MALAQUIAS 3
3
1“Yari karon, ako magapadala sang akon manugbalita sa pag-aman sang dalanon sa una nakon,#Mat. 11:10; Mar. 1:2; Luc. 1:76; 7:27. kag ang Ginoo nga ginapangita ninyo, magasulud sing hinali sa iya templo; ang manugbalita sang katipan nga inyo ginahandum, yari karon, nagapakari sia, nagasiling ang Ginoo sang mga kasoldadosan. 2Apang sin-o bala ang makabatas sang adlaw sang iya pagkari, kag sin-o bala ang makatindug kon magpahayag sia?#Bug. 6:17.
“Kay sia kaangay sang kalayo sang manugtunaw kag kaangay sang habon sang mga manugpamunak; 3magalingkod sia subong sang manugtunaw kag manug-ulay sang pilak, kag putlion niya ang mga anak ni Levi kag ulayon sila subong sang bulawan kag pilak, tubtub nga magdolot sila sa Ginoo sing mga halad sa pagkamatarung. 4Niyan ang dolot sang Juda kag sang Jerusalem manginkalahamut-an sa Ginoo subong sang sa mga adlaw nga dumaan kag subong sang sa dumaan nga mga tuig.
5“Niyan magapalapit ako sa inyo sa paghukom; manginsaksi ako nga madagmit batok sa mga diwatahan, batok sa mga makihilahion, batok sa mga palasumpa sing butig, batok sa mga nagapigus sang sinoholan sa iya mga sohol, sang balo nga babayi kag sang ilo, sa nagapatalang sang manlulugayaw sa iya kinamatarung, kag wala nagakahadluk sa akon, nagasiling ang Ginoo sang mga kasoldadosan.
Ang Pagbayad sang mga Ikapulo
6“Kay ako nga Ginoo wala nagabaylo; busa kamo, O mga anak ni Jacob, wala mapapas. 7Kutub sa mga adlaw sang inyo mga ginikanan naglipas kamo sa akon mga pagsolondan kag wala magbantay sa ila. Balik kamo sa akon, kag magabalik ako sa inyo, nagasiling ang Ginoo sang mga kasoldadosan. Apang nagasiling kamo, ‘Sa diin bala magabalik kami?’ 8Magapangawat bala ang tawo sa Dios? Apang nagapangawat kamo sa akon. Apang nagasiling kamo, ‘Sa diin bala nagapangawat kami sa imo?’ Sa mga ikapulo kag sa mga halad. 9Pinakamalaut kamo sang pagpakamalaut, kay kamo nagapangawat sa akon; ining bug-os nga pungsud. 10Dalha ninyo ang bug-os nga ikapulo sa balay sang bahandi,#Lev. 27:30; Num. 18:21-24; Deut. 12:5-7; 14:22-29; Neh. 13:12. agud may kalan-on sa akon balay; kag tilawi ako karon sa sini, nagasiling ang Ginoo sang mga kasoldadosan, kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan. 11Sabdongon ko ang manughalunhon tungud sa inyo, agud nga indi niya paglaglagon ang mga bunga sang inyo duta; kag ang inyo uvas sa latagon indi mapulakan sang iya bunga sa wala pa ang tion, nagasiling ang Ginoo sang mga kasoldadosan. 12Niyan ang tanan nga pungsud magatawag sa inyo nga malipayon, kay kamo manginduta nga kalaluyagan, nagasiling ang Ginoo sang mga kasoldadosan.
Ang Kinatuhay sa Tunga sang Matarung kag Malauton
13“Ang inyo mga polong nanginmatigdas batok sa akon, nagasiling ang Ginoo. Apang nagasiling kamo, ‘Ano bala ang ginpamolong namon batok sa imo?’ 14Nagsiling kamo, ‘Walay pulus ang pag-alagad sa Dios. Ano bala ang kapuslanan nga ginbantayan namon ang iya tinulin ukon nga naglakat kami sing masinulub-on sa atubangan sang Ginoo sang mga kasoldadosan? 15Kag karon ginatawag naton nga malipayon ang bugalon; ang mga nagahikot sing pagkamalaut ginapatindug; hoo, ginasulay nila ang Dios kag nakapalagyo.’”
16Niyan ang mga nagakahadluk sa Ginoo nagsinilingay; ang Ginoo nagdungug kag nagpamati, kag ang tolon-an nga handumanan ginsulat sa atubangan niya tungud sa mga nagkahadluk sa Ginoo kag nagpainoino sa iya ngalan. 17“Sila mangin-akon, nagasiling ang Ginoo sang mga kasoldadosan, akon gid kaugalingon sa adlaw nga ako magahimo, kag pasaylohon ko sila subong sang tawo nga nagapasaylo sang iya kaugalingon nga anak nga nagaalagad sa iya. 18Niyan magabalik kamo kag magakilala sang matarung kag sang malauton, sang nagaalagad sa Dios kag sang wala nagaalagad sa iya.
Currently Selected:
MALAQUIAS 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
