin maupay han tikod ni Esau, sanglit ginngaranan hiya nga Jacob.#25:26 JACOB: Pareho han Hebreo nga pulong para han “tikod” an tunog hini nga ngaran. 60 na an panuigon ni Isaac han katawo hira.

Iginbaligya ni Esau an Iya Pagkamagurang

27Tinmubo an kabataan nga kalalaken-an, ngan nahimo hi Esau nga batid nga parapanganop, nga karuyag magsudoysudoy han kaumhan, kundi mahilomon la nga tawo hi Jacob nga karuyag magpabilin la ha balay. 28Ginpalabi ni Isaac hi Esau, kay nalipay hiya hin pagkaon han mga pinanganopan nga gin-ihaw niya, kundi ginpalabi ni Rebecca hi Jacob.

29Usa ka adlaw samtang naglalaga hi Jacob hin monggos, inmabot hi Esau tikang hin pagpanganop. Ginugutom hiya, 30ngan nagsiring hiya kan Jacob, “Ginugutom ako; tagi ako hito nga mapula nga linaga.” (Amo ito nga ginngaranan hiya nga Edom.)#25:30 EDOM: Pareho han Hebreo para han “pula” an tunog hini nga ngaran.

31Binmaton hi Jacob, “Ighahatag ko ini ha imo kon ighatag mo ha akon an imo mga katungod hin pagkasuhag nga anak.”

32Nagsiring hi Esau, “Sigi, mapatay na ako hin gutom; ano nga kaupayan an mahihimo ha akon han akon mga katungod?”

33Binmaton hi Jacob, “Pagsumpa anay nga ighahatag mo ha akon an imo mga katungod.”

Nagsumpa hi Esau ngan iginhatag niya kan Jacob an iya mga katungod. 34Niyan gintagan hiya ni Jacob hin pira nga tinapay ngan han linaga nga monggos. Kinmaon ngan inminom hi Esau ngan katapos binmuhat hiya ngan linmakat. Ginpakawaray la niya an iya mga katungod hin pagkasuhag nga anak.

Currently Selected:

Genesis 25: MBBSAM

Highlight

Copy