Ягья 15

Иса – ципицӀ ЧӀере

1ЦипицӀдин халисан ЧӀере – Зун я, Зи Бубани ципицӀбан я. 2Майваяр тегъидай Зи гьар са хел Ада атӀузва, майваяр гъидай гьар са хел, амайдалайни гзаф майваяр гъурай лугьуз, Ада михьзава. 3Зи гафариз яб гана куьн михьи хьанва. 4Куьн За хьухь, Зунни кве жеда. ЧӀередикай атӀай хилевай гьикӀ майваяр гъиз жедачтӀа, гьакӀ квевайни Закай чараз майваяр гъиз жедач. 5Зун ЧӀере я, куьн – хилер. Вуж За аватӀа ва Зун не аватӀа, гьада бул майваярни гъида, амма Зун галачиз квелай затӀни алакьдач. 6Вуж За амукьдачтӀа, гьам гадарнавай хел хьиз жеда, ам кьурада, ахьтин хилер кӀватӀна цӀуз вегьида, абур куда. 7Куьн За амукьайтӀа, Зи гафарни кве хьайитӀа, гьа чӀавуз квез вуч кӀан хьайитӀани, тӀалаб ая, квез гуда. 8Зи тилмизар яз куьне бул майваяр гъиз жеда, гьадалди Зи Бубади Вичин баркалла къалурда.

9Зун Бубадиз кӀан хьайивал, Зазни куьн гьакӀ кӀан хьанва. Зи кӀанивиле аваз уьмуьр твах. 10За Зи Бубадин тагькимриз яб гуз, Зи Бубадин кӀанивиле аваз гьикӀ уьмуьр тухузватӀа, гьакӀ куьнени, Зи тагькимриз яб гайитӀа, Зи кӀанивиле аваз уьмуьр тухуда. 11За и гафар Зи шадвал квехъ галаз хьун ва куь шадвал ацӀайди хьун паталай лагьанвайди я. 12За квез ихьтин тагьким ийизва: Зун квез кӀанзавайвал, гьакӀ квезни садаз сад кӀан хьухь. 13Виридалайни чӀехи кӀанивал – жуван дустар патал чан гун я. 14За лугьузвай гафар куьне кьилиз акъудзаватӀа, куьн Зи дустар я. 15ЛукӀраз вичин агъади вучзаватӀа чир жедач. За жуван Бубадивай ван хьайи кьван вири квез чирна. Гьавиляй мад За квез лукӀар лугьузмач. Куьн Зи дустар я. 16Зун куьне хкянач, куьне ийидай крарин майваяр китӀидайбур тахьун патал, куьн хкягъайди Зун я. Куьне Зи Бубадивай Зи ТӀварцӀелай вуч тӀалабайтӀани, гьам Ада квез гуда. 17Ингье квез Зи тагьким: садаз сад кӀан хьухь.

Дуьньядиз Исани тилмизар такӀан хьун

18Дуьньядиз куьн такӀан ятӀа, рикӀел хуьх, адаз Зун квелайни вилик такӀан тир. 19Куьн и дуьньядикай тиртӀа, дуьньядиз куьн вичинбур хьиз кӀан жедай. Амма куьн и дуьньядикай туш; И дуьньядай За куьн хкягъайвиляй дуьньядиз куьн такӀан я. 20За квез «Нуькер вичин иесидилай артух туш» лагьай гаф рикӀел хкваш. Зун хурук кутунватӀа, куьнни хурук кутада; дуьньяди Зи гаф кьилиз акъудзавайтӀа, ада куь гафни кьилиз акъуддай. 21Инсанриз Зун Ракъурнавайди течизвайвиляй, Зун себеб яз абуру куьн хурук кутунва. 22За атана Зи гафар абуруз лагьаначиртӀа, абурук гунагь тахсир жедачир. Амма гила абурухъ чеб гьахъардай са делилни авач. 23Низ Зун такӀан ятӀа, гьадаз Зи Бубани такӀан я. 24Залай гъейри, садавайни тежедай крар За абурун арада тавунайтӀа, абурук гунагь жедачир. Амма абуруз За авур кьван крар вири акунатӀани, абуруз Зунни Зи Буба такӀан я. 25Гьа и саягъда абурун Къанунда кхьенвай «Зун себеб авачиз такӀан хьана»#Забур 34:19; 68:5. лугьудай гафар кьилиз акъатна. 26За Бубадин патавай квез Несигьатдар ракъурда. Ам – Гьакъикъатдин Руьгь – Бубадин патавай куь патав къведа ва Зи гьакъиндай квез шагьидвал ийида. 27Куьнени Закай шагьидвал ийида: куьн Захъ галаз лап гьа сифте йикъалай хьайибур я.

Currently Selected:

Ягья 15: ЛезПК

Highlight

Copy