Genesis 28

1Tinawag nen Isaac si Jacob, inlugay to, tan inkuanto, “Ag ka mangaasaway biin Cananea. 2Mamparaan ka, ta lakad Mesopotamia, diad abung nen lakim a Betuel. Asawam so sakey ed saray bibiid man, say sakey ed saray anak nen pangamaen mo a Laban. 3Bindisionan komun na Dios a Makapanyarin-amin so pangasawam tan itdan to ka komuy amayamay ya anak, pian magmaliw kan ama na amayamay a bansa. 4Bindisionan to ka komun tan saray kabyangay boleg mo, a singa samay impamindision tod kinen Abraham, tan nakayaryan mo komun yan dalin a panaayaman mo tan sikatoy dalin ya inter na Dios ed kinen Abraham!” 5Imbaki nen Isaac si Jacob ed Mesopotamia, diad kinen Laban ya anak nen Betuel a taga Aram. Si Laban et agi nen Rebeca ya ina nen Jacob tan Esau.

Angasaway Esau na Arum a Bii

6Naamtaan nen Esau a binindisionan nen Isaac si Jacob tan imbaki tod Mesopotamia a mananap na asawaen to. Naamtaan to met a nen binindisionan nen Isaac, ingganggan ton ag mangaasawa na biin Cananea. 7Nalmoan ton inonur nen Jacob so ama tan ina to, tan linman tuad Mesopotamia. 8Atalusan sirin nen Esau ya ag labay nen ama ton Isaac iray bibiin Cananea. 9Kanyan linmad kinen Ismael ya anak nen Abraham, tan inasawa toy Mahalat ya anak nen Ismael tan agi nen Nebayot.

Say Kogip nen Jacob ed Betel

10Tinmaynan ed Beer-seba si Jacob tan amaarap ed Haran. 11Nen onseselek lay agew, sinmabid masanton pasen#28:11 masanton pasen; odino sakey a pasen. tan nankampod man. Dinmokul a naogip a dinmangan ed sakey a bato. 12Akogip to ya akanengneng na sakey a takayan a say balitang to et manlapud dalin ya anggad tawen, tan wala ray anghil ya onlalasur tan onsesegep ed samay takayan. 13Insan anengneng toy Katawan a manalalagey ed abay to.#28:13 abay to; odino takayan. Inkuan na Katawan, “Siak so Katawan a Dios nen Abraham tan si Isaac. Iter kod sika tan saray kabyangay boleg mo yan dalin a pandokdokulan mo. 14Magmaliw iran singa karakel na dabuk ed dalin. Onkayat ira ed amin a sokung na mundo, tan diad panamegley mo tan saray kabyangay boleg mo, bindisionan ko ray amin a bansa.#28:14 diad panamegley mo…bansa; odino amin da ray bansa kerewen dad siak a bindisionan ko ra a singa impamindision kod sika tan saray kabyangay boleg mo. 15Ag mo lilingwanan a wala ak ed sika tan iyagel ta kad inerman a laen mo, tan ipawil ta kad sayan dalin. Ag ta ka taynan, anggad pakasumpal kon gawaen ya amin iray insipan kod sika.”

16Abangon si Jacob tan inkuanto, “Wadyay Katawan! Wadyad sayan pasen, et ag ko amta!” 17Tinmakot tan inkuanto, “Makapataktakot yan pasen! Talagan sikato yay abung na Dios tan puirtay tawen.”

18Kasabiy kabwasan, asaksakbay a binmangon si Jacob, inala to may baton dinanganan to, insan to inapiapiger ya impaalagey ya inlira a sakey a pakanudnunotan. Kinalboan toy larak na oliba a pangisaklang tod Dios. 19Betel#28:19 BETEL: “Abung na Dios” so kabaliksan to yan ngaran diad salitay Hebreo. so impangingaran tod saman a pasen. (Nen saman, Luz so ngaran to man a baley.) 20Insan sinambaan tod Katawan a Dios, “No kaiba mo ak lawas tan iyagel mo ak legan na sayan akar ko tan itdan mo ak na kawes tan kakanen, 21tan ag ak naano a makapawil ed abung na amak tan sika so Dios ko, 22sayan bato a ginawak a pakanudnunotan et magmaliw a pasen a pangigalangan ed sika, tan iter koy kakaplo na amin ya iter mod siak.”

Currently Selected:

Genesis 28: MBBPAN83

Highlight

Copy