RUT 2
2
Si Rut Nagapanaghaw sa Uma ni Boaz
1Karon si Noemi may lalaking himata sang iya bana, lalaki nga gamhanan sa manggad, gikan sa panimalay ni Elimelec, kag ang iya ngalan si Boaz. 2Kag si Rut nga Moabnon nagsiling kay Noemi, “Tugutan mo ako karon sa pagkadto sa uma, kag magpanaghaw#Lev. 19:9-10; Deut. 24:19. sa tunga sang mga uhay sang uyas sa olihi sang tawo nga mahamut-an ako sa iya itololok.” Kag sia nagsiling sa iya, “Lakat, anak ko.” 3Gani naglakat sia kag nag-abut kag nagpanaghaw sa uma sa olihi sang mga mangangani; kag kapalaran niya nga nakaabut sa puna sang uma nga iya ni Boaz, nga gikan sa panimalay ni Elimelec. 4Kag yari karon, si Boaz nag-abut gikan sa Bet-lehem; kag sia nagsiling sa mga mangangani, “Ang Ginoo mag-upud sa inyo!” Kag sila nagsabat sa iya, “Ang Ginoo magpakamaayo sa imo.” 5Niyan si Boaz nagsiling sa iya alagad nga ginpadumala sa mga mangangani, “Kay sin-o bala pamatan-on nga babayi ini?” 6Kag ang alagad nga ginpadumala sa mga mangangani nagsabat, “Ini pamatan-on nga Moabnon nga nagbalik upud ni Noemi gikan sa duta sang Moab. 7Nagsiling sia, ‘Pasaghawa ako, ginaampo ko sa imo, kag papuluta sa olihi sang mga mangangani sa tunga sang mga linaylay.’ Gani sia nagkari, kag nagpadayon kutub sa aga tubtub karon, luwas nga nagpahuwayhuway sia sa balay.”
8Niyan si Boaz nagsiling kay Rut, “Wala ka bala makabati, anak ko nga babayi? Dili ka magkadto sa pagpanaghaw sa iban nga uma ukon maghalin diri, kondi pabilin diri sa akon mga pamatan-on nga babayi. 9Itolok ang imo mga mata sa uma nga ginaani nila, kag sonod ka sa ila. Wala ko bala pagpaandami ang mga pamatan-on nga lalaki nga indi ka nila pagkuhiton? Kag kon uhawon ka, kadto sa mga suludlan kag mag-inum sang sinag-ob sang mga pamatan-on nga lalaki.” 10Niyan nagyaub sia, nga nagahapa sa duta, kag nagsiling sa iya, “Ngaa bala nakapahamuut ako sa imo itololok, nga magtamud ka sa akon, sa ginatan-aw nga ako dumuloong?” 11Apang si Boaz nagsabat sa iya, “Napahayag sa akon sing bug-os ang tanan nga imo nahimo sa imo ugangan nga babayi kutub sang pagkapatay sang imo bana, kag paano nga ginbayaan mo ang imo amay kag ang imo iloy kag ang duta nga imo natawohan kag nagkari ka sa katawohan nga wala mo makilala sadto anay. 12Magtumbas ang Ginoo sang imo binuhatan, kag tuman nga balus ihatag sa imo sang Ginoo, ang Dios sang Israel, nga sa idalum sang iya mga pakpak nagkari ka sa pagdangup!” 13Niyan sia nagsiling, “Magmahamut-an ako sa imo itololok, ginoo ko, kay ginlipay mo ako kag nagpamolong ka sing malolo sa imo ulipon nga babayi, bisan indi ako subong sang isa sang imo mga ulipon nga babayi.”
14Kag sa tigkalaon si Boaz nagsiling sa iya, “Kari diri, kag magkaon sang tinapay, kag itusmog ang imo hungit sa langgaw.” Gani naglingkod sia sa luyo sang mga mangangani; kag gintunghol nila sa iya ang sinanlag nga uyas; kag nagkaon sia kag nabusug, kag may nabilin. 15Kag sang nagtindug sia sa pag-panaghaw, si Boaz nagsogo sa iya mga pamatan-on nga lalaki, nga nagasiling, “Pasaghawa sia bisan sa tunga sang mga linaylay, kag indi sia pagsawaya. 16Kag maggabut man nga sa iya sa mga binugkos, kag bayaan ini kag ipasaghaw sa iya, kag indi sia pagsabdonga.”
17Gani nagpanaghaw sia sa uma tubtub sa kahaponon; niyan ginwaswas niya ang iya nasaghaw, kag ini mga isa ka efa nga sebada. 18Kag gindala niya ini kag nagsulud sa banwa; ang iya ugangan nga babayi nakakita sang iya nasaghaw, kag gindala niya kag ginhatag sa iya ang nabilin nga kalan-on sa tapus nga nabusug sia. 19Kag nagsiling sa iya ang iya ugangan nga babayi, “Diin ka bala mag-panaghaw karon nga adlaw? Kag diin ka bala magpangabudlay? Pinakamaayo ang nagkilala sa imo.” Gani sia nagpahayag sa iya ugangan kon kay sin-o sia magpangabudlay, kag nagsiling, “Ang ngalan sang lalaki nga sa iya nagpangabudlay ako karon nga adlaw amo si Boaz.” 20Kag si Noemi nagsiling sa iya umagad nga babayi, “Pinakamaayo sia sang Ginoo, nga wala sia magpugung sang iya kalolo sa mga buhi ukon sa mga patay!” Nagsiling man sa iya si Noemi, “Ang lalaki aton himata, isa sang aton malapit nga mga himata.” 21Kag si Rut nga Moabnon nagsiling, “Hoo, nagsiling sia sa akon, ‘Magmalapit ka sa akon mga pamatan-on nga lalaki, tubtub nga matapus nila ang tanan nga akon alanyon.’” 22Kag si Noemi nagsiling kay Rut nga iya umagad, “Maayo, anak ko, nga nagalakat ka kaupud sang iya mga alagad nga babayi, kag nga indi ka makita nila sa iban nga uma.” 23Gani nagmalapit sia sa mga babayi nga mga alagad ni Boaz, sa pagpanaghaw tubtub nga natapus ang ani sang sebada kag sang trigo; kag nagpuyo sia upud sa iya ugangan.
Currently Selected:
RUT 2: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society