NAHUM 1
1
Ang Kasingkal sang Pagtimalus sang Ginoo
1Ang lulan sang Ninive.#Isa. 10:5-34; 14:24-27; Sof. 2:13-15. Ang tolon-an sang palanan-awon ni Nahum nga Elkosanon.
2Ang Ginoo maimon nga Dios kag nagatimalus,
ang Ginoo nagatimalus kag puno sang kasingkal;
ang Ginoo nagatimalus sa iya mga kasumpung
kag nagatigana sia sing kasingkal sa iya mga kaaway.
3Ang Ginoo makuli sa pagpangakig kag daku sa gahum,
kag indi nga mas-a magpaiway sang malinapason.
Ang iya dalanon sa buhawi kag sa bagyo,
kag ang mga gal-um amo ang yab-ok sang iya mga tiil.
4Ginasabdong niya ang dagat kag ginapahubas ini,
ginapahubas niya ang tanan nga suba;
ang Basan nagakag-as kag ang Carmelo,
ang bulak sang Libano nagakag-as.
5Ang mga bukid nagakurug sa iya,
ang kabakoloran nagakatunaw;
ang duta ginbayaw sa iya atubangan,
ang kalibutan kag ang tanan nga nagapuyo sa iya.
6Sin-o bala ang makatindug sa atubangan sang iya kaalipungut?
Sin-o bala ang makapabilin sa kabangis sang iya kaakig?
Ang iya kasingkal ginaula kaangay sang kalayo,
kag ang mga igang ginatiphag niya.
7Ang Ginoo maayo,
pamakud sa adlaw sang kalisud;
kilala niya ang mga nagadangup sa iya.
8Apang sa nagapanglambas nga baha
tapuson niya sing bug-os ang iya duug,
kag lagson ang iya mga kaaway pakadto sa kadudulman.
9Ano bala ang ginapahito ninyo batok sa Ginoo?
Tapuson niya sing bug-os;
ang kapipit-an indi magtindug sing makaduha.
10Kay subong sang mga talongon nga gumon ginalamon sila,
subong sang laya nga ginalaban.
11May isa bala nga naggowa sa imo,
nga nagapahito sing malaut batok sa Ginoo,
nga nagalaygay sing pagkamalaut?
12Amo ini ang ginasiling sang Ginoo,
“Bisan sila yara sa bug-os nga kusug kag madamu,
papason sila kag magataliwan.
Bisan ginpapiotan ko ikaw,
indi ko na ikaw pagpapiotan.
13Kag karon balion ko ang iya gota gikan sa imo
kag bugrason ang imo mga gapus.”
14Ang Ginoo naghatag sing sogo nahanungud sa imo:
“Wala sing isab-ug sang imo ngalan;
gikan sa balay sang imo mga dios papason ko
ang larawan nga tinigban kag ang larawan nga tinunaw.
Magakutkut ako sang imo lulubngan, kay ikaw mahigko.”
Ang Balita nga Gindaug ang Ninive
15Tan-awa, sa kabukiran ang mga tiil sang nagadala
sang maayong mga balita,
nga nagabantala sang paghidait!#Isa. 52:7.
Hiwata ang imo mga piesta, O Juda,
tumana ang imo mga saad,
kay indi na mag-agi sa imo ang malauton,
napapas sia sing bug-os.
Currently Selected:
NAHUM 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
