RUT 1
1
Si Rut kag si Noemi
1Sa mga adlaw nga naghukom ang mga hukom may gutum sa duta, kag isa ka lalaki sang Bet-lehem-juda nagkadto sa pagpanlugayaw sa duta sang Moab, sia kag ang iya asawa kag ang iya duha ka anak nga lalaki. 2Ang ngalan sang lalaki si Elimelec kag ang ngalan sang iya asawa si Noemi, kag ang ngalan sang iya duha ka anak nga lalaki si Mahalon kag si Quelion; mga Efratanhon sila gikan sa Bet-lehem-juda. Nag-abut sila sa duta sang Moab kag nagpabilin didto. 3Apang napatay si Elimelec, nga bana ni Noemi, kag nabilin sia kag ang iya duha ka anak nga lalaki. 4Sila nagpangasawa gikan sa mga babayi sang Moab; ang ngalan sang isa si Orpa kag ang ngalan sang isa si Rut. Nagpuyo sila didto sing mga napulo ka tuig; 5kag napatay sila nga duha si Mahalon kag si Quelion, gani ang babayi nabayaan sang iya duha ka anak kag sang iya bana.
6Niyan nagtindug sia upud ang iya duha ka umagad nga babayi agud nga magbalik sia gikan sa duta sang Moab, kay nakabati sia sa duta sang Moab kon paano nga ang Ginoo nagduaw sa iya katawohan sa paghatag sa ila sing kalan-on. 7Gani naggowa sia sa duug diin sia, upud sa iya ang iya duha ka umagad nga babayi, kag naglakat sila sa dalanon sa pagbalik sa duta sang Juda. 8Apang si Noemi nagsiling sa iya duha ka umagad nga babayi, “Lakat kamo, magbalik ang tagsa sa inyo sa balay sang iya iloy. Ang Ginoo maghisayo sing malolo sa inyo, subong sang paghisayo ninyo sa mga napatay kag sa akon. 9Ang Ginoo mag-tugut nga makakita kamo sing pahuway, ang tagsa sa inyo sa balay sang iya bana!” Niyan ginhalukan sila niya, kag ginbayaw nila ang ila tingug kag naghibi. 10Kag sila nagsiling sa iya, “Indi, kondi magapauli kami kaupud nimo sa imo katawohan.” 11Apang si Noemi nagsiling, “Balik kamo, mga anak ko, ngaa bala nga maupud kamo sa akon? May mga anak pa bala ako nga lalaki sa akon tiyan agud nga sila mangin-inyo bana? 12Balik kamo, mga anak ko, lakat kamo sa inyo dalanon, kay ako tigulang na sa pagpamana. Kon magsiling ako nga may paglaum ako, kon bisan sini nga gab-i makapamana ako kag mag-anak man sing mga lalaki, 13busa magahulat bala kamo tubtub nga magdaku sila? Buut bala kamo magpugung sa pagpamana? Indi, mga anak ko, kay nagapakalisud ini sa akon sing labi pa tungud sa inyo kay ang kamut sang Ginoo ginbayaw batok sa akon.” 14Niyan ginbayaw nila ang ila tingug kag naghibi liwat; kag si Orpa naghaluk sa iya ugangan, apang si Rut nagkupo sa iya.
15Kag si Noemi nagsiling, “Yari karon, ang imo bilas nga babayi nagbalik sa iya katawohan kag sa iya dios; balik ka sonod sa imo bilas nga babayi.” 16Apang si Rut nagsiling, “Dili ako pagpilita sa pagbiya sa imo ukon sa pagbalik gikan sa pagsonod sa imo; kay bisan diin ka makadto magakadto ako, kag bisan diin ka mapabilin magapabilin ako; ang imo katawohan mangin-akon katawohan, kag ang imo Dios akon Dios; 17kon diin ka mapatay ako mapatay, kag didto ako ilubung. Himoon sang Ginoo sa akon ang amo kag labi pa man kon bisan ang kamatayon magbulag sa imo kag sa akon.” 18Kag sang nakita ni Noemi nga malig-on ang iya pagtapat sa pag-upud sa iya, nag-untat sia sa pagpamolong sa iya.
19Gani naglakat sila nga duha tubtub nga nag-abut sa Bet-lehem. Kag sang nagsulud sila sa Bet-lehem, ang bug-os nga banwa nagdapo sa ila; kag ang mga babayi nagsiling, “Amo bala ini si Noemi?” 20Sia nagsiling sa ila, “Dili ninyo ako pagtawga Noemi,#1:20 Kon sayoron Manayanaya. kondi tawga ako Mara,#1:20 Kon sayoron Mapait. kay ang Makaako naghisayo sing mapait sa akon. 21Ako naggowa nga puno, kag ang Ginoo nagpapauli sa akon nga wala sing dala. Ngaa bala nga ginatawag ninyo ako Noemi, sa ginatan-aw nga ang Ginoo nagpamatuud batok sa akon kag ang Makaako nagpasakit sa akon?”
22Gani nagbalik si Noemi, kag si Rut nga Moabnon nga iya umagad nga babayi upud sa iya, nga nagbalik gikan sa duta sang Moab. Kag nag-abut sila sa Bet-lehem sa pamuno sang ani sang sebada.
Currently Selected:
RUT 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society