Крар 10

Петруни Карнел

1Кесар шегьерда Карнел лугьудай са кас авай. Ам Римдин аскеррик квай Италдин кьушун тӀвар алай дестедин эфсер тир. 2Ам ва адан вири хизан Аллагьдиз икрамзавай ва Аллагьдихъай кичӀезвай инсанар тир. Ада дарвиле авайбуруз гъил ахъавилелди куьмекар гудай. Ада Аллагьдиз датӀана дуьаяр ийидай. 3Садра, нисинилай кьулухъ сятдин пудриз хьиз, Карнелаз керемат акуна. Адаз акваз-акваз малаик атана. Малаикди лагьана:

– Карнел!

4Карнел адаз кичӀевал кваз килигна.

– Вуч хьана, я агъа? – лагьана ада.

– Вуна ийизвай дуьаярни кесибриз гузвай куьмекар Аллагьдиз аквазва, – лагьана малаикди. 5– Гила Яфадиз инсанар ракъура, абуру са гьи ятӀани Симун-Петру лугьудай касдиз иниз ша лугьурай. 6Ам табагъар ийидай Симунан мугьман я. Симунан кӀвал гьуьлуьн патав гва.

7Карнелахъ галаз рахай малаик хъфейла, ада вичин кьве вач-хъшадиз ва вичин кьилдин тапшуругъар кьилиз акъудзавай аскеррикай Аллагь рикӀеллай садаз эверна. 8Хьайи кардикай вири абуруз ахъаяйдалай гуьгъуьниз ада абур Яфадиз ракъурна.

9 Пакагьан юкъуз, Карнела ракъурнавайбур шегьердив агакьзавай вахтунда, Петру дуьа ийиз кӀвалин къавал акьахнавай. 10Адаз гишин хьанвай ва фу нез кӀанзавай. ТӀуьн гьазур жедалди Петрудиз ахварал алайдаз хьиз керемат акуна: 11ахъа хьайи цавай кьуд пӀипӀ са ни ятӀани кьунвай хьтин зурба суфрадиз ухшар са затӀ агъуз эвичӀна. 12Адал гьар жуьредин гьайванар, чурчулар ва къушар алай. 13Ахпа адаз цавай къвезвай ванци лагьана:

– Къарагъ, Петру! И гьайванар тукӀуна неъ.

14– Гьич са чӀавузни, я Ребби! – лагьана жаваб гана Петруди – зи уьмуьрда за чиркин ва я гьарам затӀ тӀуьрди туш.

15Ванци адаз кьвед лагьай гъилера хълагьна:

– Аллагьди гьалал авунвай затӀуниз чиркинди лугьумир.

16Гьа икӀ пудра давам хьана, ахпа суфра мад цавуз хкаж хъхьана.

17Петру им вуч керемат ятӀа лугьуз фикирдик квай арада Карнела ракъурнавай инсанар, Симунан кӀвал жагъурна, адан варарив акъвазнавай. 18Абуру Симун-Петру ина авани лугьуз, кӀевиз хабар кьазвай. 19Акур керематдикай хиялар ийизмай Петрудиз Руьгьди лагьана:

– Симун, вахъ пуд кас къекъвезва. 20Къарагъ, кӀаник эвичӀ. Са шакни тавуна абурухъ галаз алад, абур За ракъурнавайбур я.

21КӀаник эвичӀна, Петруди а ксариз лагьана:

– Куьн къекъвезвай инсан ингье зун я. Квез завай вуч кӀанзава?

22– Чун эфсер Карнела ракъурнавайбур я, – жаваб гана абуру. – Ам гьахъ-михьи ва Аллагьдихъай кичӀезвай инсан я. Ам вири Ягьудатдин халкьдин арада гьуьрмет авай кас я. Пак малаикди Карнелаз ваз вичин патав эвера лагьана ва ви ихтилатриз яб гун эмирнава.

23Петруди кӀвализ ша лагьана абур илифарна.

Пакагьан юкъуз Петру ва адахъ галаз Яфадай тир имандал алай са шумуд стха мугьманрихъ галаз рекье гьатна. 24Са йикъалай абур Кесар шегьердиз атана акъатна. Карнела вичин мукьва-кьилияр, ярар-дустар кӀватӀнавай. Абуру санал Петру вилив хуьзвай. 25Петру гьаятдиз гьахьнамазни, Карнела, Петрудин вилик фена, адаз, кӀвачерив ярх хьана, икрам авуна.

26– Къарагъ, – лагьана Петруди, адаз къарагъиз куьмекна, – зунни гьа вун хьтин инсан я.

27Карнелахъ галаз рахаз-рахаз, Петру кӀвализ гьахьна. КӀвале адаз гзаф инсанар кӀватӀ хьанваз акуна. 28Ада абуруз лагьана:

– Квез чизва хьи, чувудриз маса халкьарикай тирбурухъ галаз рафтарвал авун ва абурун кӀвалериз фин къадагъа авунва. Амма Аллагьди заз гьич са касни кьацӀайдай ва я чиркиндай кьун тавун лазим тирди къалурна. 29ГьакӀ хьайила, заз ша лагьайла, зун чуькьни тавуна куь патав атана. Гила за квевай куьне заз вучиз эвернавайди ятӀа хабар кьан.

30– Кьуд югъ идалай вилик йикъан сятдин пудаз за жуван кӀвале дуьа ийизвай, – жаваб гана Карнела. – Садлагьана зи вилик цӀарцӀар гузвай пекер алай са кас акъатна 31ва лагьана: «Карнел, вуна ийизвай дуьаяр Аллагьди кьилиз акъудзава ва вуна кесибриз гайи куьмекарни Адаз аквазва. 32Гьавиляй вуна Яфа шегьердиз Петру-Симун лугьудай касдиз эвериз инсанар ракъура. Ам табагъар ийидай Симунан кӀвале акъвазнава, адан кӀвал гьуьлуьн патав гва». 33Зани гьасятда ви патав инсанар ракъурна. Вун атана хъсан кар хьана. Аллагьди чаз вуч лугьун ваз эмирнаватӀа вавай чирун патал, исятда чун иниз Аллагьдин вилик кӀватӀ хьанва.

34Петру рахаз эгечӀна:

– Зун рикӀивай а кардин гъавурда акьазва хьи, Аллагьди са халкь маса халкьдилай вине кьазвач. 35Аллагьди Вичихъай кичӀезвай ва дуьз кӀвалахар ийизвай гьар са кас, адан миллетдизни килиг тавуна, кьабулзава. 36Аллагьди Исраилдин халкьдиз вирибурун Ребби тир Иса Месигьди адаз ислягьвал гъида лагьана хабар ракъурна. 37Ягьяди цик акахьун къачу лагьана эверайдалай кьулухъ, Галилейдилай эгечӀна вири Ягьудатда кьиле фейи крарни квез чизва. 38Аллагьди Назаретдай тир Исадиз Пак Руьгьни чӀехи къуват гана. Гьавиляй Исади Вич къекъвез хьайи вири чкайра хъсанвилер авуна, иблисдин гъилик акатнавайбур сагъар хъувуна. Вучиз лагьайтӀа Аллагьни Адахъ галаз авай. 39Вири Ягьудатда ва Ярусалимда Исади авур кьван крарин шагьидар я чун. Чувудри Ам хашуниз яна кьена, 40-41Аллагьди Адал пуд лагьай юкъуз чан хкана. Аллагьди Ам вири халкьдиз ваъ, анжах чаз, Вичи виликамаз хкянавай шагьидриз, аквадайвал авуна! Исадал кьейидалай кьулухъ чан хтайла, чна Адахъ галаз фу-яд тӀуьнай. 42Аллагьди Ам чан алайбурунни кьейибурун дуванбегвиле тайинарнава, Исади чун и кардикай инсанриз хабар гудай шагьидар яз ракъурнава. 43Пайгъамбаррини гьадакай шагьидвал ийизва. Абуру лугьузва хьи, Исадихъ иман авур гьар садан гунагьрилай Адан ТӀварцӀелди гъил къахчуда.

44Петруди и гафуникай ихтилатар ийизмай кьван гагьда адаз яб гузвай вирибурук Пак Руьгь акатна. 45Петрудихъ галаз атай чувуд иманияр Аллагьди Пак Руьгьдин пай маса халкьарикай тирбурузни ганвайди чир хьайила, лап мягьтел хьана, 46вучиз лагьайтӀа абуруз Карнелани адахъ галай инсанри Аллагьдиз жуьреба-жуьре чӀаларал шукурар ийизвайди акунвай. Инал Петруди лагьана:

47– Чак хьиз Пак Руьгь акатнавай и инсанриз цик акахьун къачун къадагъа ийиз жедани кьван?

48Адани Иса Месигьдин ТӀварцӀелай абурув цик акахьун къачуз туна. Идалай кьулухъ абуру Петрудиз са шумуд юкъуз чпин патав гумукь лагьана.

Currently Selected:

Крар 10: ЛезПК

Highlight

Copy