Mateo 20
20
Saray Kumikimey ed Kaubasan
1“Say Panariay tawen singa sakey a toon walay kaubasan to. Pinmaway na kabkabwasan a mananap na mankimey. 2Nen akapipaknaan ya upaan to ray sakey a dinario ed sanagew, imbaki to la ran mankimey ed kaubasan to. 3Pinmaway lamet a linmad tindaan nen alas nuibid kabwasan, tan akanengneng na lalakin manalalagey labat ya anggapoy gagawaen da. 4Inkuantod sikara, ‘Lakayo met ed kaubasan ko. Mankimey kid man, ta upaan ta kayoy manepeg.’ 5Linma ra sirin a mankimey. Diad alas dosi lamet tan diad alas tris, onman met ni so ginawa to. 6Nen alas singkod ngarem, pinmaway lamet tan wala ni ray anengneng to a lalakin anggapoy gagawaen da. Tinepet tod sikara, ‘Akin et wadya kayon mandadarak na oras yon sanagew?’ 7‘Anggapo lantiy mangalad sikami a mankimey,’ kuanda. Inkuanto, ‘No ontan sirin, lakayo met a mankimey ed kaubasan ko!’
8“Nen onsisironget la, samay akankaubasan tinawag toy inkargado to tan inkuanto, ‘Tawag mo la ra may mankikimey tan iter moy upa ra. Igapom ed saray onur a nankimey ya anggad saray onaan.’ 9Saramay ginmapon nankimey na alas singko, akaawat iray sansasakey a dinario. 10Nen onsoblay ira may onaan a ginmapon nankimey, abaloan dan atagtagey ni so upa ra. Balet sansasakey met a dinario so naawat da. 11Kapangawat da, nanriklamo rad samay ankankiey kaubasan. 12Inkuanda, ‘Saksakey oras a nankimey ira may onur a sinmabi; sikami, balet, sanagew kamin nankimey ed kapetangay agew. Akin et namparay upa mi?’ 13Inkuantod sakey ed sikara, ‘Kaaro, ag ta ka sasaolen. Ag ka ta akapipaknaan ed siak ya upaan ta kay sakey a dinario? 14Alam la tay upam tan laka la. Labay kon iparay naawat mod samay onur a sinmabi. 15Akin, anggapo tay kanepegan kon manggawad labay kon gawaen ed kayaryan kon dili? O mairap kasi so linawam lapud kamaungan ko?’”
16Insan kuanen Jesus, “Kanyan makaona ray nanaonur, tan naonur iray makakaona.”
Say Mikatlon Impakasalita nen Jesus ed Ipatey to
(Mar. 10:32-34; Luc. 18:31-34)
17Nen walad dalan si Jesus a mamaarap ed Jerusalem, imbiig to ray disipulo ton akitongtongan leleg dan manaakar. 18Inkuantod sikara, “Oonla itayod Jerusalem a diman niawat so Anak na Too ed lima da ray manonan papari tan saray iskriba. Sintinsiaan da a pateyen, 19insan da ipalima ed saray Hintil. Ludlureyen da, lewet-leweten da, insan da ipasak ed krus. Balet onolid bilay diad kumatlon agew.”
Say Kerew na sakey ya Ina
(Mar. 10:34-45)
20Sinmingger ed kinen Jesus so asawa nen Zebedeo a kaiba to ray anak ton lalaki. Nantalimukor ed arap nen Jesus tan walay kekerewen to.
21“Antoy labay mo?” tepet nen Jesus.
Inmebat, “Iyabuloy mo pa komun ya onyorung ed sikad nanarian mo ra yay duaran anak ko, say sakey diad nikawanan mo tan say sakey diad nikawigim.”
22“Ag yo amtay kekerewen yo,” kuanen Jesus. “Nayarian yo kasiy oninom ed kupan inoman ko?”
“Nayarian mi,” ebat da.
23Inkuanen Jesus, “Nayarian yon tua so oninum ed kupan inoman ko. Balet andid limak so pampili no siopay onyorung ed nikawanan ko tan diad nikawigik. Para saray angiganaan na Amak ira yan pasen.”
24Nen nadngelan ya na saray samploran disipulo, asanukan irad saramay sanagi. 25Tinawag nen Jesus iran amin tan inkuanto, “Kabat yo a saray manoley ed saray Hintil walay pakayari rad saray totoon ooleyan da, tan nagawa so labay da ray walay betang. 26Aliwan onya balet so nepeg a nagawad sikayo. Siopaman ed sikayo so labay toy mangipangulo, nepeg toy manlingkur ed sikayon amin. 27Tan siopaman ed sikayo so labay toy manona, nepeg a paaripen ed sikayo, 28a singa say Anak na Too ya ag linma dian palingkuran, no ag ingen manlingkur tan mangisaklang na bilay to, a panondon ed saray amayamay a totoo.”
Pinaabig nen Jesus so Duaran Bulag
(Mar. 10:46-52; Luc. 18:35-43)
29Nen ontataynan irad Jerico, amayamay iray totoon tinmombuk ed kinen Jesus. 30Walay duaran lalakin bulag a manyodyorung ed gilig na dalan. Nen nadngel dan ondadalan si Jesus tinmawag iray maksil, “Anak nen David, kasian mo kami!”
31Nampasnukan ira na saray totoo tan babanoen da ran oningal, balet lalon maksil so intawag da, “Anak nen David, kasian mo kami!”
32Tinmonday Jesus, tinawag to ra tan tinepet to, “Antoy labay yo a gawaen kon para sikayo?”
33“Katawan,” kuanda, “gawam pa a makanengneng kami!”
34Akasian ira nen Jesus, kanyan diniwit to ray mata ra. Akanengneng iran tampol, insan ira tinmombuk ed sikato.
Currently Selected:
Mateo 20: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
