ЛукӀа 20

Исадин ихтияр

(МатӀай 21:23-27; Мрк. 11:27-33)

1Йикъарикай са юкъуз Исади Аллагьдин КӀвале инсанрин вилик чирвилер гуз, абурал Шад Хабар агакьарзавайла, Адан патав агъсакъаларни чӀехи хахамар галаз тавратдарар атана.

2– Вуна ийизвай и крар гьикӀ лагьана ийизва? – жузуна абуру. – Ваз а ихтияр ни гана?

3– За квевайни са кардикай хабар кьада, – жаваб гана Исади, – куьнени Заз жаваб це: 4Ягьяди инсанрив чпиз кӀан хьана цик акахьун къачуз тазвайни, я тахьайтӀа, Аллагьдин къастуналди?

5Абуру чпи чпихъ галаз веревирдер авуна:

– Чна «Аллагьдин къастуналди» лагьайтӀа, Ада хабар кьада: «Бес куьн Ягьядихъ вучиз агъунач?» 6«Инсанриз чпиз гьакӀ кӀан хьана» лагьайтӀа, вири жемятди къван гана чун рекьинни мумкин я, вучиз лагьайтӀа Ягья гьакъикъи пайгъамбар тирдан вири халкь чӀалахъ жезва.

7Гьавиляй абуру жаваб гана:

– Ам гьикӀ ятӀа, чаз чидач.

8– Зани квез а крар За ни ихтияр гана ийизватӀа лугьудач, – лагьана Исади.

Пис ципицӀбанрикай кьиса

(МатӀай 21:33-46; Мрк. 12:1-12)

9Халкьдиз Исади ихьтин кьиса ахъайна:

– Са инсанди ципицӀбагъ кутуна, ам вичиз кӀвалахиз кьунвай ципицӀбанрив вугана, вич яргъал вахтаралди сиягьатдиз фена. 10Вахт атайла, ада ципицӀбанрин патав вичиз къвезвай майвайрин пай къахчуз вичин нуькер ракъурна, амма ципицӀбанри ам гатана ва затӀни гвачиз элкъуьрна рахкурна. 11Мад маса вач-хъша ракъурна; амма гьадазни бегьем гатунар кьуна, беябур авуна чукурна, затӀни гвачиз ам элкъуьрна кьулухъ рахкурна. 12Ахпа ада пуд лагьай вач-хъша ракъурна, гьамни абуру хер-кьацӀ авуна элкъуьрна рахкурна.

13Инал ципицӀбагъдин иесиди лагьана: «За вуч авуртӀа хъсан я? За зи рикӀ алай хва ракъурда; ам акурла, абуруз, белки регъуь жен».

14Амма ам акурла, ципицӀбанри чпи чпин арада веревирдер авуна: «Им варис я; ша, ирс чал гьалтун патал, чна ам рекьин». 15Абуру ам, ципицӀбагъдай акъудна, кьена гадарна.

Гила ципицӀбагъдин иесиди абуруз вуч ийида? 16Ада атана а ципицӀбанар рекьида ва ципицӀбагъни масадбурун гъиле вугуда.

И гафар ван хьайибуру лагьана:

– Аллагьди яргъазрай!

17Амма Исади, абуруз килигна, лагьана:

– «УстӀарри кваз такьуна гадарай къванцикай хандакӀдин пипӀе твадай кьилин къван хьана»#Забур 117:22. лагьана кхьенвай гафарин метлеб вуч я? 18Гьар вуж а къванцел алукьайтӀа, адан чин-гъил алатда, нел а къван аватайтӀа, ам а къванци шупӀда.

19АлакьнайтӀа, чӀехи хахамрини тавратдарри Иса инал аламаз кьуна къазаматда твадай. И кьисани Ада абурун аксина ахъайнавайдан гъавурда абур гьатнавай, амма абуруз халкьдихъай кичӀезвай.

Пачагьдиз гудай харж

(МатӀай 22:15-22; Мрк. 12:13-17)

20Абур, Исадилай вил алуд тийиз, Адан геле къекъвезвай. Ам гафунал кьуна Римдин сердердин гъиле тун патал, Адал чеб винелай гьахъ-михьи яз къалурдай, амма рикӀ чӀулав жасусар гьалдарнавай.

21– Я Муаллим! – Исадивай хабар кьуна абуру. – Ви ихтилатар ва Вуна гузвай чирвилер гьахъбур тирди, Вуна чин чуьхуьдай гафар тийидайди чаз чизва. Вуна Аллагьдин рекьерни гьакъикъидаказ къалурзава. 22Римдин пачагьдиз харж гун дуьз кар жезвани, жезвачни?

23Исади, абуруз чӀуру ният авайди чиз, лагьана:

24– Зун килигун патал, са динар гъваш. Идал алай шикил ва кхьенвай тӀвар нинди я?

– Пачагьдинди я – жаваб гана абуру.

25– ГьакӀ хьайила, – лагьана Исади, – пачагьдин пай пачагьдиз це, Аллагьдин пай – Аллагьдиз.

26Абуруз халкьдин вилик Исадин гафарай Ам кьуна къазаматда твадай делилар жагъанач. Абур Адан жавабдал мягьтел хьана, кисна акъвазна.

Кьейибурал чан хтуникай

(МатӀай 22:23-33; Мрк. 12:18-27)

27Гьа вахтунда кьейидалай кьулухъ инсандал чан хкведач лугьудай сакъайрикай са бязибуру атана Исадивай жузуна:

28– Я Муаллим! Мусади чаз кхьенай хьи, «паб аваз аялар авачирди кьейитӀа, къуй муькуь стхади адан паб къахчуна вичин стхадин тухум кухтурай»#Киххьей Къанун 25:5-6.. 29Ирид стха хьана: сад лагьай стхади паб гъана, амма ам аялар тахьана кьена. 30Адан паб кьвед лагьай стхади къахчуна, аялар тахьана гьамни кьена. 31Пуд лагьай стхани гьакӀ хьана. А паб ирид стхадини къахчунай, амма садахъни аялар хьанач. 32Абурулай кьулухъ пабни хкьена. 33Ам ирид стхадик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

34Исади жаваб яз лагьана:

– И чилел алай садбур гъуьлуьз физва, муькуьбуру папар гъизва. 35Амма кьейидалай кьулухъ чан хтайбурукай лайих авайбуру гележегда паб тагъана ва я гъуьлуьз тефена уьмуьр тухуда. 36Малаикар хьтинбур хьана, абур рехкьидач. Аллагьди абурал чан хкуниз килигна, абурукай Аллагьдин веледар жеда. 37Кьейибурал чан хтуникай рахайтӀа, Мусадин Тавратда цӀай кьуна кузвай къукъвадин валарикай кхьенвай цӀарара Реббидиз Ибрагьиман, Исакьан ва Якьубан Аллагь лугьузва. 38Аллагь кьейибурун ваъ, чан алайбурун Аллагь я, Аллагь патал вири чан алайбур я.

39Инал тавратдаррикай са бязибуру лагьана:

– Вуна хъсан лагьана, Муаллим!

40Мад Адавай са куьникайни хабар кьадай жуьрэт абуру хъувунач.

Месигь – Давуд пачагьдин Хва яни?

(МатӀай 22:41–23:7; Мрк. 12:35-39)

41Исади Вичин вязер давамарна:

– Месигьдиз Давудан Хва вучиз лугьузвайди я? 42-43Забурда Давуда вичи лагьанва эхир: «Реббиди зи Агъадиз лагьанай: „Ви душманар За ви кӀвачерик вегьидалди атана Зи эрчӀи гъилихъай ацукь“»#Забур 109:1..

44Давуда Месигьдиз Агъа лугьуз хьайила, Ам Давудан Хва гьикӀ жезвайди я?

45Вири халкьди яб гудайла, Ада Вичин тилмизриз лагьана:

46– Тавратдарриз яргъи пекер алаз майданрал чеб къалуриз кӀанзава, абурун рикӀ халкьди чпиз гьуьрмет авун къалурунал ала. Синагуграни межлисра абур вилик чкаяр кьаз алахъда. Абурукай яргъаз хьухь! 47Абуру, кьве чин алайбуру хьиз, яргъалди дуьаярдай амалар ийиз, хендедайрин кӀвал-югъ тӀуьна куьтягьда. Амма Аллагьдин патай абурув лап кӀеви жаза агакьда.

Currently Selected:

ЛукӀа 20: ЛезПК

Highlight

Copy