Хьунухь 20

Ибрагьимни Сарра Абумелекан патав

1И чкаяр туна, кьибледихъ хъфена, Ибрагьим Къадешдинни Шурдин арада уьмуьр тухуз хьана, ахпани Герарда бине кутуна. 2Ада вичин паб Саррадиз вичин вах лугьузвай, гьавиляй Абумелека, Герардин пачагьди, Саррадин гуьгъуьниз итимар ракъурна ам вичиз къачуна. 3Амма йифиз Абумелеказ ахварай Аллагь акуна ва Ада лагьана: «И паб жуваз къачунай вун рекьида. Ам гъуьлуьк квайди я».

4Абумелека лагьайтӀа, адал гьеле тӀубни эцигнавачир. «Зи Агъа! – ялварна ада. – Яраб Вуна гьахъ-михьи халкь терг ийида жал? 5Бес а касди вичи заз ам вичин вах я лагьанай эхир! Папани ам вичин стха я лагьанай! За и кар намус михьи яз, гъилерикни тахсир квачиз авурди я».

6«Эхь, – жаваб гана Аллагьди ахварай, – Заз чизва хьи, вуна и кар ягь михьи яз авуна. Гьавиляй За ваз а паб жуванди ийидай мумкинвал ганач – вун Зи вилик гунагькар хьуникай хвена. 7Амма гила ам гъуьлуьв вахце. Ам пайгъамбар я, ва ада вун текьена амукьун патал дуьа ийида. Чир хьухь: вуна ам гъуьлуьв вахкун тавуртӀа, вунни рекьида, ви патарив гвайбурни!»

8Пакамахъ Абумелека вичин мукьувар кӀватӀна, абурув и гафар агакьарна – абурузни гзаф кичӀе хьана. 9Абумелека Ибрагьимаз эверна ва адаз ахмур авуна: «Вуна чаз вуч ийизва? За ваз вуч писвал авуна хьи, вуна зунни, вири зи пачагьлугъни ихьтин чӀехи гунагьдик кутадайвал? Ихьтин кӀвалахар авуна жедач! 10Вуна икӀ вучиз авуна?» 11«И патара Аллагьдихъай кичӀезвайди туш, ва паб себеб яз зун яна рекьида лагьана фикир авунвай за, – жаваб гана Ибрагьима. – 12Идалайни гъейри, ам рикӀивайни зи вах я – зи бубадин руш я, анжах маса папаз хьанвай. Адакай заз паб хьана. 13Аллагьди заз бубадин кӀвал туна экъечӀун эмир гайила, зани адаз лагьана: „Мергьемет ая, чун гьиниз фейитӀани, закай лагь хьи, зун ви стха я“».

14Абумелека Ибрагьимаз лапагар, малар, лукӀар, къаравушар пишкешна, адав Сарра вахкана 15ва лагьана: «Вири зи чилер ви вилик ква: ваз гьина кӀандатӀа, гьана уьмуьр твах».

16Саррадиз ада лагьана: «За ви стхадиз гимишдин агъзур шекъел гузва. Идани мукьвабурун вилера ви бейкефвал кӀевда, ва ви намус вичин чкадал хкида».

17Ибрагьима Аллагьдиз дуьа авуна, Аллагьдини Абумелек, адан паб ва къаравушар сагъар хъувуна ва абуруз мад аялар жез хьана. 18Идалай вилик лагьайтӀа, Ибрагьиман паб Сарра себеб яз Реббиди Абумелекан кӀвалин вири папар аялар тежедайбур авунвай.

Currently Selected:

Хьунухь 20: ЛезПК

Highlight

Copy