MARCOS 3

Ang Tawo nga May Kamut nga Itus

(Mat. 12:9-14; Luc. 6:6-11)

1Liwat nagsulud sia sa sinagoga, kag didto may tawo nga itus ang iya kamut. 2Kag ginbantayan nila sia, kon ayohon niya sia sa adlaw nga inugpahuway, agud nga masumbung nila sia. 3Kag nagsiling sia sa tawo nga itus ang kamut, “Kari ka.” 4Kag nagsiling sia sa ila, “Tugut bala sa adlaw nga inugpahuway ang paghimo sing maayo ukon paghimo sing malain, ang pagluwas sing kabuhi ukon pagpatay?” Apang naghipus sila. 5Kag sang natolok niya sila sa palibut sing may kaakig, nga nasubuan bangud sa katig-a sang ila tagiposoon, nagsiling sia sa tawo, “Untaya ang imo kamut.” Gin-untay niya ini, kag ang iya kamut naulian. 6Naggowa ang mga Fariseo, kag sa gilayon nakigsapul sa mga Herodianhon batok sa iya, kon paano nga malaglag nila sia.

Ang mga Kadam-an sa Baybayon

(Mat. 4:23-25; Luc. 6:17-19)

7Naglikaw si Jesus kaupud sang iya mga gintoton-an pa dagat, kag nagsonod ang isa ka dakung kadam-an gikan sa Galilea; gikan sa Judea man 8kag gikan sa Jerusalem kag gikan sa Idumea kag sa unhan sang Jordan kag sa palibut sang Tiro kag Sidon ang dakung kadam-an, sang nakabati sang tanan nga ginhimo niya, nag-abut sa iya. 9Kag naghambal sia sa iya mga gintoton-an nga ang sakayan ihanda sa iya bangud sang kadam-an, basi kon ipiton nila sia; 10kay naayo niya ang madamu sa bagay nga ang tanan nga may mga balatian nagdinaguso sa pagtandug sa iya.#Mar. 4:1; Luc. 5:1-3. 11Kag kon ang mga espiritu nga dimatinlo makakita sa iya, naghapa sila sa atubangan niya kag nagsinggit, “Ikaw ang Anak sang Dios.” 12Kag nagtugon gid sia sa ila nga indi nila pag-ipakilala sia.

Si Jesus Nagapili sang Napulog Duha

(Mat. 10:1-4; Luc. 6:12-16)

13Kag nagtaklad sia sa mga bakolod, kag nagtawag sa iya sang mga nahamut-an niya; kag nagpalapit sila sa iya. 14Kag nagtangdo sia sing napulog duha [nga iya man ginhingalanan mga pinadala], agud nga magpakig-upud sila sa iya, kag nga mapadala niya sila sa pagwali 15kag may pagbulut-an sa pagsobol sang mga yawa: 16si Simon nga ginhayoan niya Pedro; 17si Santiago nga anak ni Zebedeo kag si Juan nga utud ni Santiago, nga ginhayoan niya sila Boanerges, kon sayoron, mga anak sang daguub; 18si Andres, kag si Felipe, kag si Bartolome, kag si Mateo, kag si Tomas, kag si Santiago nga anak ni Alfeo, kag si Tadeo, kag si Simon nga Canaanhon, 19kag si Judas Iscariote, nga nagtugyan sa iya.

Ang Pasipala batok sa Espiritu Santo

(Mat. 12:22-32; Luc. 11:14-23)

Niyan nagpauli sia; 20kag ang kadam-an nagtipon liwat, sa bagay nga indi na sila makahimo bisan magkaon. 21Kag sang nabatian ini sang mga abyan niya, nagkadto sila sa pagdakup sa iya, kay nagsiling sila, “Buang sia.” 22Kag ang mga escriba nga naghalin sa Jerusalem nagsiling, “Ginagahuman sia ni Beelzebub, kag paagi sa principe sang mga yawa nagasobol sia sang mga yawa.”#Mat. 9:34; 10:25. 23Kag gintawag niya sila sa iya, kag nagsiling sa ila sa mga paanggid, “Paano bala ang pagkasarang ni Satanas sa pagsobol kay Satanas? 24Kon ang ginharian magpihak batok sa iya kaugalingon, ina nga ginharian indi makatindug. 25Kag kon ang panimalay magpihak batok sa iya kaugalingon, ina nga panimalay indi makatindug. 26Kag kon si Satanas nakasumpong sa iya kaugalingon kag napihak, indi sia makatindug, kondi matapus. 27Apang walay bisan sin-o nga makasulud sa balay sang makusug nga tawo kag makaati sang iya pagkabutang, kon indi niya anay gapuson ang makusug; niyan sa pagkamatuud atihon niya ang iya balay.

28“Sa pagkamatuud, nagasiling ako sa inyo, ang tanan nga sala patawaron sa mga anak sang mga tawo, kag ang mga pasipala nga ginabungat nila; 29apang ang bisan sin-o nga magpasipala sa Espiritu Santo wala gid sing kapatawaran,#Luc. 12:10. kondi malinapason sa sala nga walay katapusan”— 30bangud nga nagsiling sila, “May espiritu sia nga dimatinlo.”

Ang Iloy kag mga Utud ni Jesus

(Mat. 12:46-50; Luc. 19:21)

31Kag nag-abut ang iya iloy kag ang iya mga utud; kag sang nagatindug sa gowa ginbalitaan nila sia kag nagtawag sa iya. 32Kag ang kadam-an nagalingkod sa palibut niya; kag nagsiling sila sa iya, “Ang imo iloy kag ang imo mga lalaking utud [kag ang imo mga babaying utud] sa gowa, nga nagapangita sa imo.” 33Kag nagsabat sia sa ila, “Sin-o bala ang akon iloy kag ang akon mga utud?” 34Kag sang nagatolok sia sa mga nagalingkod sa palibut niya, nagsiling sia, “Yari ang akon iloy kag ang akon mga utud! 35Ang bisan sin-o nga maghimo sang kabubut-on sang Dios amo ang akon utud nga lalaki, kag utud nga babayi, kag iloy.”

Currently Selected:

MARCOS 3: ABHIL82

Highlight

Copy