Genesis 8
8
Say Intonda na Delap
1Ag alingwanan na Dios si Noe tan amin ya ayep a kaiba tod dalem na biong; pinasiplug na Dios so dagem, et ginmapon inmabebay danum. 2Kinmopit ira may sinmasangin dalin, et tinmondan pinmaway iray sobul ed dalem na dalin tan kinmaput iray puirtay tawen. Tinmonday oran, 3tan diad loob na sanlasus tan limamploy agew nankalkalnan inmabebay danum. 4Diad kumalabimpiton agew na kumapiton bulan, sinmarsar ed palandey na Ararat imay biong. 5Tuloy-tuloy ya inmabebay danum, tan diad onaan ya agew na kumaplon bulan pinmaway iray toktok na kapalandeyan.
6Kasumpal na apataplon agew inlokas nen Noe so sakey a bintana a ginawa to, 7ta imbolus toy sakey a wawak. Ag pinmawil, no ag ta nantikyab lan nantikyab ya anggad amaga lay dalin. 8Legan to ya, imbolus toy sakey a malapati, ta nengnengen to no inmabeba lay danum. 9Balet lapud wala niy danum ed intiron dalin, anggapoy natoonan to may malapati. Kanyan pinmawil ed biong, siningkat nen Noe tan inloob to lamet. 10Nanalagar na pitoy agew, insan pinatikyab to lamet imay malapati. 11Pinmawil na labi a sankatangal toy sakey a balon bolung na oliba. Naamtaan ed satan nen Noe ya ataptapew lay danum. 12Nanalagar ni na pitoy agew, insan to pinatikyab lamet imay malapati; natan ag la pinmawil.
13Nen mantaon si Noe na anem a lasus tan sakey, diad ononan agew na onaan a bulan, anggapo lay delap. Inekal toy tarung na biong, ninengneng toy kaliber-liber, tan anengneng ton namamagaan lay dalin. 14Diad kumaduamplo tan pitoy agew na kumadwan bulan, amaga lay dalin.
15Inkuan na Dios ed kinen Noe, 16“Paway ka lad biong, pati say asawam, saray anak mon lalaki, tan saray kaasawaan da. 17Papaway mo met la ra may manok tan saramay ayayep, ta mamparakel ira tan onkayat irad intiron mundo.” 18Pinmaway la sirin si Noe, pati say asawa to, saray anak ton lalaki, tan saray kaasawaan da. 19Pinmaway met ira may ayayep tan saramay manok a nanoolup so balang klasi.
Angibagat si Noe
20Nanggaway Noe na altar a para Katawan; angalay sakey ed balang klasi na saray manok tan saray ayayep a malinis onung ed ganggan tan insaklang to ran bagat a popoolan ed altar. 21Akapaliket ed Katawan so naangub ton balingit na samay bagat, kanyan inkuantod sikaton dili, “Ag ko lan balut isambay dalin lapud saray gagawaey too; amtak a manlapud ogaw ni, maoges lay kanunotan to. Ag ko lan balut deralen ya amin iray pinalsan mabilay a singa ginawak. 22Anggad wala niy mundo, walan walay panaon na panagtanem tan panaon na panagani, walay panaon na ambetel tan say panaon na ampetang, say tiagew tan say nepnep, say agew tan say labi.”
Currently Selected:
Genesis 8: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
