Хьунухь 25

Ибрагьиман маса несилар ва адан кьиникь

1Ибрагьима мад гъилера паб хкана, ва КъетӀура тӀвар алай цӀийи папа 2адаз Зимран, Якьшан, Медан, Мидиян, Ишбакь ва Шуагь тӀварар алай рухваяр хана. 3Якьшаназ Шебани Дедан хьана. Деданан несилар ашурвияр, летӀушар ва леумар я. 4Мидиянан рухваяр: Гефа, Эфер, Гьенух, Абида ва Элдага. Ибур вири КъетӀурадин несилар я. 5Вичихъ вуч аватӀани Ибрагьима Исакьав туна. 6Гьагарани КъетӀуради хайи рухваяр, булдалди девлетни багъишна, Ибрагьима гьеле вичел чан аламаз рагъэкъечӀдай патахъ – рагъэкъечӀдай патан чилерал, Исакьакай яргъаз – акъудна. 7Ибрагьиман вишни пудкъанни цӀувад йис хьана. 8Ам лап къадим яшарин къужа яз, уьмуьрдикай тух хьана, кьена, – рагьметдиз фена ва бан-бубайрин патав хъфена. 9Рухваяр тир Исакьани Исмаила ам Мамредикай са акьван яргъаз тушиз, хети Цагьаран хва Эфранан чуьлда авай Махпела тӀвар ганвай кьветӀе кучукна. 10Ибрагьима и чуьл хетийривай маса къачунай; ана Ибрагьимни Сарра кучукнава. 11Ибрагьим кьейидалай кьулухъ Аллагьди адан хва Исакьаз хийир-дуьа авуна. Исакь Беэр-Лахай-Руидин патарив уьмуьр тухуз хьана.

Исмаилан несилар

12Ингье Исмаилакай – Саррадин къаравуш мисриви Гьагара хайи Ибрагьиман хцикай, ва адан несилрикай ихтилат. 13ЧӀехидалай гъвечӀидалди Исмаилан рухвайрин тӀварар: Небаят (Исмаилан сифте хва), Къедар, Адбегьел, Мибсам, 14Мишмагь, Дума, Маса, 15Хадад, Тема, ЯтӀур, Нафиш ва Къедма. 16Ибур Исмаилан рухваяр я, цӀикьвед тайифадин цӀикьвед регьбер, – абурун тӀварар, хуьрериз ва куьч акъвазай чкайриз ганва. 17Вишни къанни цӀерид йис хьайидалай кьулухъ Исмаил кьена – рагьметдиз фена ва бан-бубайрин патав хъфена. 18Адан несилри Гьавиладилай эгечӀна Мисридин сергьятрив гвай – Ашурдиз фидай патахъ, – Шурдал кьван экӀя хьанвай чилерал бине кутуна ацукьна. Абур муькуь стхайрихъ галаз чуьруькра аваз уьмуьр тухвана.

Рефикъади кьветхверар хун

19Ингье Исакьакай – Ибрагьиман хцикай ихтилат. Ибрагьимаз Исакь тӀвар алай хва хьана. 20Исакьа Падан-Арамдай тир Бетуэлан руш Рефикъа пабвиле къачурла, адан яхцӀур йис тир; ам арамви Лабанан вах тир. 21Исакьа аялар жезвачир вичин папан патахъай Реббидиз дуьа ийиз хьана, Реббидини адан минетдихъ яб акална: Рефикъа руфунал залан хьана. 22Адан рухваяр руфуна чеб-чпихъ галаз кикӀиз хьана. «Гьа икӀ, – лагьана Рефикъади, – вучиз заз ихьтин кар хьана?» Ам Реббидивай хабар кьаз фена.

23Реббидини адаз лагьана:

«Ви руфуна кьве халкь ава,

ви къеняй кьве тайифа экъечӀда.

Сада масад кӀаник кутада

ва чӀехиди гъвечӀидаз лукӀ жеда».

24Вахт агакьайла – кьве кьветӀхвер дуьньядиз атана. 25Сад лагьайди и дуьньядиз расуди ва, гьайвандин хам хьиз, бегьем чӀарчӀи кьунвайди яз атана; адаз Эсав лагьана тӀвар гана. 26Адан гуьгъуьналлаз, гъилелди Эсаван дабан кьуна, муькуьдини пайда хьана; адал Якьуб#25:26 Якьуб – чувуд чӀалалди «дабан кьурди» гафуниз мукьва я. тӀвар эцигна. Абур хьайила Исакьан пудкъад йис тир.

27Гадаяр чӀехи хьана. Эсавакай зирек гъуьрчехъан, чуьллерин итим хьана, Якьубакай – кисай къуларбан. 28Абурун буба Исакьаз гъуьрчерин як нез кӀандай, гьавиляй Эсав артух яз кьунвай, амма дидедиз, Рефикъадиз, Якьуб гзаф кӀандай.

Эсава чӀехи хвавилин дережа маса гузва

29Са гъилера Якьуба хапӀа гьазурдайла, Эсав галатна гъуьрчяй хтана.

30«Зун галатнава, – лагьана ада Якьубаз. – Идакай, ингье а яру чӀиргъиндакай недайди це! Гьавиляй адаз Эдамни#25:30 Эдам – чувуд чӀалалди «яру» гафуниз мукьва я. лугьузвай». 31«ЧӀехи аял тирвилин ихтиярдихъ галаз дегишун яз», – жаваб гана Якьуба. 32«Хъсан я. ЧӀехи аял хьуникай заз вуч хийир ава? – лагьана Эсава. – Зун исятда рекьида!» 33«Сифте кьин це!» – лагьана Якьуба. Эсава вич сифте аял тирвилин ихтияр Якьубав вахгузва лагьана, кьин кьуна, 34ва Якьуба адаз фуни мержемекдин хапӀа гана. Ам, тӀуьна-хъвана, къарагъна фена – чӀехи аял хьунин ихтиярдикай адаз гьич къайгъуни тушир.

Currently Selected:

Хьунухь 25: ЛезПК

Highlight

Copy