MALAQUIAS 1
1
Ang Paghigugma sang Ginoo kay Jacob
1Ang lulan sang polong sang Ginoo sa Israel paagi kay Malaquias.
2“Ginhigugma ko ikaw,” nagasiling ang Ginoo. Apang nagasiling kamo, “Sa diin bala ginhigugma mo kami?” “Indi bala si Esau utud ni Jacob?” nagasiling ang Ginoo. “Apang ginhigugma ko si Jacob 3apang si Esau gindumtan ko;#Roma 9:13. ginpamingaw ang iya kabukiran kag ginhatag ang iya panublion sa mga chacal sang kamingawan.” 4Bisan ang Edom#Isa. 34:1-17; 63:1-6; Jer. 49:7-22; Ezeq. 25:12-14; 35:1-15; Amos 1:11-12; Ab. 1-14. nagasiling, “Ginwagwag kami apang magabalik kami kag magapatindug sang mga nagub-an,” amo ini ang ginasiling sang Ginoo sang mga kasoldadosan, “Sila magapatindug, apang ako magapukan, tubtub nga ang mga tawo magatawag sa ila nga duta sang pagkamalaut, ang katawohan nga batok sa iya ang Ginoo may kaalipungut sa gihapon.” 5Ang inyo mga mata makakita, kag magasiling kamo, “Pakadakuon ang Ginoo, sa unhan sang dulunan sang Israel!”
Ang Ginoo Nagasabdong sang mga Sacerdote
6“Ang anak nagatahud sang iya amay, kag ang alagad sang iya agalon. Niyan kon ako amay, diin bala ang pagtahud sa akon? Kag kon ako agalon, diin bala ang kahadluk sa akon? nagasiling ang Ginoo sang mga kasoldadosan, O mga sacerdote, nga nagatamay sang akon ngalan. Nagasiling kamo, ‘Diin bala kami magtamay sang imo ngalan?’ 7Nagahalad kamo sa akon halaran sing tinapay nga dinagtaan. Kag nagasiling kamo, ‘Diin bala kami magdagta sa imo?’ Sa ginasiling ninyo nga ang latok sang Ginoo talamayon. 8Sang nagadolot kamo sang bulag nga sa halad,#Deut. 15:21. indi bala ina malaut? Kag sang nagadolot kamo sang piang kag masakiton, indi bala ina malaut? Idolot ina karon sa inyo pangolo-puud; mahamuut bala sia sa imo ukon batonon bala niya ang imo kaugalingon? nagasiling ang Ginoo sang mga kasoldadosan. 9Kag karon magpakilooy sang kahamuut sang Dios, agud nga magmainayohon sia sa aton. Kag sa amo nga dolot gikan sa inyo kamut, batonon bala niya ang bisan sin-o sang inyo kaugalingon? nagasiling ang Ginoo sang mga kasoldadosan. 10Kabay pa kuntani nga may isa sa inyo nga magtakup sang mga ganhaan, agud nga indi kamo makadabok sa akon halaran sa walay pulus! Wala ako sing kahamuut sa inyo, nagasiling ang Ginoo sang mga kasoldadosan, kag indi ako magbaton sing dolot sa inyo kamut. 11Kay kutub sa pagsubang sang adlaw tubtub gid sa pagtunud sang amo ang akon ngalan daku sa mga Gentil, kag sa tagsa ka duug ang incienso ginadolot sa akon ngalan, kag isa ka dolot nga putli; kay ang akon ngalan daku sa mga Gentil, nagasiling ang Ginoo sang mga kasoldadosan. 12Apang ginapasipalahan ninyo ini sa nagasiling kamo nga ang latok sang Ginoo dinagtaan, kag ang iya bunga, ang iya kalan-on, talamayon. 13Nagasiling man kamo, ‘Yari karon, daw ano ka makatalaka ini,’ kag nagsinghut kamo sini, nagasiling ang Ginoo sang mga kasoldadosan. Gindala ninyo diri ang ginkuha sa panglugus ukon ang piang ukon ang masakiton, amo ini ang pagdala ninyo sang dolot! Batonon ko bala ini sa inyo kamut? nagasiling ang Ginoo. 14Apang pinakamalaut ang malimbongon nga may lalaki sa iya panong, kag nagasaad, kag nagahalad sa Ginoo sing butang nga may kasawayan; kay ako amo ang daku nga Hari, nagasiling ang Ginoo sang mga kasoldadosan, kag ang akon ngalan makakulugmat sa mga Gentil.
Currently Selected:
MALAQUIAS 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
