MATEO 15

Ang mga Butang nga Nagadagta

(Mar. 7:1-23)

1Niyan nagpalapit kay Jesus ang mga Fariseo kag mga escriba gikan sa Jerusalem kag nagpamangkot, 2“Ngaa bala nagalalis ang imo mga gintoton-an sang pinalatonlaton nga sugid sang mga tigulang? Kay wala sila nagapanghinaw sang ila mga kamut kon sila magkaon.” 3Nagsabat sia sa ila, “Ngaa bala nagalalis man kamo sang sogo sang Dios tungud sang inyo pinalatonlaton nga sugid? 4Kay ang Dios nagsiling, ‘Tahora ang imo amay kag ang imo iloy,#Ex. 20:12; Deut. 5:16. kag, ‘Ang nagahambal sing malain batok sa amay ukon sa iloy, patyon sia nga totoo.’#Ex. 21:17; Lev. 20:9. 5Apang kamo nagasiling, ‘Ang bisan sin-o nga magsiling sa amay ukon sa iloy, Halad sa Dios yadtong sarang ko ikabulig sa imo, indi na sia magtahud sa iya amay.’ 6Gani, ginpakawalay pulus ninyo ang polong sang Dios tungud sa inyo pinalatonlaton nga sugid. 7Mga salimpapaw! Matuud gid ang gintagna nahanungud sa inyo ni Isaias, sang nagsiling sia:

8‘Ining katawohan sa mga bibig nagatahud sa akon,

apang ang tagiposoon nila malayo sa akon;

9walay pulus ang pagsimba nila sa akon,

nga nagapanudlo subong nga mga pagtolon-an sang mga sogo sang mga tawo.’#Isa. 29:13.

10Kag gintawag ni Jesus sa iya ang katawohan kag nagsiling sia sa ila, “Pamatii kag hangpa ninyo: 11indi ang nagasulud sa baba nagadagta sa tawo, kondi ang nagagowa sa baba, ini nagadagta sa tawo.” 12Niyan nagpalapit ang mga gintoton-an kag nagpamangkot sa iya, “Nakahibalo ka bala nga ang mga Fariseo nagkalaakig sang pagkabati nila sining polong?” 13Nagsabat sia, “Ang tagsa ka tanum nga wala pag-itanum sang akon Amay nga langitnon gabuton. 14Pabaya-i ninyo sila; bulag sila nga mga manugtuytuy. Kag kon ang bulag magtuytuy sa bulag, sila nga duha maholog sa boho.#Luc. 6:39.” 15Apang si Pedro nagsabat sa iya, “Saysayi kami sang paanggid.” 16Kag nagpamangkot si Jesus, “Wala pa man bala kamo sing paghangup? 17Wala bala kamo makahantup nga ang bisan ano nga nagasulud sa baba nagakadto sa tiyan, kag ginapagowa? 18Apang ang mga butang nga ginabungat nagagikan sa tagiposoon,#Mat. 12:34. kag ini nagadagta sa tawo. 19Kay sa tagiposoon nagagikan ang malaut nga mga hunahuna, pagpatay, panglahi, pakighilawas, pangawat, dimatuud nga pagsaksi, pasipala. 20Ini amo ang mga butang nga nagadagta sa tawo; apang ang pagkaon nga wala pagpanghinaw sang mga kamut wala nagadagta sa tawo.”

Ang Pagtoo sang Babaying Canaanhon

(Mar. 7:24-30)

21Kag naghalin didto si Jesus kag naglikaw pa ginsakpan sang Tiro kag Sidon. 22Kag yari karon, isa ka babayi nga Canaanhon naggowa sa sadtong duug kag nagsinggit, “Kalooyi ako, O Ginoo, Anak ni David; ang akon anak nga babayi ginasakit sing tama sang yawa.” 23Apang wala sia magsabat sing isa ka polong. Kag nagpalapit ang iya mga gintoton-an kag nagpangabay sa iya, nga nagasiling, “Pahalina sia, kay nagasinggit sia sa aton olihi.” 24Nagsabat sia, “Ako ginpadala lamang sa mga carnero nga nadula sang panimalay sang Israel.” 25Apang nagpalapit sia kag nagyaub sa iya, nga nagasiling, “Ginoo, tabangi ako.” 26Kag nagsabat sia, “Indi nagakaigo nga pagkuhaon ang tinapay sang mga anak kag ipilak sa mga ido.” 27Ang babayi nagsiling, “Matuud, Ginoo, walay sapayan ang mga ido nagakaon sang mga usik nga nagakaholog sa latok sang ila mga agalon.” 28Niyan si Jesus nagsabat sa iya, “O babayi, pagkadaku sang imo pagtoo! Paghimoon sa imo sono sa imo luyag.” Kag nag-ayo gilayon ang iya anak nga babayi.

Madamu ang Ginaayo

29Kag si Jesus naghalin didto kag nagligad malapit sa Dagat sang Galilea. Kag nagtaklad sia sa mga bakolod, kag naglingkod didto. 30Kag nagpalapit sa iya ang dakung kadam-an, nga nagadala sang mga piang, mga bulag, mga apa, mga pingkaw, kag madamung iban pa, kag ginpahamtang nila sila sa iya tiilan, kag gin-ayo niya sila; 31sa bagay nga natingala ang kadam-an, sang nakita nila nga naghambal ang mga apa, nag-ayo ang mga pingkaw, naglakat ang mga piang, kag nakakita ang mga bulag; kag ginhimaya nila ang Dios sang Israel.

Ang Pagpakaon sa Apat ka Libo

(Mar. 8:1-10)

32Niyan gintawag ni Jesus sa iya ang iya mga gintoton-an kag nagsiling, “Nalooy ako sa kadam-an, kay tatlo na ka adlaw nga sila kaupud nakon, kag walay bisan ano nga kaonon; kag indi ako buut magpapauli sa ila nga gutum, basi kon punawon sila sa dalanon.” 33Kag nagpamangkot sa iya ang iya mga gintoton-an, “Diin bala kita makuha sa kamingawan sing madamu nga tinapay nga makabusug sa amo kadaku nga kadam-an?” 34Kag si Jesus nagsabat sa ila, “Pila bala ka bilog ang tinapay ninyo?” Nagsabat sila, “Pito, kag pila ka bilog nga isda nga magamay.” 35Kag sang nagsogo sia sa kadam-an sa paglingkod sa duta, 36ginkuha niya ang pito ka tinapay kag ang mga isda, kag sang nakapasalamat sia gintipiktipik niya ini kag ginhatag ini sa mga gintoton-an, kag ang mga gintoton-an naghatag sini sa mga kadam-an. 37Kag nagkaon sila tanan kag nabusug; kag ginhimos nila ang pito ka alat nga puno sang mga tinipik nga nabilin. 38Ang nagkaon apat ka libo ka lalaki, luwas ang mga babayi kag mga kabataan. 39Kag sang ginpapauli niya ang mga kadam-an, nagsakay sia sa sakayan kag nag-abut sa duug sang Magadan.

Currently Selected:

MATEO 15: ABHIL82

Highlight

Copy