Baruc 4
4
1Say Kakabatan et sikatoy libro na saray ganggan na Dios, say Ganggan a mansiansia ya anggad angga. Mambilay iray ompepeket ed sikato, balet ompatey iray mangikakaindan ed sikato. 2Singger kayod Kakabatan, sikayon totood Israel, tan peket kayod sikato. Tombuk yoy dalan a mamaarap ed karlangay liwawa to. 3Ag yo isusuko ed arum a totoo iray mapagalang a palabon niiter ed sikatayo. 4Agaylay liket tayo, sikatayon totood Israel, ta amta tayo so pakaliliketan na Dios!
Ligliwan para Jerusalem
5Mampabiskeg kayoy linawa, totook; sikayoy mampapasiansian mabilay so ngaran na Israel. 6Nilako kayo ed saray bansa da ray Hintil, balet aliwan pian ompatey kayo. Lapud impanpasnuk yoy Dios, impalima to kayod pakayari na saray kalaban yo. 7Nen angisaklang kayo na saray bagat yod saray dimonyo, anta diad Dios komun, impanpasnuk yo so nanggawad sikayo. 8Alingwanan yo so Andi-anggaan a Dios a nanasikasod sikayo nen ogaw kayo ni, kanyan angyakar kayo na kaermenan ed Jerusalem, a singa sakey ya ina ed sikayo. 9Anengneng na Jerusalem a dudusaen kayo na Dios lapud pamapasnuk to, tan inkuantod saray kaliber-liber a siudad, “Nengneng yo so ontan lan kairapan ya inyakar na Dios ed siak. 10Anengneng kon adakep iray anak kon lalaki tan bibii, say impakadakep ya inyakar ed sikara na Andi-anggaan a Dios. 11Pinabaleg kon kataruk na liket iray anak ko, balet inmakis ak tan nanermen ak nen nala ra ed siak. 12Anggapo komuy manliket ed paniirap ko, natan ta sakey ak a balo tan amayamay ed saray anak ko so nalad siak. Imbeneg da so Ganggan na Dios, tan lapud saray kasalanan da nagmaliw ak a begtebegtew a siudad. 13Ag da inngalngalep iray ganggan to tan ag da ra inkanad impanbilay da; ag da labay ya iwanwan to ra ed dalan na inkatonung.
14“Amin yon kaliber-liber a siudad, gali dia tan motektek yo no panon ya imbantak na Andi-anggaan a Dios iray anak ko ed saray arum a bansa. 15Tinawag ton onsumpad sikara so sakey a bansan sananey so salita to tan anggapoy panangigalang tod saray mamatakken tan anggapoy panangasi tod saray ogogaw. 16Saray totood sayan bansa et inaala da ray inararok ya anak a lalaki tan bibii, et atilak ak a sakey a balo, sigput a bukbukor to.
17“Anak ko ran nibantak ed arum a bansa, anggapoy nagawaan kon itulong ed sikayo. 18Say angyakar ed sikayo na sayan dusa so makapangyagel labat ed sikayo ed saray kalaban yo. 19Ituloy yoy dilin pankukurang yo, anak ko; mambilay kayo onung na labay yo! Bukbukor ko la. 20Inekal koy kawes ya isosolung ko no panaoy kareenan, tan nankawes ak a singa toon maneermen. Ontawag ak ed Andi-anggaan a Dios ya onkerew na tulong legan a mambibilay ak.
21“Pabiskeg yoy linawa yo, anak ko, tan kerew kayod Dios na tulong. Iyagel to ka yod panamairap, diad pakayari na saray kalaban yo. 22Mailalo ak ya, ag la mabayag, ibolus kayo na Andi-anggaan a Dios. Paliketen ak na samay Masanto, say andi-anggaan a manangilaban yo, no kasian to kayo. 23Inmakis tan naningel ak nen inawit da kayo, balet ipawil kayo na Dios tan pagmaliwen to ak a maliket ya andi-anggaan. 24No panoy impanbantay na saray kaliber-liber a siudad nen niakar kayon adakep, ontan met so asingger lan pakanengneng dad Andi-anggaan a Dios ya onsasabin napnoy kagalangan a mangyagel ed sikayo. 25Anak ko, anosan yon itepel so pananusa na Dios. Pinapairap kayo na saray kalaban yo, balet magano lan nanengneng yo ran napatey tan walad leksab na panangasi yo. 26Anak ko, dineral ta kayo na panangaro, balet nepeg yon nanakaran iray matibagkol a dalan; nibatik kayon singa saray karniron narel nen linmoob iray kalaban.
27“Mampabiskeg kayoy linawa, anak ko, tan kerew kayod Dios na tulong. Dinusa to kayo, balet ag to kayo lingwanan. 28No panoy talek yon angibeneg ed Dios nen saman, natan singger kayod sikato tan manlingkur kayod sikato a mamimpuloy talek yo. 29Say angyakar ed sikayo na sarayan kairapan et iyagel to kayo tan itdan to kayo na andi-anggaan a gayaga.”
Walay Andi-saew a Tulong Para Jerusalem
30Mampabiskeg kay linawa, Jerusalem. Say Dios, ya angiter ed sika na ngaran, so manligliwad sika natan. 31Onsabiy kairapan ed saray amasegsegang ed sika, insan ira nanliket nen naplag ka. 32Onsabiy kairapan ed saray siudad ya angaripen ed saray anak mo. Kairapan so pansumpalan na Babilonia, samay siudad ya angakmun ed saray anak mon lalaki. 33No panoy impanliket na saman a siudad nen naplag ka tan impanggayaga tod inkaderal mo, ontan met so panermen to no sikatoy nikaindan. 34Pagmaliwen kon ermen iray mapaatagey a panagpasirayew to tan ibatik ko ray ipapasirayew ton dakerakel a totoo to. 35Siak, say Andi-anggaan a Dios, so mangipelag ed sikato na apoy, tan ompool a piga-pigay agew. Panayaman a mabayag na saray dimonyo iray deral-deral to.
36Nengneng kad bokig, Jerusalem, ta nengneng moy liket ya iyaakar ed sika na Dios. 37Nengneng mo, onsesempet iray anak mo, saray anak a nalad sika. Atipon ira a nanlapud bokig tan sagur diad panamegley na ganggan na Dios, say Masanto. Natan onsesempet ira, tan panliliketan da so kagalangan na Dios.
Currently Selected:
Baruc 4: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983