Saray Salmo 24
24
Say Matalonggaring ya Ari#SAY TITULO ED TIKSTON HEBREO: Salmo nen David.
1Kayaryay Katawan so mundo tan amin a logan to;
kien toy dalin tan amin a manaayam ed dalin.
2Inletneg tod aralem a danum diad dalem na dalin
tan inlira tod dalem na dayat iray pundasion to.
3Siopay manepeg ya onkalab ed palandey na Katawan?#24:3 PALANDEY NA KATAWAN: say palandey ed Jerusalem ya akaletnegan na Timplo.
Siopay nayarin onloob ed masanton Timplo to?
4Saray totoon malinis so gawa ra tan say kanunotan da,
ag ira mangigagalang ed saray diriyos,
tan ag da isisipan so ag da nagawaan.
5Say Katawan bindisionan tan ilaban to ra;
say Dios ibawag to ran anggapoy kasalanan.
6Sikarayan totoo so onsisingger ed Dios,
tan oonlad arap na Dios nen Jacob.
7Ilokas yoy maawang iray puirta,
ilokas yo ray kadaanan a kaput,
ta onloob so matalonggaring ya ari!
8Siopa yan matalonggaring ya ari?
Say Katawan a mabiskeg tan makapanyari,
say Katawan a mananalo ed bakal!
9Ilokas yoy maawang iray puirta,
ilokas yo ray kadaanan a kaput,
ta onloob so matalonggaring ya ari!
10Siopa yan matalonggaring ya ari?
Say Katawan a makapanyarin-amin—sikatoy matalonggaring ya ari!
Currently Selected:
Saray Salmo 24: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
