Марк 6

Хайи шегьерда Иса кьабул тавун

(МатӀай 13:54-58; ЛукӀа 4:16-30)

1Анай экъечӀна Иса тилмизарни галаз Вичин ватандиз хъфена. 2Киш югъ алукьайла, Исади синагугда чирвилер гуз гатӀунна. Адаз яб гайи кьванбуру гьейранвилелди лугьуз хьана:

– Вичиз гьихьтин камал ганватӀа аку! Ада Вичин гъилералди гьихьтин аламатар къалурзаватӀа килиг! Икьван аламатар Адаз гьинай атанатӀа?! 3Ам харат устӀар тушни? Ам Майраман хва ва Якьубан, Юсидин, Ягьудан ва Симунан стха тушни? Адан вахарни чи арада авачни?

Абуруз Ам квазни кьаз кӀан хьанач.

4– Пайгъамбар виринра гъилерал жеда, анжах вичин ватанда, юлдашрин ва хизандин арада адаз гьуьрмет жедач, – лагьана Исади абуруз.

5Адавай ватанда са аламатни ийиз хьанач, Адалай алакьайди, азарар квай анжах са шумудал гъилер эцигна, абур сагъар хъувун тир. 6Ам абурухъ иман тахьунал мягьтел хьана. Ада, патарив гвай хуьрериз физ, гьанра чирвилер гуз хьана.

Тилмизар чирвилер гуз ракъурун

(МатӀай 10:1, 9-14; ЛукӀа 9:1-5)

7Исади Вичин патав цӀикьвед илчидиз эверна, абур, Шад Хабар чукӀурун патал, кьве-кьвед ракъуриз хьана. Исади абуруз чӀуру жинерар хкуддай къуватни гана.

8– Асадилай гъейри рекьиз затӀни кьамир – я фу, я гьебе, я пул, – эмирна Ада. – 9КӀвачел сантӀалар алукӀ, жувал алайдалай гъейри маса пекер алукӀмир. 10Са шегьердиз фейила, илифай кӀвале эхирдалди акъваз. 11Са чкада куьн кьабул тавуртӀа ва куь чирвилериз яб тагайтӀа, анай экъечӀна хъфидайла, виридаз аквадайвал, куь кӀвачерал ацукьай ругни кӀвах хъувуна ахлад. Гьадалди куьне виликамаз Аллагьди абуруз гудай жазадикай хабарда.

12Исадин илчийри фена инсанриз, ша Аллагьдин рекьел элячӀ лугьуз, вязер-несигьатар ийизвай. 13Абуру гзафбурукай жинерар хкудзавай, азарар квай гзафбур, зейтундин чӀем гуьцӀиз, сагъар хъийизвай.

Ягья пайгъамбардин кьиникь

(МатӀай 14:1-12; ЛукӀа 9:7-9)

14Исадин ТӀвар машгьур хьанвай, Гьируд пачагьдизни Адакай хабар хьана. Садбуру лугьузвай:

– Ам вичел чан хтанвай Ягья пайгъамбар я, гьакӀ хьайила адалай аламатарни алакьзава.

15Муькуьбуру «Ам Ильяс я», пуд лагьайбуруни «Ам виликан пайгъамбарриз ухшар са пайгъамбар я» лугьузвай. 16Гьирудаз и ван хьайила, ада лагьана:

– Ам за кьил атӀай Ягья я. Адал чан хтанва.

17Гьа и Гьируда, вичин стха ФилипӀан паб Гьирудат къахчурла, Ягья кьуна къазаматда тун эмирнай, 18куьз лагьайтӀа Ягьяди адаз лугьуз хьанай:

– Жуван стхадин паб къахчун гьарам я.

19Гьирудатаз адакай акьван хъел авай хьи, адаз Ягья яна рекьиз кӀанзавай, амма алакьзавачир. 20Гьируда Ягья Гьирудатакай хуьзвай. Гьирудаз Ягьядихъай кичӀедай. Ягья пак ва гьахъ-михьи инсан тирди Гьирудаз чизвай, ада Ягьядин ихтилатрихъ рикӀ алаз яб акалдай. А ихтилатри ам кьве рикӀин ийизвайтӀани, ада датӀана абуруз хушвилелди яб гудай. 21Амма Гьирудат патал са къулай югъ атана алукьнай. Гьируда, вичин хайи югъ хьуниз килигна, вичин гъилибанриз, аскеррин кьилевайбуруз ва Галилейдин агъсакъалриз эвернай, межлис кутунай. 22Гьирудатан руша атана кьуьлер ийидайла, ам Гьирудазни адахъ галаз ацукьнавайбуруз рикӀиз чими хьанай.

– Завай вуч кӀандатӀани тӀалаба, за ваз гуда, – лагьанай Пачагьди рушаз.

23Ада рушаз кьин кьунай:

– Ваз вуч кӀан хьайитӀа, за ваз гьам гуда, кӀандатӀа ваз зи пачагьлугъдин са пайни гуда.

24Руша экъечӀна вичин дидедивай хабар кьунай:

– Адавай вуч тӀалабин?

– Ягья пайгъамбардин кьил тӀалаба, – жаваб ганай дидеди.

25Адани, тади кваз пачагьдин патав фена, лагьанай:

– Заз исятда вуна синида аваз Ягья пайгъамбардин кьил гъана кӀанзава.

26Пачагь гзаф пашман хьанай, амма, мугьманар алай чкадал кьин кьуниз килигна, адаз «ваъ» лугьуз кӀан хьаначир. 27Гьасятда жаллатӀ ракъурна, Ягьядин кьил гъун эмирнай. ЖаллатӀдини фена къазаматда Ягьядин кьил атӀанай, 28синидал алаз гъанай, рушав вуганай. Рушани тухвана кьил вичин дидедив вахганай. 29Ягьядин тилмизриз и кардикай хабар хьайила, абуру атана адан мейит къахчуна, тухвана сура кучукнай.

Вад агъзур кас тухарун

(МатӀай 14:13-21; ЛукӀа 9:10-17; Ягь. 6:1-13)

30Исадин патав илчияр хтана кӀватӀ хьана, абуру Адаз чпи авур крарикай ва гайи чирвилерикай ахъайна.

31– Куьн кьилди са хелвет чкадиз алад, ана са тӀимил ял ягъ, – лагьана абуруз Исади.

Вучиз лагьайтӀа абур авай чкадиз инсанар къвез-хъфизвай, Исадизни илчийриз са кӀус фу недай вахтни жезвачир. 32ГьакӀ хьайила, Иса, илчийрилай гъейри касни галачиз, луьткведа аваз са хелвет чкадиз фена. 33Халкьдиз абур фейиди акуна, гзафбуруз абур вужар ятӀа чир хьанвай, гьавиляй абур физвай чкадиз вири шегьеррай инсанар абурулай вилик кӀвачи-кӀвачи атана. 34Луьткведай эвичӀна килигайла, Исадиз гзаф халкь кӀватӀ хьанваз акуна. Абур чубан галачир хипер хьиз аквазвай. Абурун язух атана, Исади абуруз чирвилер гуз эгечӀна. 35Вахт геж хьуниз килигна, Адан тилмизри, Адав агатна, лагьана:

– Вахтни геж я, инагни хелвет чка я. 36Вуна абур ахъая. Абуру фена патарив гвай хуьрерай чпиз недай затӀар къачурай.

37– Абуруз куьне тӀуьн це, – жаваб гана Ада.

– Абуруз тӀуьн гун патал, гила чна фена кьве виш динар жагъурдани? – лагьана тилмизри.

38Амма Исади абурувай хабар кьуна:

– Квев шумуд фу гва? Алад, фена килиг.

Чирайдалай кьулухъ абуру хтана жаваб гана:

– Чав вад фуни кьве гъед гва.

39Ада халкь къацу векьел кӀватӀал-кӀватӀал ацукьарун эмирна. 40Виш-виш, яхцӀурни цӀуд-яхцӀурни цӀуд инсан жерге-жерге хьана чилел ацукьна. 41Ада вад фуни кьве гъед къачуна, цавуз килигна, хийир-дуьа ийиз-ийиз, фу кӀус-кӀус авуна, Вичин тилмизрив инсанриз паюн патал вугана, кьве гъедни виридаз пайна. 42ТӀуьна вири тух хьана. 43Амукьай фан ва гъетрен кӀусарай цӀикьвед зимбил ахцӀурна. 44ТӀуьрбурун кьадар вад агъзур кьван итим тир.

Иса целай фин

(МатӀай 14:22-33; Ягь. 6:16-21)

45Идалай кьулухъ Исади, инсанар ахъай тавунмаз, тилмизриз луьткведа акьах лагьана ва абур Галилейдин вирин а пата авай Бетсаиддиз Вичелай вилик ракъурна. 46Инсанар ахъайна, Ам дуьаяр ийиз пелел хкаж хьана. 47Няни хьайила, тилмизар авай луьткве вирин юкьвал, Иса лагьайтӀа, ялгъуздиз къерехдал алай. 48Исадиз кьусуйри#6:48 Кьусу – луьткве гьалун патал герек йирф хьтинди. тилмизрал гуж акъалдарзавайди акунай, куьз лагьайтӀа гар луьткведиз аксиди тир. Экв жедай кьиляй Иса вирелай тӀуз абур галай патахъ фена. Ам луьткведилай алатна финни мумкин тир, 49-50амма вирелай тӀуз къвезвай Иса акурла, и кар чпин вилерикай карагзавайди хьиз хьайи тилмизрай кичӀела гьараяр акъатна.

– КӀевиз акъваз, им Зун я, кичӀе жемир, – лагьана Исади.

51Ам абурун луьткведа акьахайла, гар секин хьана. Тилмизар лап мягьтел хьанвай. 52Исади гзаф инсанар вад фалди тухарунин гъавурда абур гилани гьатнавачир. Абурун рикӀер буьркьуь тир.

Генисаратда азарри кьунвайбур сагъар хъувун

(МатӀай 14:34-36)

53Исани тилмизар вирелай яна фена Генисаратдин чилерин са къерехдал акъвазна. 54Абур луьткведай эвичӀайла, анин жемятдиз Иса гьасятда чир хьана. 55Иса флан чкада ава лагьана ван хьайи инсанри, вири патарай къвез, месерал алаз азарри кьунвайбур гъиз хьана. 56Хуьруьз, шегьердиз, къазмайрал – гьиниз Ам фейитӀани, азарри кьунвайбур гъана майданрал эцигдай. Адаз, Вичин пекерин ценцин цӀирхиник кьванни азарри кьунвайбурув са тӀуб кягъиз тур лугьуз, минетдай. Адак гъил хкӀурбур дири хъжедай.

Currently Selected:

Марк 6: ЛезПК

Highlight

Copy