ZACARIAS 8
8
Ang Pagpahauli sang Jerusalem Ginsaad
1Kag nag-abut sa akon ang polong sang Ginoo sang mga kasoldadosan, nga nagasiling, 2“Amo ini ang ginasiling sang Ginoo sang mga kasoldadosan: Nagakaimon ako sa Sion sa dakung kaimon, kag nagakaimon ako sa iya sa dakung kasingkal. 3Amo ini ang ginasiling sang Ginoo: Magabalik ako sa Sion, kag magapuyo sa tunga sang Jerusalem, kag ang Jerusalem tawgon nga banwa sang kamatooran, kag ang bukid sang Ginoo sang mga kasoldadosan, ang balaan nga bukid. 4Amo ini ang ginasiling sang Ginoo sang mga kasoldadosan: May magapuyo pa nga mga tigulang nga lalaki kag mga tigulang nga babayi sa mga alagyan sang Jerusalem, ang tagsa ka tawo may iya nga sungkud sa iya kamut bangud sang katigulangon. 5Kag ang mga dalan sang banwa mahil-ob sang kabataan nga lalaki kag babayi nga nagahinampang sa iya mga dalan. 6Amo ini ang ginasiling sang Ginoo sang mga kasoldadosan: Kon ini makatilingala sa mga mata sang nabilin sining katawohan sa sadtong mga adlaw, manginmakatilingala man bala ini sa akon mga mata, nagasiling ang Ginoo sang mga kasoldadosan? 7Amo ini ang ginasiling sang Ginoo sang mga kasoldadosan: Yari karon, luwason ko ang akon katawohan gikan sa duta nga nasidlangan kag sa duta nga nakatundan; 8kag dalhon ko sila kag magapuyo sila sa tunga sang Jerusalem; kag sila mangin-akon katawohan kag ako mangin-ila Dios, sa kamatooran kag sa pagkamatarung.”
9Amo ini ang ginasiling sang Ginoo sang mga kasoldadosan: “Pabaskuga ang inyo mga kamut, kamo nga nagapamati sining mga adlaw sining mga polong sa baba sang mga manalagna, kutub sang adlaw nga ginbutang ang sadsaran sang balay sang Ginoo sang mga kasoldadosan, agud nga mapatindug ang templo. 10Kay sa wala pa yadtong mga adlaw walay sohol sa tawo ukon hinakay sa sapat, kag walay paghidait sa nagagowa ukon sa nagasulud gikan sa kasumpong; kay ginapahamtang ko ang tagsatagsa ka tawo batok sa iya isigkatawo. 11Apang karon sa mga nabilin sining katawohan indi na ako magsubong sang sa mga adlaw nga una, nagasiling ang Ginoo sang mga kasoldadosan. 12Kay manginmay binhi sang paghidait kag katin-aran; ang uvas magahatag sang iya bunga, kag ang duta magahatag sang iya patubas, kag ang mga langit magahatag sang ila ton-og; kag papanublion ko ang nabilin sining katawohan sini tanan nga butang. 13Kag subong nga nanginpagkamalaut kamo sa mga pungsud, O panimalay sang Juda kag panimalay sang Israel, amo man luwason ko kamo kag manginpagpakamaayo kamo. Dili magkahadluk, kondi pabaskuga ang inyo mga kamut.”
14Kay amo ini ang ginasiling sang Ginoo sang mga kasoldadosan: “Subong nga naghunahuna ako sa paghimo sing malaut sa inyo, sang ginpasingkal ako sang inyo mga ginikanan, nagasiling ang Ginoo sang mga kasoldadosan, kag wala ako magkalisud, 15sa amo liwat naghunahuna ako sa sining mga adlaw sa paghimo sing maayo sa Jerusalem kag sa panimalay sang Juda; dili kamo magkahadluk. 16Ini amo ang mga butang nga inyo himoon: Magpamolong kamo ang tagsa ka tawo sing kamatooran sa iya isigkatawo,#Efe. 4:25. hikuta ang mga paghukom sang kamatooran kag paghidait sa inyo mga gawang, 17dili magpadugi sing malaut sa inyo mga tagiposoon batok sa iya isigkatawo, kag dili maghigugma sing dimatuud nga sumpa, kay ini tanan mga butang nga akon ginadumtan, nagasiling ang Ginoo.”
18Kag ang polong sang Ginoo sang mga kasoldadosan nag-abut sa akon, nga nagasiling, 19“Amo ini ang ginasiling sang Ginoo sang mga kasoldadosan: Ang puasa sang ikap-at nga bulan, kag ang puasa sang ikalima, kag ang puasa sang ikapito, kag ang puasa sang ikapulo, manginkalipay kag kasadya kag malipayon nga mga piesta sa panimalay sang Juda; busa higugmaa ang kamatooran kag paghidait.
20“Amo ini ang ginasiling sang Ginoo sang mga kasoldadosan: May magaabut pa nga mga katawohan, bisan ang mga pumuluyo sang madamung kabanwaanan; 21ang mga pumuluyo sang isa ka banwa magakadto sa isa, nga nagasiling, ‘Magkadto kita sing madali sa pagpakilooy sang kahamuut sang Ginoo, kag sa pagpangita sa Ginoo sang mga kasoldadosan; ako magakadto man.’ 22Madamu nga katawohan kag makusug nga mga pungsud magaabut sa pagpangita sa Ginoo sang mga kasoldadosan sa Jerusalem, kag sa pagpakilooy sang kahamuut sang Ginoo. 23Amo ini ang ginasiling sang Ginoo sang mga kasoldadosan: Sa sadtong mga adlaw ang napulo ka tawo gikan sa tanan nga hambal sang mga pungsud magabuyot sang sidsid sang isa ka Judio, nga nagasiling, ‘Magaupud kami sa inyo, kay nabatian namon nga ang Dios nagaupud sa inyo.’”
Currently Selected:
ZACARIAS 8: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
