Марк 7

Михьиди ва чиркинди

(МатӀай 15:1-20)

1Садра Ярусалимдай атай фарисеярни тавратдарар Исадал алтӀушна. 2-5Адан бязи тилмизри чиркин гъилеривди чуьхуьн тавуна фу нез акурла, атанвайбуру Исадивай хабар кьуна:

– Ви тилмизри вучиз бубайрин адетрал амал ийизвач? Абуру вучиз чиркин гъилеривди фу незва?

(Фарисейри ва вири чувудри, бубайрилай инихъ адет хьанвайвал, фу недалди гъилер чуьхуьда. Базардай хтайлани, эл-адет тирвал, чин-гъил чуьхуьн тавунмаз, абуру фу недач. Идалайни гъейри, абуру гзаф маса адетар кьилиз акъудда, къаб-къажах, курар, къажгъанар ва чарпаяр чуьхуьда.)

6Исади абуруз жаваб яз лагьана:

– Куьн хьтин кьве чин алайбурукай Яшаян ктабда хъсандиз кхьенва: «И инсанри мецелди Заз гьуьрмет ийизватӀани, рикӀелди абур Завай яргъа я. 7Абуру Заз ийизвай ибадат гьаваянди я – инсанар абуру Зи тӀалабунрал ваъ, чпиз кӀани къайдайрал амал ийиз вердишарзава»#Яшай 29:13.. 8Куьне, Аллагьди авунвай тагькимар туна, инсанри кутунвай адетар кьунва.

9Ада абуруз мадни лагьана:

– Куьн Аллагьдин тагькимар жуван адетралди дегишардай хъсан устӀарар я! 10Мусадин Къанунда кхьенвай: «Жуван дидедизни бубадиз гьуьрмет ая»#ЭхкъечӀун 20:12; Киххьей Къанун 5:16., «Дидедикайни бубадикай чӀурукӀа рахадайдан жаза кьиникь я»#ЭхкъечӀун 21:17.. 11Амма куьне лугьузва: «инсанди вичин бубадизни дидедиз „за квев вахгана кӀанзавай бурж Аллагьдив ахгакьарда“ лагьайтӀа, 12а касди вичин дидени буба патал са карни тавуртӀани жеда». 13Гьа идалди куьне Аллагьдин гафар куь адетралди эвез ийизва ва ихьтин гзаф маса кӀвалахарни ийизва.

14Исади халкь мад Вичин патав кӀватӀна, лагьана:

– За лугьузвай гафариз хъсандиз яб гана, куьн гъавурда гьат: 15-16къецяй инсандин къенез физвай гьич са затӀунивайни ам чиркин ийиз жедач, инсан чиркин ийизвайди адай вичяй акъатзавайди я.

17Ам халкьдин арадай экъечӀна кӀвализ гьахьайла, Адавай тилмизри а кьисадин мана-метлеб хабар кьуна.

18– Куьнни гьахьтин авамар яни? – жаваб гана Исади. – Къецяй инсандин къенез физвай са затӀунини ам чиркин тийидайдан гъавурда гьатзавачни? 19Къецяй къвезвайди инсандин рикӀиз ваъ, руфуниз физва. Гьанайни ам къецел акъатзава. (Гьа икӀ Исади инсанди незвай вири затӀар михьи тирди малумарна.)

20Исади давамарна:

– Инсан чиркин ийизвайди адай вичяй акъатзавай крар я, 21куьз лагьайтӀа инсандин рикӀин къеняй чӀуру ниятар, явавилер, чуьнуьхунар, кьиникьар, 22зинавилер акъатзава. Мадни ришветар, хъилер, фендигарвал, пехилвал, асивал, кьуру дамах, диливал акъатда. 23Вири и пис крари адан вичин къеняй атана инсан вич чиркин ийизва.

Чувуд тушир папан иман

(МатӀай 15:21-28)

24Гьанай экъечӀна, Иса Туьрс шегьер галай патариз атана. Гьана Ам са кӀвализ фена. Адаз Вич ана масадбуруз чир хьана кӀанзавачир. Амма Адавай а кар чуьнуьхиз хьанач. 25Жин акатнавай руш авай са папаз адакай хабар хьана, ам атана Исадин кӀвачерихъди чилел ярх хьана. 26А паб чувудрикай тушир, ам Суьрия-Финикейдай тир. Ада Исадиз вичин рушакай жин хкуд лугьуз минетзавай. 27Амма Исади лагьана:

– КӀвенкӀве аялар тухарна кӀанда, абурун сивихъай атӀана, фу кицӀериз вегьин хъсан кар туш.

28Амма папа жаваб яз лагьана:

– ГьакӀ я, Агъа. Амма аялри экӀягъандин кӀаник авадарай гъвелер кицӀерални гьалтзава эхир.

29– Ихьтин хъсан жавабдин хатурдай вавай хъфейтӀани жеда, – лагьана Исади. – Ахлад! Ви рушакай жин хкатна.

30КӀвализ хтайла, папаз вичин руш жин хкатна месел къатканваз жагъана.

ЛалакӀ бишиди сагъар хъувун

31Туьрс шегьердин патарив гвай чкайрилай эгечӀна, Иса сифте Сидун галайвал, ахпа Галилейдин вирин патав ЦӀуд-Шегьер галайвалди фена. 32Адан патав са биши лалакӀ гъана, ада вичел гъилер эциг лугьуз, Адаз минетар авуна. 33Исади ам халкьдин арадай къерехдиз тухвана, адан япара тупӀар туна. Ахпа Исади цуькӀуьн#7:33 ЦуькӀуьн – тфу. гана, лалакӀ бишидан мецик кяна. 34Цавуз вил яна, дериндай ухьт аладарна, адаз лагьана:

– Еффата! (яни «Ачух хьухь!»)

35Адан биши япар гьасятда ачух хьана, мезни ахъа хьана, вични михьидаказ рахана. 36Исади и кардикай садазни ахъаймир лагьана эмирна. Амма Ада гьикьван къадагъа авуртӀани, абуру Исадикай амайдалайни гзаф ихтилатар ахъайиз хьана. 37Вирибуру рикӀивай мягьтел хьана лугьузвай:

– Вири крар иердаказ ийизва: бишибурун япар ачухарзава, лалбурун – мецер.

Currently Selected:

Марк 7: ЛезПК

Highlight

Copy