Марк 8

Кьуд агъзур кас тухарун

(МатӀай 15:32-39)

1Гьа йикъара Исадин патав гзаф инсанар атана, абуруз недайди тахьуниз килигна, Исади Вичин тилмизар кӀватӀна, лагьана:

2– Пуд юкъуз зи патав гвай и инсанрин язух къвезва Заз: абуруз недай затӀни авач. 3ТӀуьн тагана чпин кӀвалериз ахъаяйтӀа, абур рекье гьалдай фин мумкин я, са бязибур яргъарай атанва эхир.

4– Хелвет чкада абуруз гудай кьван фу гьинай атурай? – жаваб гана тилмизри.

5– Квев шумуд фу гва? – хабар кьуна Исади.

– Ирид фу, – жаваб гана абуру.

6Ада халкьдиз чилел ацукь лагьана. Ирид фуни къачуна, хийир-дуьа ийиз-ийиз, кӀус-кӀус авуна, Ада ам, халкьдиз гун патал, тилмизрив вугана. Абуруни а фу халкьдиз пайна. 7Абурув са тӀимил кӀезриярни гвай. Хийир-дуьа авуна, Исади гьабурни пайиз туна. 8ТӀуьна, халкь тух хьана. Амукьай фан кӀусарай ирид зимбил ацӀана. 9Фу тӀуьрбурун кьадар кьуд агъзур итимдив агакьнавай. Абур Ада кӀвалериз ахъайна. 10Ахпа Иса Вичин тилмизарни галаз луьткведа акьахна, Далманут галай патахъ фена.

Фарисейрин тӀалаб

(МатӀай 16:1-12)

11 Фарисейри атана Исадихъ галаз гьуьжетар ийиз хьана. Абуру, Цаварал Алайдавай къалуриз жедай керемат-ишара къалура лугьуз, Адавай тӀалабиз хьана. Гьадалди абуруз Ам синагъ ийиз кӀанзавай.

12Ада дериндай агь чӀугуна, лагьана:

– Вучиз и несилди керемат-ишара къалурун тӀалабзава? За квез рикӀивай лугьузва: и несилдиз керемат-ишара аквадач.

13Фарисеяр гьанал туна, Ам Вичин тилмизарни галаз луьткведа аваз вирин а патаз рекье гьатна. 14Тилмизрин рикӀелай фу къачун алатна, луьткведа чпив гвайдини тек са фу тир.

15– Килиг гьа, фарисейрин маядикайни Гьируд пачагьдин маядикай мукъаят хьухь, – эмирна Исади тилмизриз.

16Тилмизриз и гафар чпив фу гвачирвиляй лагьай хьиз хьанай. 17Абурун гъавурда авай Исади лагьана:

– Фу гвач вуч лагьай чӀал я? Куьне гилани кьатӀузвачни? Куьн гилани гъавурда акьазвачни? Куь рикӀер гилани къванер яз амани? 18Вилер аваз квез аквазвачни? Япар аваз квез ван къвезвачни? Куь рикӀел затӀни аламачни? 19За вад фу вад агъзур итимдиз пай авурла, куьне амукьай кӀусарай шумуд зимбил ацӀурнай?

– ЦӀикьвед зимбил, – жаваб гана абуру.

20– Ирид фу кьуд агъзур итимдиз пай авурла, куьне амукьай кӀусарай шумуд зимбил ацӀурнай?

– Ирид зимбил, – жаваб гана абуру.

21– Куьн гила кьванни гъавурда акьуначни? – лагьана Ада.

Бетсаидада буьркьуьди сагъар хъувун

22Исани тилмизар Бетсаиддиз атана акъатна. Адан патав буьркьуьди гъана ва адак гъил хкӀура лугьуз минетна. 23Исади буьркьуьдан гъил кьуна, ам хуьруьн къерехдиз тухвана, адан вилериз цуькӀуьн вегьена, адал гъилер эцигна хабар кьуна:

– Ваз аквазвай затӀ авани?

24Буьркьуьда кьил хкажна лагьана:

– Заз патавай физвай инсанар тарар хьиз аквазва.

25Ахпа Исади мад адан вилерал гъилер эцигна, буьркьуьди мад атӀумна килигна. Исади ам сагъар хъувуна. Адан вилериз экв хтана. 26Исади, ам кӀвализ рахкурдайла, лагьана:

– Хуьруьз гьахьмир.

Петруди иман къалурун

(МатӀай 16:13-20; ЛукӀа 9:18-21)

27Иса Вичин тилмизар галаз ФилипӀан Кесардин патав гвай хуьрериз фена. Рекье Ада Вичин тилмизривай хабар кьуна:

– Инсанар Зун Вуж я лугьуз рахазва?

28– Садбуру Ягья пайгъамбар, муькуьбуру Ильяс, пуд лагьайбуруни алатай пайгъамбаррикай сад я лугьузва, – жаваб гана абуру.

29– Бес куьне Зун Вуж я лугьузва? – жузун хъувуна Ада.

– Вун Месигь я, – жаваб гана Петруди.

30Ада абуруз Вич Вуж ятӀа масадбуруз лугьун къадагъа авуна.

Исади Вичин кьиникьикай сад лагьай гъилера лугьун

(МатӀай 16:21-28; ЛукӀа 9:22-27)

31Исади Вичин тилмизар «Инсандин Хци гзаф азаб-азиятар чӀугун лазим я», – лугьуз гъавурда тваз хьана.

– Агъсакъалри, чӀехи хахамри, тавратдарри Инсандин Хва кваз кьадач, абуру Адаз кьиникьин жаза гуда, пуд йикъалай Адал чан хкведа, – лагьана Ада.

32И гафар Ада ачухдиз лугьузвай. Амма Петруди, Адаз са къерехдиз эверна, ахьтин чӀуру гафар сивяй акъудмир лагьана. 33Элкъвена Вичин тилмизриз килигиз-килигиз, Исади Петрудин гаф атӀана:

– Алат Залай, иблис! Ви рикӀе авайди Аллагь туш, вибур инсанри ийидай хьтин фикирар я.

34Ахпа Исади халкьдизни Вичин тилмизриз санал эверна.

– Низ Захъ галаз къвез кӀанзаватӀа, къуй ам, чандилайни гъил къачуна, вичин азабрин хашни кӀулаз яна Захъ галаз атурай, – лагьана Ада. – 35Низ вичин чан хуьз кӀанзаватӀа, адавай ам къакъатда, Зун ва Шад Хабар патал ни вичин чан эцигайтӀа, адан чан сагъ жеда. 36Вичин чан пучна вири дуьнья къачуникай инсандиз вуч хийир ава? 37Вичин къакъатай чан элкъвена къахчун патал гудай затӀ инсандиз жагъидани?

38Къенин несил гьикьван чӀур ва чалкечир хьанва! Адакай низ Зунни Зи Гафар кьабулиз регъуь хьайитӀа, Инсандин Хцизни, Вичин Бубадин баркалла алаз, пак малаикрихъ галаз къведайла, гьахьтин касни кьабулиз регъуь жеда.

Currently Selected:

Марк 8: ЛезПК

Highlight

Copy