Ягья 13
13
Тилмизрин кӀвачер чуьхуьн
1 Песагь суварин вахт мукьва жезвай. Исадиз Вич и дуьньядай Бубадин патав хъфидай вахт атанвайди чизвай. И дуьньяда Вичихъ галаз санал хьайибур Вичиз гьикьван пара кӀан ятӀа, Ада эхирдалди къалурна. 2Вири нянин суфрадихъ ацукьнавай. Исадиз хаинвал авунин фикир иблисди Искарият Симунан хва Ягьудан рикӀе тунвай. 3Исадиз Вич Аллагьдин патавай атанвайди ва Аллагьдин патав хъфидайди чизвай. ГьакӀни Адаз Аллагьди вири Вичин ихтиярда тунвайдини чизвай. 4Ам суфрадихъай къарагъна, Ада винелай алукӀнавай парталар хтӀунна, юкьва дасмал туна. 5Ахпа Ада лигенда яд цана, Вичин тилмизрин кӀвачер чуьхуьз, юкьва авай дасмалдалди михьи ийиз эгечӀна. 6Гьа икӀ нубат Симун-Петрудал агакьна.
– Я Агъа! – лагьана Исадиз Петруди. – Ваз рикӀивайни зи кӀвачер чуьхуьз кӀанзавани?
7– За ийизвай кардин гъавурда вун исятда ваъ, адан гъавурда вун геж акьада, – жаваб гана Исади.
8– Вуна зи кӀвачер гьич са чӀавузни чуьхуьз тахьуй, – лагьана Петруди.
– За абур чуьхуьн тавуртӀа, вун Заз талукь жедач, – лагьана Исади.
9– Я Агъа! – лагьана Симун-Петруди. – АкӀ ятӀа, са кӀвачер ваъ, гъилерни, кьилни чуьхуьх.
10– Вири беден чуьхвенвайда тек са кӀвачер чуьхуьн лазим я, – лагьана Исади, – вучиз лагьайтӀа адан беден михьи я; куьнни михьи я, амма вири – ваъ.
11Вич ни маса гудатӀа Адаз чизвай, гьакӀ хьайила Ада «Куьн вири михьи туш» лагьанай. 12Тилмизрин кӀвачер чуьхвена, Вичин пекер ахлукӀайла, Ада хтана суфрадихъ ацукьна, абуруз лагьана:
– За авурдан гъавурда куьн гьатнани? 13Куьне Заз «Я Агъа», «Муаллим» лугьузва. ГьакӀ лугьунал куьн гьахъ я, Зун куьне лугьузвайди я. 14За, куь Муаллимди ва Агъади, куь кӀвачер чуьхвенатӀа, куьнени сада садан кӀвачер чуьхуьн лазим я: 15За квез чешне къалурнава, За квез авурвал куьнени ая. 16За квез лап рикӀивай лугьузва: нуькер вичин иесидилай артух туш, илчини вич ракъурайдалай артух туш. 17Гила квез и кар чизва, куьне гьакӀ ийиз хьайитӀа, куьн бахтавар жеда. 18Зун квекай виридакай рахазвач. За хкянавайбур Заз чизватӀани, Каламда кхьенвай ихьтин гафарни кьилиз акъатун лазим я: «Захъ галаз фу тӀуьрди Заз акси хьана»#Забур 40:10.. 19И кӀвалахар кьиле фидай чӀавуз куьне Зун гьакъикъатда Вуж ятӀа Гьам Тирдан чӀалахъ хьун патал, За квез и гафар исятда виликамаз лугьузва. 20За квез лап рикӀивай лугьузва: За ракъурай кас кьабулдайда Зунни кьабулда ва Зун кьабулдай касди Зун Ракъурайдини кьабулда.
Ягьуда Иса маса гун
21Ахпа Исади чӀехи гъалаба кваз лагьана:
– За квез лап рикӀивай лугьузва: квекай сада Зун хаинвилелди маса гуда.
22Ам никай рахазватӀа тийижиз, Адан тилмизар сад садаз килигиз амукьна. 23Исадин рикӀ алай са тилмиз Адав агатна ацукьнавай. 24Симун-Петруди адаз, Исадивай хаин вуж ятӀа чирун патал, ишара авуна. 25Ада, Исадихъ алгъана#13:25 Алгъун – юкь агъузун., «Ам вуж хьуй, я Агъа?» лагьана Адавай жузуна.
26– Ам, куруна авай хуьрекдик фан кӀус кяна За низ гайитӀа, гьам я, – жаваб гана Исади.
КӀус кяна, Ада ам Искарият Симунан хва Ягьудав вугана. 27Фан а кӀус къачурдалай кьулухъ, Ягьудак гьасятда иблис акатна. Гьа чӀавуз Исади лагьана:
– Вуна ийидай кар фадамаз ая.
28И гафар Исади адаз вучиз лагьанатӀа, ацукьнавайбурукай касни гъавурда гьатнач. 29Абуруз Ягьудав чпин уртах пул хьуниз килигна, Исади адаз сувариз чпиз герек затӀар къачу, я тахьайтӀа кесибриз затӀ-матӀ це лагьайди хьиз хьана. 30Ам фан кӀус къачуна гьасятда кӀваляй экъечӀна. Йиф тир.
Исадин цӀийи тагьким
31Ягьуд экъечӀайла, Исади лагьана:
– Инсандин Хци Вичин баркалла къалурдай вахт алукьнава. Гьа идалди Аллагьди Вичин баркаллани къалурда. 32Инсандин Хци Аллагьдин баркалла къалурзава, Аллагьдини Вичин баркалла Инсандин Хциз багъишда. И кар лап мукьвара жеда.
33Чан балаяр! Квехъ галаз Зун яргъалди амукьдач: Куьн Захъ къекъвез жеда. За виликдай чувудрин кьиле авайбуруз лагьанай: «Зун физвай чкадиз квевай къвез жедач». Гьа и гафар гила За квезни лугьузва. 34За квез цӀийи тагьким ийизва: садаз сад кӀан хьухь. Заз куьн гьикӀ кӀандайтӀа, квезни куьн гьакӀ кӀан хьун лазим я. 35Квез садаз сад кӀан хьайила, гьар са касдиз куьн Зи тилмизар тирди чир жеда.
Петруди кьил къакъудуникай
(МатӀай 26:33-34; Мрк. 14:29-30; ЛукӀа 22:33-34)
36Симун-Петруди Исадиз лагьана:
– Я Агъа! Вун гьиниз физва?
– Зун гьиниз физватӀа, вавай Захъ галаз исятда къвез жедач, амма ахпа Зи гуьгъуьна аваз вунни къведа, – жаваб гана Исади.
37– Я Агъа! – хабар кьуна Петруди. – Вучиз завай Вахъ галаз исятда къвез жедач? Вун патал за зи чанни гуда.
38– Вуна Зун патал чан гуда лугьузвани? – жаваб гана Исади. – За ваз лап рикӀивай лугьузва: кӀекре гьарайдалди вуна пудра Закай кьил къакъудда.
Currently Selected:
Ягья 13: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
