MATEO 26

Ang mga Pangulo Nagahimbon batok kay Jesus

(Mar. 14:1-2; Luc. 22:1-2; Juan 11:45-57)

1Sang nakatapus si Jesus sini tanan nga polong, nagsiling sia sa iya mga gintoton-an, 2“Nakahibalo kamo nga sa tapus ang duha ka adlaw magaabut ang Pascua,#Ex. 12:1-27. kag ang Anak sang tawo itugyan nga ilansang sa cruz.”

3Niyan nagtipon ang mga puno nga mga sacerdote kag ang mga tigulang sang katawohan sa luwang sang balay sang pinakamataas nga sacerdote, nga gintawag si Caifas, 4kag naghimbon sila agud nga ila madakup si Jesus sa limbong kag mapatay nila sia. 5Apang nagsiling sila, “Indi sa tion sang piesta, basi mahanabu ang kagubut sa katawohan.”

Si Jesus Ginahaplas sa Betania

(Mar. 14:3-9; Luc. 7:36-50; Juan 12:1-8)

6Karon sang didto si Jesus sa Betania sa balay ni Simon nga aroon, 7may nagpalapit sa iya nga babayi nga may tibudtibud nga alabastro sang ihalaplas nga malahalon gid, kag ginbobo niya ini sa olo ni Jesus, sang naglingkod sia sa pagkaon. 8Apang sang nakita ini sang mga gintoton-an, naakig sila, nga nagasiling, “Sa ano bala nga katuyoan ini nga pag-usik? 9Kay ining ihalaplas sarang kuntani mabaligya sing mahal, kag mahatag sa mga imol.” 10Apang sang nahantupan ini ni Jesus nagsiling sia sa ila, “Ngaa bala ginagamo ninyo ini nga babayi? Kay sia nakahimo sing buhat nga maayo sa akon. 11Kay ang mga imol kaupud ninyo sa gihapon,#Deut. 15:11. apang ako indi kaupud ninyo sa gihapon. 12Sang pagbobo niya sining ihalaplas sa akon lawas iya ginhimo ini sa pag-aman sa akon sa paglubung. 13Sa pagkamatuud, nagasiling ako sa inyo, bisan diin iwali ining maayong balita sa bug-os nga kalibutan, hambalon man ang ginhimo sining babayi sa handumanan niya.”

Si Judas Nagasugut sa Pagtugyan kay Jesus

(Mar. 14:10-11; Luc. 22:3-6)

14Niyan ang isa sang mga napulog duha, nga gintawag si Judas Iscariote, nagkadto sa puno nga mga sacerdote 15kag nagpamangkot, “Ano bala ang ihatag ninyo sa akon kon itugyan ko sia sa inyo?” Kag ginbayaran nila sia sing katloan ka bilog nga pilak. 16Kag kutub niyan nagpangita si Judas sing kahigayonan sa pagtugyan sa kay Jesus sa ila.

Ang Pag-aman tungud sa Pascua

(Mar. 14:12-16; Luc. 22:7-13)

17Karon sa nahaunang adlaw sang Tinapay nga walay Tapay nagpalapit kay Jesus ang iya mga gintoton-an, nga nagapamangkot, “Diin bala ang buut mo nga ihanda namon nga sa imo ang pagkaon sang pascua?” 18Nagsabat sia, “Kadto kamo sa banwa sa amo nga tawo, kag magsiling sa iya, ‘Ang Manunudlo nagasiling, Ang akon tion malapit na; magahiwat ako sang pascua sa imo balay kaupud sang akon mga gintoton-an.’” 19Kag ang mga gintoton-an naghimo sono sang ginsogo sa ila ni Jesus, kag ginhanda nila ang pascua.

Si Jesus Nagatagna sang Pagtugyan sa Iya

(Mar. 14:17-21; Luc. 22:21-23; Juan 13:21-30)

20Sang kahaponon na, naglingkod sia sa pagkaon kaupud sang napulog duha ka gintoton-an; 21kag sang sila nagakaon, nagsiling sia, “Sa pagkamatuud, nagasiling ako sa inyo, nga isa sa inyo magatugyan sa akon.” 22Kag nagkalasubu sila sing tama, kag nagsugud sa pagsiling sa iya ang tagsatagsa, “Ako ayhan, Ginoo?” 23Nagsabat sia, “Ang nagtusmog sang iya kamut kaupud nakon sa pinggan, ang amo magatugyan sa akon. 24Ang Anak sang tawo magataliwan sono sa nasulat nahanungud sa iya,#Sal. 41:9. apang kailo yadtong tawo nga paagi sa iya ginatugyan ang Anak sang tawo! Maayo sadtong tawo nga wala sia matawo.” 25Si Judas, nga nagtugyan sa iya, nagsabat, “Ako ayhan, Rabbi?” Nagsiling sia sa iya, “Ginsiling mo.”

Ang Tulumanon nahanungud sa Panihapon sang Ginoo

(Mar. 14:22-25; Luc. 22:14-20; 1 Cor. 11:23-26)

26Karon sang nagakaon sila, nagkuha si Jesus sing tinapay, kag ginpakamaayo, kag gintipiktipik ini, kag ginhatag sa mga gintoton-an kag nagsiling, “Kuha kamo, kaon kamo; ini amo ang akon lawas.” 27Kag nagkuha sia sang tagayan, kag sang nakapasalamat, ginhatag niya ini sa ila, nga nagasiling, “Inum kamo tanan sini; 28kay ini amo ang akon dugo#Ex. 24:6-8. sang bag-ong katipan,#Jer. 31:31-34. nga ginaula tungud sa madamu sa kapatawaran sang mga sala. 29Ako nagasiling sa inyo nga kutub karon indi na ako magainum sining bunga sang uvas, tubtub sadtong adlaw nga magainum ako sini sing bag-o kaupud ninyo sa ginharian sang akon Amay.”

Ang Pagpanghiwala ni Pedro Ginatagna

(Mar. 14:26-31; Luc. 22:31-34; Juan 13:36-38)

30Kag sang nakaamba sila sing ambahanon, naggowa sila pakadto sa Bukid sang mga Olivo. 31Niyan nagsiling si Jesus sa ila, “Tanan kamo masandad sa akon karon nga gab-i; kay nasulat na, ‘Samaron ko ang manugpahalab, kag magaaplaag ang mga carnero sang panong.’#Zac. 13:7. 32Apang sa tapus ako mabanhaw, magauna ako sa inyo sa Galilea.”#Mat. 28:16. 33Si Pedro nagsabat sa iya, “Kon ang tanan masandad sa imo, ako indi gid masandad.” 34Si Jesus nagsiling sa iya, “Sa pagkamatuud, nagasiling ako sa imo, nga karon nga gab-i, sa wala pa makapamalo ang manuk, ipanghiwala mo ako sing makatlo.” 35Si Pedro nagsabat sa iya, “Bisan kinahanglan ako mapatay kaupud nimo, indi ko gid ikaw pag-ipanghiwala.” Ang tanan nga gintoton-an nagsiling sing amo man.

Si Jesus Nagapangamuyo sa Getsemani

(Mar. 14:32-42; Luc. 22:39-46)

36Niyan si Jesus nag-abut kaupud nila sa duug nga gintawag Getsemani, kag nagsiling sa iya mga gintoton-an, “Lingkod kamo diri, samtang nagakadto ako sa unhan kag nagapangamuyo.” 37Kag iya gin-upud si Pedro kag ang duha ka anak ni Zebedeo, kag nagsugud sa pagkasubu kag pagkalisang. 38Niyan nagsiling sia sa ila, “Ang akon kalag masinulub-on sing tama, tubtub gid sa kamatayon; pabilin kamo diri, kag pulaw kaupud nakon.” 39Kag sang nakakadto sia sa uluunhan naghapa sia kag nagpangamuyo, “Amay ko, kon mahimo, paligara sa akon ining tagayan; apang, indi sono sa buut ko, kondi sa buut mo.” 40Kag nagbalik sia sa iya mga gintoton-an kag nakita sila nga nagakatolog; kag nagsiling sia kay Pedro, “Ano, indi bala kamo makapulaw kaupud nakon sing isa ka takna? 41Pulaw kag pangamuyo kamo agud nga indi kamo magsulud sa panulay; ang espiritu matuud handa, apang ang unud maluya.” 42Sa liwat, naglakat sia sing makaduha kag nagpangamuyo, “Amay ko, kon ini indi magtaliwan kon indi ko ini mainum, paghimoon ang imo kabubut-on.” 43Kag nagbalik sia liwat kag nakita niya sila nga nagakatolog, kay mabug-at ang ila mga mata. 44Busa sang ginbayaan niya sila liwat, naglakat sia kag nagpangamuyo sing makatlo, nga nagasiling sang amo man nga mga polong. 45Niyan nagbalik sia sa iya mga gintoton-an kag nagsiling sa ila, “Nagakatolog bala kamo kag nagapahuway gihapon? Tan-awa, yari na ang takna, kag ang Anak sang tawo ginatugyan sa mga kamut sang mga makasasala. 46Tindug kamo, malakat kita; tan-awa, yari na ang nagatugyan sa akon.”

Ang Pagtugyan kag Pagdakup kay Jesus

(Mar. 14:43-50; Luc. 22:47-53; Juan 18:1-11)

47Sang nagahambal pa sia, si Judas, nga isa sang mga napulog duha, nag-abut kag kaupud niya ang dakung kadam-an nga may mga espada kag mga lampus, gikan sa puno nga mga sacerdote kag mga tigulang sang katawohan. 48Karon ang nagtugyan sa iya naghatag sa ila sing tanda, nga nagasiling, “Ang akon halukan, amo ina sia; dakpa siya.” 49Kag sa gilayon nagpalapit sia kay Jesus, kag nagsiling, “Paano ka, Rabbi!” Kag naghaluk sia sa iya. 50Si Jesus nagsiling sa iya, “Abyan, ngaa bala yari ka?” Niyan nagpalapit sila kag ginkaptan nila si Jesus kag gindakup sia. 51Kag yari karon, isa sang mga kaupud ni Jesus nagbayaw sang iya kamut kag naggabut sang iya espada, kag ginlabo ang ulipon sang pinakamataas nga sacerdote, kag ginilangan sia. 52Niyan si Jesus nagsiling sa iya, “Itagub ang imo espada; kay ang tanan nga nagagamit sang espada sa espada mapatay. 53Nagahunahuna ka bala nga indi ako makapangayo sa akon Amay, kag sa gilayon padalhan ako niya sing kapin sa napulog duha ka legion nga mga manugtunda? 54Apang paano niyan ang pagkatuman sang mga kasulatan, nga amo ini ang dapat mahanabu?” 55Sa sadtong takna si Jesus nagsiling sa mga kadam-an, “Nagakari bala kamo nga may mga espada kag mga lampus sa pagdakup sa akon subong nga isa ka buyong? Adlawadlaw naglingkod ako sa templo nga nagapanudlo,#Luc. 19:47; 21:37. kag wala ninyo ako pagdakpa. 56Apang tanan ini nahanabu, agud nga matuman ang kasulatan sang mga manalagna.” Niyan ang tanan nga gintoton-an nagbiya sa iya kag nagpalagyo.

Si Jesus sa atubangan sang Corte

(Mar. 14:53-65; Luc. 22:63-71; Juan 18:12-24)

57Niyan ang mga nagdakup kay Jesus nagdala sa iya kay Caifas nga pinakamataas nga sacerdote, diin nagtipon ang mga escriba kag mga tigulang. 58Apang si Pedro nagsonod sa iya sa malayo, tubtub sa luwang sang pinakamataas nga sacerdote, kag nagsulud kag naglingkod kaupud sang mga bantay sa pagtan-aw sang katapusan. 59Karon ang puno nga mga sacerdote kag ang bug-os nga corte nagpangita sing dimatuud nga saksi batok kay Jesus agud nga mapatay nila sia, 60apang wala sila sing nakita, bisan nagpalapit ang madamung dimatuud nga saksi. Sang olihi nagpalapit ang duha 61kag nagsiling, “Ining tawo nagsiling, ‘Ako makasarang magguba sang templo sang Dios, kag magpatindug sini sa tatlo ka adlaw.’#Juan 2:19.” 62Kag nagtindug ang pinakamataas nga sacerdote kag nagsiling sa iya, “Wala ka bala sing isabat? Ano bala ining ginasaksi nila batok sa imo?” 63Apang si Jesus naghipus. Kag ang pinakamataas nga sacerdote nagsiling sa iya, “Ginapasumpa ko ikaw sa Dios nga buhi, nga magsugid ka sa amon kon ikaw ang Cristo, ang Anak sang Dios.” 64Si Jesus nagsabat sa iya, “Ginsiling mo. Apang ako nagasiling sa imo, kutub karon makita ninyo ang Anak sang tawo nga nagalingkod sa too sang Gahum, kag nagakari sa mga panganud sang langit.#Dan. 7:13.” 65Niyan ang pinakamataas nga sacerdote nagkusnit sang iya mga panapton, nga nagasiling, “Nagpasipala sia. Ano pa bala ang kinahanglan ta sang mga saksi? Karon nakabati kamo sang pasipala niya. 66Ano bala sa hunahuna ninyo?” Sila nagsabat, “Takus sia sa kamatayon.”#Lev. 24:16. 67Niyan ginduplaan sia nila sa iya nawung, kag ginsumbag sia; kag ang iban nagtampa sa iya, 68nga nagasiling, “Itagna sa amon, ikaw nga Cristo! Sin-o bala ang nagsumbag sa imo?”

Si Pedro Nagapanghiwala kay Jesus

(Mar. 14:66-72; Luc. 22:54-62; Juan 18:25-27)

69Karon si Pedro nagalingkod sa gowa sa luwang. Kag ang sologoon nga babayi nagpalapit sa iya, nga nagasiling, “Ikaw man kaupud ni Jesus nga Galileanhon.” 70Apang sia nagpanghiwala sini sa atubangan nila nga tanan, nga nagasiling, “Wala ako makahibalo sang imo ginasiling.” 71Kag sang naggowa sia sa gawang, nakita sia sang isa na man ka sologoon nga babayi, kag nagsiling sa mga yadto didto, “Ining tawo man kaupud ni Jesus nga Nazaretnon.” 72Kag liwat nagpanghiwala sia sini nga may sumpa, “Wala ko makilala ang tawo.” 73Sa wala madugay nagpalapit ang nagatilindug kag nagsiling kay Pedro, “Matuud gid nga ikaw man isa sa ila, kay ang imo panghambal nagapakilala sa imo.” 74Niyan nagsugud sia sa pagpanuluy kag sa pagpanumpa, “Wala ko makilala ang tawo.” Kag sa gilayon nagpamalo ang manuk. 75Kag si Pedro nakadumdum sang ginsiling ni Jesus, “Sa wala pa makapamalo ang manuk, ikaw magapanghiwala sa akon sing makatlo.” Kag naggowa sia kag naghibi sing mapait.

Currently Selected:

MATEO 26: ABHIL82

Highlight

Copy