MATEO 25

Ang Paanggid nahanungud sa Napulo ka Ulay

1“Niyan ang ginharian sang langit mapaangay sa napulo ka dalaga nga nagdala sang ila mga suga#Luc. 12:35. kag nagkadto sa pagsugat sa nobyo. 2Lima sa ila mga buangbuang, kag lima mga mainandamon. 3Kay sang nagdala ang mga buangbuang sang ila mga suga, wala sila magdala sing lana; 4apang ang mga mainandamon nagdala sing lana sa ila mga tibudtibud pati sang ila mga suga. 5Karon sang naglantang ang nobyo, tanan sila gintuyo kag nagtolog. 6Apang sa tunga sang kagab-ihon may isa ka sininggit, ‘Yari karon, ang nobyo! Gowa kamo sa pagsugat sa iya.’ 7Niyan tanan yadtong dalaga nagbangon kag nag-aman sang ila mga suga. 8Kag ang mga buangbuang nagsiling sa mga mainandamon, ‘Hatagi kami sang inyo lana, kay nagakapalong ang amon mga suga.’ 9Apang ang mga mainandamon nagsabat, ‘Basi indi ini mag-igo sa amon kag sa inyo; maayo pa magkadto kamo sa mga nagabaligya kag magbakal nga sa inyo kaugalingon.’ 10Kag sang nagpakadto sila sa pagbakal, nag-abut ang nobyo, kag ang mga handa nagsulud upud sa iya sa sinalosalo sang kasal; kag gintakup ang ganhaan. 11Ugaling nag-abut man ang iban nga mga dalaga, nga nagasiling, ‘Ginoo, Ginoo, buksi kami.’ 12Apang nagsabat sia, ‘Sa pagkamatuud, nagasiling ako sa inyo, wala ako makakilala sa inyo.’#Luc. 13:25. 13Busa bantay kamo, kay wala kamo makahibalo sang adlaw ukon sang takna.

Ang Paanggid nahanungud sa mga Talanton

(Luc. 19:11-27)

14“Kay subong sang isa ka tawo nga sang magapanlakatan sa malayo nga duta nagtawag sa iya mga ulipon kag nagtugyan sa ila sang iya pagkabutang; 15sa isa naghatag sia sing lima ka talanton,#25:15 Isa ka talanton mga P 2,000. sa isa duha, sa isa isa, sa tagsatagsa sono sa iya ikasarang. Niyan nagpanlakatan sia. 16Sa gilayon ang nakabaton sing lima ka talanton naglakat kag nagpatikang sini; kag nagdaug sia sing lima pa ka talanton. 17Sa amo nga bagay ang nakabaton man sing duha nagdaug sing duha. 18Apang ang nakabaton sing isa lamang, naglakat kag nagkutkut sa duta kag gintago ang cuarta sang iya agalon. 19Karon sa tapus ang malawig nga tion nag-abut ang agalon sadtong mga ulipon kag nagpakighusay sa ila. 20Kag ang nakabaton sing lima ka talanton nagpalapit, nga nagadala sing lima pa ka talanton, nga nagasiling, ‘Agalon, lima ka talanton ang gintugyan mo sa akon; yari nakadaug ako sing lima pa ka talanton.’ 21Ang iya agalon nagsiling sa iya, ‘Maayo gid, ulipon nga maayo kag matutum; sa diotay nanginmatutum ka, padumalahon ko ikaw sa madamu; sulud ka sa kalipay sang imo agalon.’ 22Kag sia man nga nakabaton sing duha ka talanton nagpalapit, nga nagasiling, ‘Agalon, duha ka talanton ang gintugyan mo sa akon; yari nakadaug ako sing duha pa ka talanton.’ 23Ang iya agalon nagsiling sa iya, ‘Maayo gid, ulipon nga maayo kag matutum; sa diotay nanginmatutum ka, padumalahon ko ikaw sa madamu; sulud ka sa kalipay sang imo agalon.’ 24Sia man nga nakabaton sing isa ka talanton nagpalapit, nga nagasiling, ‘Agalon, nakilala ko nga ikaw tawo nga matig-a, nga nagaani didto sa wala mo masab-ugi kag nagatipon sa wala mo mapahangini; 25gani nahadluk ako, kag naglakat kag gintago ko ang imo talanton sa duta. Yari ang imo kaugalingon.’ 26Apang ang iya agalon nagsabat sa iya, ‘Malaut kag matamad nga ulipon! Nakahibalo ka bala nga ako nagaani didto sa wala ko masab-ugi, kag nagatipon didto sa wala ko mapahangin? 27Busa dapat mo kuntani gintugyan ang akon cuarta sa mga manugbanko, kag sa akon pag-abut makabaton ako sang akon, upud ang tinubo. 28Gani kuhaa ninyo sa iya ang talanton, kag ihatag sa may napulo ka talanton. 29Kay ang tagsatagsa nga may iya hatagan kag may kabuganaan sia; apang sia nga wala sing iya, bisan pa ang iya kuhaon.#Mat. 13:12; Mar. 4:25; Luc. 8:18. 30Kag ang ulipon nga wala sing pulus ipilak ninyo sa kadudulman nga sa gowa; didto ang mga tawo magahibi kag magabagrut sang ila mga ngipon.#Mat. 8:12; 22:13; Luc. 13:28.’

Ang Paghukom sa mga Pungsud

31“Kon magkari ang Anak sang tawo sa iya himaya, kag ang tanan nga manugtunda kaupud niya,#Mat. 16:27. niyan magalingkod sia sa iya mahimayaon nga trono.#Mat. 19:28. 32Tiponon sa atubangan niya ang tanan nga pungsud, kag painpainon niya sila subong sang manugpahalab nga nagapain sang mga carnero sa mga kanding, 33kag ipahamtang niya ang mga carnero sa iya too, apang ang mga kanding sa wala. 34Niyan ang Hari magasiling sa mga natoo niya, ‘Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutub pa sang pagtukud sang kalibutan; 35kay gingutum ako kag ginpakaon ako ninyo, gin-uhaw ako kag ginpainum ako ninyo, nagdumoloong ako kag ginsagup ako ninyo, 36hubo ako kag ginpapanaptan ako ninyo, nagmasakit ako kag ginduaw ako ninyo, nabilanggo ako kag nagkari kamo sa akon.’ 37Niyan ang mga matarung magasabat sa iya, ‘Ginoo, san-o ka bala namon makita nga gutum kag ginpakaon ka namon, ukon nauhaw kag ginpainum ka namon? 38Kag san-o ka bala namon makita nga dumoloong kag ginsagup ka namon, ukon hubo kag ginpapanaptan ka namon? 39Kag san-o ka bala namon makita nga nagmasakit ukon sa bilanggoan kag nagkadto kami sa imo?’ 40Kag ang Hari magasabat sa ila, ‘Sa pagkamatuud, nagasiling ako sa inyo, sa bagay nga ginhimo ninyo ini sa isa sang labing kubus sining akon mga utud, ginhimo ini ninyo sa akon.’ 41Niyan magasiling sia sa mga nawala, ‘Palayo kamo sa akon, mga ginpakamalaut, pa kalayo nga walay katapusan nga gin-aman sa yawa kag sa iya mga manugtunda; 42kay gingutum ako kag wala ninyo ako pagpakan-a, gin-uhaw ako kag wala ninyo ako pagpaimna, 43nagdumoloong ako kag wala ninyo ako pagsagupa, hubo kag wala ninyo ako pagpapanaputi, nagmasakit kag sa bilanggoan kag wala ninyo ako pagduawa.’ 44Niyan magasabat man sila, ‘Ginoo, san-o ka bala namon makita nga gutum ukon nauhaw ukon dumoloong ukon hubo ukon nagmasakit ukon sa bilanggoan, kag wala kami mag-alagad sa imo?’ 45Niyan magasabat sia sa ila, ‘Sa pagkamatuud, nagasiling ako sa inyo, sa bagay nga wala ninyo paghimoa ini sa isa sang labing kubus sini sa ila, wala man ninyo paghimoa ini sa akon.’ 46Kag ini sila magakadto sa silot nga walay katapusan, apang ang mga matarung sa kabuhi nga walay katapusan.#Dan. 12:2.”

Currently Selected:

MATEO 25: ABHIL82

Highlight

Copy