AMBAHANON 8
8
1O kabay kuntani nga kasubong ka sang akon utud nga lalaki,
nga nagsoso sa mga soso sang akon iloy!
Kon makita ko ikaw sa luwas, halukan ko ikaw,
kag wala gid sing magtamay sa akon.
2Tuytuyan ko ikaw kag dalhon ikaw
sa balay sang akon iloy,
nga magtudlo sa akon.
Paimnon ko ikaw sang alak nga pinahamutan,
sang duga sang akon granada.
3Ang iya wala nga kamut magsakbay sang akon olo,
kag ang iya too nga kamut maghakus sa akon!
4Ginapasumpa ko kamo, O babayi nga mga anak sang Jerusalem,
nga dili ninyo sia pagtublagon ukon pagpukawon ang akon hinigugma
tubtub sa luyag niya.
Ang Gugma Makusug subong sang Kamatayon
5Sin-o bala ini nga nagataklad gikan sa kamingawan,
nga nagasandig sa iya hinigugma?
Sa idalum sang kahoy nga mansanas ginpukaw ko ikaw.
Didto ang imo iloy ginsakitan sa imo,
didto ginsakitan ang nag-anak sa imo.
6Ibutang ako subong nga pat-in sa imo kasingkasing,
subong nga pat-in sa imo butkon;
kay ang gugma makusug subong sang kamatayon,
ang kaimon mapintas subong sang Sheol.
Ang iya mga idlab mga idlab sang kalayo.
ang dabdab sang Ginoo.
7Ang madamu nga tubig indi makapalong sang gugma,
kag ang mga baha indi makalumus sini.
Kon ang tawo maghatag tungud sa gugma
sang tanan nga pagkabutang sang iya balay,
mangintalamayon sia sing bug-os.
8May diotay kami nga utud nga babayi,
kag wala pa sia sing mga soso.
Ano bala ang himoon namon tungud sa amon utud nga babayi,
sa adlaw nga kagonan sia?
9Kon sia kuta,
magapatindug kami sa ibabaw niya sing torre nga pilak;
kag kon ganhaan sia,
kuadrohan namon sia sing mga tapi nga cedro.
10Ako kuta,
kag ang akon mga soso kaangay sang mga torre sini;
niyan sa iya mga mata
subong ako sang isa nga nakakita sing paghidait.
11Si Salomon may ulubasan sa Baal-hamon;
gintugyan niya ang ulubasan sa mga manugbantay;
ang tagsa magdala sing isa ka libo ka bilog nga pilak tungud sang iya bunga.
12Ang akon ulubasan, nga akon gid, yari sa atubangan nakon;
ikaw, O Salomon, magaangkon sang isa ka libo,
kag duha ka gatus sa mga nagabantay sang iya bunga.
13Ikaw nga nagapuyo sa mga katamnan,
ang mga kaupdanan ko nagpamati sa imo tingug;
pabatia ako sini.
14Dalidali, hinigugma ko,
kag manginsubong ka sa gasela
ukon sa tinday nga usa
sa kabukiran sang mga pahumut.
Currently Selected:
AMBAHANON 8: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
