MARCOS 9

1Kag nagsiling si Jesus sa ila, “Sa pagkamatuud, nagasiling ako sa inyo, may iban sang mga nagatindug diri nga indi nga mas-a makatilaw sang kamatayon tubtub nga makita nila ang ginharian sang Dios nga nagakari sa gahum.”

Ang Pagbalhin sang Dagway

(Mat. 17:1-8; Luc. 9:28-36)

2Kag sa tapus ang anum ka adlaw gin-upud ni Jesus si Pedro kag si Santiago kag si Juan, kag gindala sila sing pahain sa bukid nga mataas; kag nabalhin sia sa atubangan nila,#2 Ped. 1:17-18. 3kag ang iya panapton nagsilaw, nga lakas kaputi, sa bagay nga walay manugpaputi sa duta nga makapaputi sa ila. 4Kag nagpahayag sa ila si Elias upud si Moises; kag nagapakighambal sila kay Jesus. 5Kag si Pedro nagsiling kay Jesus, “Rabbi, maayo sa aton nga diri kita; mahimo kita sing tatlo ka payag, isa sa imo kag isa kay Moises kag isa kay Elias.” 6Kay wala sia makahibalo kon ano ang iya isiling, kay nahadluk sila sing tama. 7Kag nag-abut ang panganud nga nagalikop sa ila, kag naggowa ang tingug sa panganud, “Ini hinigugma kong Anak;#Mat. 3:17; Mar. 1:11; Luc. 3:22. pamati kamo sa iya.” 8Kag sa hinali sang nagapanghulunghulung sa palibut wala na sila nakita nga bisan sin-o kondi si Jesus lamang kaupud nila.

Ang Pag-abut ni Elias

(Mat. 17:9-13)

9Kag sang nagadolhog sila sa bukid, nagtugon sia sa ila nga dili sila magsugid bisan kay sin-o nga tawo sang nakita nila, tubtub nga mabanhaw ang Anak sang tawo. 10Gani gintipigan nila ang mga polong, nga nagapamangkotay sila kon ano ang kahologan sang pagkabanhaw. 11Kag nagpamangkot sila sa iya, “Ngaa bala ang mga escriba nagasiling nga si Elias kinahanglan maghari sing una?#Mal. 1:5; Mat. 11:14.” 12Kag nagsabat sia sa ila, “Matuud si Elias nagakari sing una kag nagapasag-uli sang tanan nga butang; kag paano bala ang nasulat nahanungud sa Anak sang tawo, nga mag-antus sia sing madamu nga butang kag tamayon? 13Apang ako nagasiling sa inyo nga si Elias nag-abut na, kag nahimo man nila sa iya ang bisan anong luyag nila, subong sang nasulat nahanungud sa iya.”

Si Jesus Nagaayo sang Batang Kuyapon

(Mat. 17:14-21; Luc. 9:37-43)

14Kag sang nag-abut sila sa mga gintoton-an, nakita nila ang dakung kadam-an sa palibut nila, kag ang mga escriba nga nagapakigpuyas sa ila. 15Kag sa gilayon ang bug-os nga kadam-an, sang nakita nila sia, naorongan sing daku, kag sang nagdalagan sila sa iya nag-abiabi sa iya. 16Kag nagpamangkot sia sa ila, “Ano bala ang ginapakigpuyas ninyo sa ila?” 17Kag ang isa sang kadam-an nagsabat sa iya, “Manunudlo, gindala ko sa imo ang akon anak nga lalaki, nga may espiritu nga apa; 18kag bisan diin madakup sia sini, ginapus-ang sia sini; kag nagabura sia kag nagapabagrut sang iya mga ngipon kag nagapalamaskug; kag naghambal ako sa imo mga gintoton-an nga sobolon nila ini, apang indi sila makasarang.” 19Kag nagsabat sia sa ila, “O kaliwatan nga dimatinoohon, tubtub san-o pa bala nga ako magaupud sa inyo? Tubtub san-o pa bala nga ako magabatas sa inyo? Dalha sia sa akon.” 20Kag gindala sia nila sa iya; kag sang nakita sang espiritu si Jesus, sa gilayon ginpakibang sang espiritu ang pamatan-on, kag napukan sia sa duta, kag nagligid nga nagabura. 21Kag nagpamangkot si Jesus sa iya amay, “Daw ano na bala kadugay kutub nga nahanabu ini sa iya?” Kag nagsiling sia, “Kutub sang bata pa. 22Kag sa makadamu ginpilak niya sia sa kalayo kag sa tubig man, sa paglaglag sa iya; apang kon ikaw makahimo sing bisan ano, kalooyi kami kag tabangi kami.” 23Kag si Jesus nagsiling sa iya, “Kon ikaw makahimo! Ang tanan nga butang mahimo sa iya nga nagatoo.” 24Sa gilayon nagsinggit [nga may mga luha] ang amay sang bata kag nagsiling, “Nagatoo ako; tabangi ang akon pagkadimatinoohon!” 25Kag sang nakita ni Jesus nga ang kadam-an nagkara nga nagadalagan sing tingub, ginsabdong niya ang espiritu nga dimatinlo, nga nagasiling sa iya, “Ikaw nga espiritung apa kag bungol, nagasogo ako sa imo, gowa ka sa iya, kag dili na magsulud sa iya.” 26Kag sang nakasinggit kag nakapakibang sa iya sing tama gid, naggowa ang espiritu kag ang pamatan-on nahimo nga daw patay; sa bagay nga ang kalabanan nagsiling, “Patay na.” 27Apang ginkaptan sia ni Jesus sa kamut kag ginbangon sia, kag nagtindug sia. 28Kag sang nakasulud sia sa balay, ang iya mga gintoton-an nagpamangkot sa iya sing pahain, “Ngaa bala nga indi kami makasobol sa iya?” 29Kag nagsabat sia sa ila, “Ini nga bagay indi mapagowa sa bisan ano kondi sa pangamuyo [kag puasa].”

Si Jesus Nagatagna Liwat sang Iya Kamatayon

(Mat. 17:22-23; Luc. 9:43-45)

30Naglakat sila gikan didto kag nag-agi sa Galilea. Kag indi sia buut nga may tawo nga makahibalo sini; 31kay nagpanudlo sia sa iya mga gintoton-an, kag nagsiling sa ila, “Ang Anak sang tawo itugyan sa kamut sang mga tawo, kag patyon nila sia; kag kon mapatay na sia, sa tapus ang tatlo ka adlaw mabanhaw sia.” 32Apang wala nila mahangpi ang polong, kag nahadluk sa pagpamangkot sa iya.

Sin-o Bala ang Labing Daku?

(Mat. 18:1-4; Luc. 9:46-48)

33Kag nag-abut sila sa Capernaum; kag sang didto sia sa balay nagpamangkot sia sa ila, “Ano bala ang inyo ginbaisan sa dalanon?” 34Apang naghipus sila; kay nagbinaisay sila sa dalanon kon sin-o ang labing daku.#Luc. 22:24. 35Kag naglingkod sia kag gintawag niya ang napulog duha; kag nagsiling sa ila, “Kon bisan sin-o nga tawo maluyag mangin-una, kinahanglan maolihi sia sa tanan kag mangin-alagad sang tanan.”#Mat. 20:26-27; 23:11; Mar. 10:43-44; Luc. 22:26. 36Kag nagkuha sia sing bata nga diotay, kag ginpatunga sia sa ila; kag sang ginakugos niya sia, nagsiling sia sa ila, 37“Ang bisan sin-o nga magbaton sang isa nga subong sining bata nga diotay sa akon ngalan, nagabaton sa akon; kag ang bisan sin-o nga nagabaton sa akon, wala nagabaton sa akon kondi sa iya nga nagpadala sa akon.#Mat. 10:40; Luc. 10:16; Juan 13:20.”

Ang Indi Batok sa Aton Apin sa Aton

(Mat. 10:40-42; Luc. 9:49-50)

38Si Juan nagsiling sa iya, “Manunudlo, amon nakita ang isa [nga wala nagasonod sa aton] nga nagasobol sang mga yawa sa imo ngalan kag gindumilian namon sia, bangud nga wala pagsonod sia sa aton.” 39Apang si Jesus nagsiling, “Dili sia pagdumilii; kay walay tawo nga nagahimo sing isa ka buhat nga gamhanan sa akon ngalan kag sa madali makahambal sing malaut sa akon. 40Kay ang indi batok sa aton apin sa aton.#Mat. 12:30; Luc. 11:23. 41Kay ang bisan sin-o nga nagapainum sa inyo sing isa ka tagayan nga tubig bangud nga kamo iya ni Cristo, sa pagkamatuud nagasiling ako sa inyo, indi niya nga mas-a madula ang iya balus.#Mat. 10:42.

Ang mga Panulay sa Pagpakasala

(Mat. 18:5-9; Luc. 17:1-2)

42“Ang bisan sin-o nga nagapasandad sa isa sining mga magamay nga nagatoo sa akon, maayo pa sa iya nga bitayan sa liog sing dakung bato sang galingan kag itagbung sa dagat. 43Kag kon ang imo kamut nagapasandad sa imo, utda ini; maayo pa sa imo nga magsulud nga kimpol sa kabuhi nga sang may duha ka kamut magakadto ka sa infierno, sa kalayo nga indi mapalong.#Mat. 5:30. 44[Diin ang ila ulud wala pagkapatay, kag ang kalayo wala pagkapalong]. 45Kag kon ang imo tiil nagapasandad sa imo, utda ini; maayo pa sa imo nga magsulud nga piang sa kabuhi nga sang sa may duha ka tiil iholog ka sa infierno. [46Diin ang ila ulud wala pagkapatay, kag ang kalayo wala pagkapalong]. 47Kag kon ang imo mata nagapasandad sa imo, lukata ini; maayo pa sa imo nga magsulud sa ginharian sang Dios nga may isa ka mata nga sang sa may duha ka mata iholog ka sa infierno,#Mat. 5:29. 48diin ang ila ulud wala pagkapatay, kag ang kalayo wala pagkapalong.#Isa. 66:24. 49Kay ang tagsatagsa asinan sing kalayo [kag ang tagsa ka halad asinan sing asin]. 50Ang asin maayo; apang kon ang asin magtab-ang, ano bala ang ikapaasin ninyo sini?#Mat. 5:13; Luc. 14:34-35. Maghuput kamo sing asin sa inyo kaugalingon, kag maghidaitay.”

Currently Selected:

MARCOS 9: ABHIL82

Highlight

Copy