Крар 11

Петруди ярусалимвийриз авур ихтилат

1 Илчийриз ва Ягьудатда авай стхайриз Аллагьдин Гаф чувудар туширбуруни кьабулуникай хабар хьана. 2Петру Ярусалимдиз атайла, чувуд иманийри и кардин патахъай ана адаз ахмурар ийиз хьана.

3– Суьннет тавунвайбурун кӀвалериз фена, вуна абурухъ галаз ацукьна фу тӀуьна, – лугьузвай абуру.

4Петруди абуруз хьайи-хьайивал ахъайиз эгечӀна:

5– Яфа шегьерда за дуьаяр ийизвай, – лагьана ада. – Заз, дуьа ийизвай чӀавуз, ахварал алайдаз хьиз, ихьтин керемат акуна. Заз са ни ятӀани кьуд пӀипӀ кьуна цавай авадарзавай зурба суфра хьтинди акуна. Ам атана лап зи вилик акъвазна. 6Дикъетдив килигайла, заз адал гьайванарни ничхирар, чурчуларни къушар акуна.

7Ахпа заз ван атана: «Петру, къарагъ! Абур тукӀуна неъ». 8«Гьич са чӀавузни, я Ребби! – жаваб гана за. – Зи уьмуьрда за чиркин ва я гьарам затӀ тӀуьрди туш». 9Цавай атай ванци мад лагьана: «Аллагьди гьалал авур затӀуниз гьарам я лугьумир». 10Гьа икӀ пудра тикрар хьана, ахпа вири цавуз чӀугун хъувуна.

11Гьа чӀавуз зун илифнавай кӀвалин патав пуд кас атана акъатна. Абур зи патав Кесардай ракъурнавайбур тир. 12Руьгьди заз са шакни тавуна абурухъ галаз алад лагьана. Захъ галаз а ругуд стхани рекье гьатна. Атана чун заз теклифай инсандин кӀвализ акъатна. 13Ада вичин кӀвале малаик акурдакай ва ам вичихъ галаз рахайдакай чаз ихтилат авуна. Малаикди адаз лагьана: «Яфадиз, Симун-Петру тӀвар алай касдиз эвериз ракъура, 14ада ваз жув ва жуван вири хизан гьикӀ хиласдатӀа ихтилатда».

15Зун рахаз эгечӀайла, лап сифтедай чак гьикӀ акатнатӀа, гьабурукни гьакӀ атана Пак Руьгь акатна. 16Гьанал зи рикӀел Реббиди лагьай гафар хтана: «Ягьяди инсанрив цик акахьун къачуз тунай, квев Пак Руьгьди гьахьиз тада». 17ГьакӀ хьайила, Ребби Иса Месигьдихъ иман авур чаз, хьтин пай Аллагьди абурузни ганватӀа, завай Аллагьдиз манийвал ийиз женни?

18Абуру Петрудиз мад туьгьметар хъувунач. Абуру Аллагьдиз шукурар ийиз, лугьуз хьана:

– ГьакӀ хьайила, Аллагьди чувудар туширбурузни уьмуьрдихъ фин патал Аллагьдин рекьел къведай мумкинвал ганва.

АнтӀиахдин кӀватӀал

19Истефас кьейидалай кьулухъ хурук кутуна Ярусалимдай катай иманийрикай са кьадарбур Финикидив, Куьпридив ва АнтӀиах шегьердив кьван агакьна. Абуру Аллагьдин Гафуникай анжах чувудриз хабар гузвай. 20Катна атай иманийрин арада куьпривиярни киринейвияр авай. АнтӀиахдиз атайла, абуру Ребби Исадикай Шад Хабар чувудар туширбурузни гузвай.

21Абуруз Аллагьди куьмек гузвай, гзафбур Исадихъ ийизвай имандал атана Аллагьдихъ элкъвенай. 22И вакъиадикай хабар Ярусалимдин иманийрин кӀватӀалдивни агакьна. Анай АнтӀиахдиз Барнаба ракъурна. 23АнтӀиахдиз атайла, Барнабадиз Аллагьдин берекат акуна. Ам лап шад хьана. Ада цӀийиз имандал атайбуруз Аллагьдиз вири рикӀелди вафа хьана амукь лугьуз эверзавай. 24Барнаба, лагьайтӀа, Пак Руьгьдив ацӀанвай имандаллай ва хъсан кас тир. Гзаф инсанар Реббидин рекьел атана. 25Ахпа Шаул ахкун патал Барнаба ТӀарасдиз фена. 26Адаз ам ана жагъана, ада Шаул АнтӀиахдиз хкана. Тамам са йисан къене Барнабани Шаул АнтӀиахдин иманийрин кӀватӀалда хьана, абуру гзаф инсанриз чирвилер гана. Тилмизриз месигьияр сифте АнтӀиахда лагьайди я.

27И чӀавуз Ярусалимдай АнтӀиахдиз пайгъамбарар атана. 28Абурукай Агъаба, Руьгь акатнаваз, Римдин пачагьлугъ михьиз каша кьадайдакай виликамаз малумарнай. (Клавдаса пачагьлугъ идара ийизвай вахтунда и кар хьунни авуна.) 29ГьакӀ хьайила Ягьудатда авай стхайриз-вахариз тилмизри чпелай гьардалай алакьдай кьадар куьмек гун къарар кьабулна. 30А къарар абуру кьилизни акъудна. Абуру, Барнабадивни Шаулав вугана, Ярусалимда авай иманийрин кӀватӀалдин чӀехибуруз чпи кӀватӀай пул-затӀ ракъурна.

Currently Selected:

Крар 11: ЛезПК

Highlight

Copy