MATEO 28

Ang Pagkabanhaw ni Jesus

(Mar. 16:1-8; Luc. 24:1-12; Juan 20:1-10)

1Karon sa tapus ang adlaw nga inugpahuway, sa pagpamanagbanag sang nahaunang adlaw sang semana, nagkadto si Maria Magdalena kag ang isa ka Maria sa pagtan-aw sang lulubngan. 2Kag yari karon, may daku nga linog; kay isa ka manugtunda sang Ginoo nagkunsad gikan sa langit kag nag-abut kag ginpaligid ang bato, kag naglingkod sa sini. 3Ang iya dagway subong sang kilat, kag ang iya panapton maputi subong sang nieve. 4Kag sa kahadluk sa iya nagkurug ang mga bantay kag nangin-subong sang patay nga mga tawo. 5Apang ang manugtunda nagsiling sa mga babayi, “Dili kamo mahadluk; kay nakahibalo ako nga kamo nagapangita kay Jesus nga ginlansang sa cruz. 6Wala sia diri; kay nabanhaw sia, subong sang ginsiling niya. Kari kamo, tan-awa ninyo ang duug nga ginhamyangan sang Ginoo. 7Niyan lakat kamo sing dalidali kag sugiran ang iya mga gintoton-an nga nabanhaw sia, kag yari karon, nagauna sia sa inyo sa Galilea; didto makita ninyo sia. Yari karon, nasiling ko sa inyo.” 8Gani naghalin sila sing dalidali sa lulubngan, nga may kahadluk kag daku nga kalipay, kag nagdalagan sa pagbalita sa iya mga gintoton-an. 9Kag yari karon, si Jesus nagsugata sa ila kag nagsiling, “Paano kamo!” Kag sila nagpalapit kag naghakus sa iya mga tiil kag nagsimba sa iya. 10Niyan si Jesus nagsiling sa ila, “Dili kamo mahadluk; kadto kamo kag sugiran ang akon mga utud nga magkadto sila sa Galilea, kag didto makita ako nila.”

Ang Panugid sang Bantay

11Sang nagapakadto sila, yari karon, ang iban sang mga bantay nag-abut sa banwa kag nagsugid sa puno nga mga sacerdote sang tanan nga butang nga nahanabu. 12Kag sang nagtilipon sila kaupud sang mga tigulang kag nakasapul, naghatag sila sing madamu nga cuarta sa mga soldado 13kag nagsiling, “Isiling ninyo, ‘Ang iya mga gintoton-an nagkari sa kagab-ihon kag nagkawat sa iya sang katolog kami.’ 14Kag kon ini mabatian sang pangolo-puud, buyokon namon sia kag luwason kamo sa kaliligban.” 15Gani ginbaton nila ang cuarta kag naghimo sono sa gintudlo sa ila; kag ini nga patopato ginpalapnag sang mga Judio tubtub karon nga adlaw.

Ang Dakung Panugyan

(Mar. 16:14-18; Luc. 24:36-49; Juan 20:19-23)

16Karon ang napulog isa ka gintoton-an nagkadto sa Galilea,#Mat. 26:32; Mar. 14:28. sa bukid nga gintangdo ni Jesus sa ila. 17Kag sang nakita nila sia nagsimba sila sa iya; apang ang iban nagduhaduha. 18Kag nagpalapit si Jesus kag nagpamolong sa ila, “Ang bug-os nga pagbulut-an sa langit kag sa duta natugyan sa akon. 19Busa lakat kamo kag himoon nga mga gintoton-an ang tanan nga kapungsuran,#Binu. 1:8. nga nagabautiso sa ila sa ngalan sang Amay kag sang Anak kag sang Espiritu Santo, 20nga nagapanudlo sa ila sa pagtuman sang tanan nga ginsogo ko sa inyo; kag yari karon, ako kaupud ninyo sa gihapon, tubtub sa katapusan sang katuigan.”

Currently Selected:

MATEO 28: ABHIL82

Highlight

Copy